sonin.mn
Сэтгэгдэл (0)
Далайд гарцгүй хөгжиж буй орнуудын асуудлаарх НҮБ-ын Гуравдугаар бага хурлын Засгийн газар хоорондын бэлтгэл хорооны анхны хуралдаан өчигдөр Нью-Йорк хотноо болов. Хуралдаанаар Руанда Улсын Кигали хотноо ирэх оны 6 дугаар сарын 19-22-нд болох Далайд гарцгүй хөгжиж буй орнуудын асуудлаарх НҮБ-ын Гуравдугаар бага хурлын бэлтгэлийг хангах Засгийн газар хоорондын хорооны товчооны бүрэлдэхүүн, хамтран даргалагч нарыг сонгов.
 
Товчооны бүрэлдэхүүнд бүс нутгууд, хүлээн авагч орны төлөөлөл болох Австри, Руанда, Бурунди, Зимбабве Балба, Монгол, Болив, Парагвай, ОХУ, Румын гэсэн 10 улс нэрээ дэвшүүлснээс Монгол, Австри Улсыг хамтран даргалагчаар сонголоо.
 
Монгол Улсаас НҮБ-ын дэргэд суугаа Элчин сайд, Байнгын төлөөлөгч В.Энхболд, Австрийн Холбооны Улсаас НҮБ-ын дэргэд суугаа Элчин сайд, Байнгын төлөөлөгч А.Маршик нар хуралдааныг удирдан явуулж, НҮБ-ын Нэн буурай хөгжилтэй, далайд гарцгүй, арлын жижиг орнуудын асуудал эрхэлсэн Дээд төлөөлөгч, Далайд гарцгүй хөгжиж буй орнуудын асуудлаарх НҮБ-ын Гуравдугаар бага хурлын Ерөнхий нарийн бичгийн дарга Ф.Рабаб, мөн бүлгийн гишүүн, транзит улсын төлөөлөгчид үг хэлэв. Төлөөлөгчид ДГХБО-ын асуудлаарх Венийн үйл ажиллагааны хөтөлбөрийн хэрэгжилтийг бодитой үнэлж, ирэх 10 жилийн төлөвлөгөөг тогтвортой хөгжлийн зорилгын хэрэгжилттэй уялдуулан, шинэлэг хэлбэрээр тодорхойлохын чухлыг онцлон тэмдэглэжээ. Энэ хуралдаанаар НҮБ-ын Гуравдугаар бага хурлын бэлтгэл, зохион байгуулалтын холбоотой баримт бичгүүдийг баталж, бэлтгэл хорооны дараагийн хуралдаануудыг Нью-Йорк хотноо 2024 оны 2 дугаар сарын 5-8-ны өдрүүд болон 4 дүгээр сарын 29-нөөс 5 дугаар сарын нэгний өдрүүдэд зохион байгуулахаар тогтсоныг Гадаад харилцааны яам мэдээллээ.