sonin.mn
Сэтгэгдэл (0)
Ш.Батхүүг луйварчин хэмээн "хамсаатан" нь нотлов уу, гүтгэв үү, гэх асуулт өнөөдөр хариулт нэхсэн хэвээр байна. Тодруулбал, түүнийг Өмнөд Африкийн "Стандарт" банкнаас их хэмжээний мөнгө зээлэхэд нь "Эрдэнэт" үйлдвэрийн зэсийн баяжмалыг барьцаалж, гарын үсгээрээ баталгаажуулж өгсөн гэх мэдээллийг Д.Сугар амь насаараа тангараглан байж үгүйсгэв.
 
Өөрөөр хэлбэл тэрбээр Эрдэнэт үйлдвэрийн захирал Ч.Ганзориг бид хоёр ямар ч тийм зээлийн гэрээнд гарын үсэг зураагүй гэдгийг амьдралаараа батлан тангаргалахад ч бэлэн байна. Тэр бичгийг нь сая үзсэн. 
 
Тэнд "Жаст" группэд дэмжлэг үзүүлэх ёстой гэх маягийн эрүүл ухаанд ч багтамгүй Төрийн албаны наад захын мэдлэггүй хүний эрээчсэн ёстой л галзуу хүний бичгэрхүү юм байсан. Энэ бүх бичиг, баримтыг "Жаст" группийнхэн шинжлэх ухаан хөгжсөн өнөө цагт ямар аргаар хуурамчаар үйлдсэнийг би мэдэхгүй" хэмээн өгүүлжээ. 
 
Үүнээс үзэхэд тэрбээр Ш.Батхүүг нэг мөсөн "дуусгахаар" шийдсэн бололтой. Түүнчлэн түүний дээрх мэдэгдлээс Ш.Батхүүгийн зээлийн тухай дахин нэг сэжүүр илэрч байгаа юм. Үүнийг сийрүүлбэл "Стандарт" банкнаас мөнгө зээлсэн олон удаагийн үйлдлийн он цагийг харах хэрэгтэй болж байна. 
 
Тэрбээр "Стандарт" банкнаас хамгийн эхний зээлээ 2008 онд авсан байдаг. Харин зээл авах шалтгаан нь 2007 оноос үүдэлтэй аж. Тодруулбал, Улаанбаатар төмөр зам санхүүгийн хүндрэлд орж, "Эрдэнэт"-ийн зэсийн баяжмалыг зөөх асуудал гацаанд орсон байна.
 
Энэхүү байдлыг овжин ашиглаж Ш.Батхүү хэн хэндээ хохиролгүй бизнес санаа дэвшүүлсэн нь "Жаст" группийн гэрээг "Эрдэнэт"-д барьцаа болгож, хариуд нь "Эрдэнэт"-ийн баяжмалыг "Стандарт" банкинд барьцаа болгох санал байж. Улмаар "Жаст" групп 20 сая ам.долларыг зээлж хэн хэндээ ашигтай наймаа хийж чадсан байх юм.
 
Өнөөдрийн байдлаар Ш.Батхүү ч, Д.Сугар ч энэхүү мөнгийг бүрэн төлж дуусгасан гэдгийг нотолж байна. Энэ утгаараа ч өөрсдийгөө ямар нэг хууль, дүрэм зөрчөөгүй хэмээн цээж тэнэгэр өгүүлж сууна. Хэдийгээр эрсдэл гараагүй ч улсын үйлдвэрийг хувийн компанийн зээлийн барьцаа болгосон нь "эрсдэл гараагүй" хэмээгээд өнгөрөөж үл болох
асуудал юм. 
 
Харин хоёрдугаарт, Ш.Батхүүгийн авсан дараагийн зээлийн батлан даалтыг хэн гаргасан бэ, гэх асуулт. Түүний өөрийнх нь өгүүлж буйгаар "Стандарт" банкинд төлж барагдуулаагүй 120 сая ам.доллар байгаа гэнэ. Эхний зээлээ авахдаа улсын хэмжээний үйлдвэрийг барьцаа болгосон мань хүн дараагийн зээлээ "Жаст"-аа барьцаалаад авсан нь юу л бол. 
 
Тиймээс түүнийг батлан даах том компани хэрэгтэй, яг "Эрдэнэт" шиг. Нөгөөтэйгүүр, Д.Сугар "Энэ бол Монгол Улсыг төдийгөөс өдий хүртэл тэжээсээр ирсэн "Эрдэнэт" хэмээх аварга том үйлдвэрийн хувь заяатай холбоотой асуудал болохоор үнэхээр сэтгэл зовж байна. 
 
Эцсийн эцэст ийм булай хуурамч бичиг баримт бүрдүүлсэн тэр газар нь энэ асуудлаа бүрэн хариуцаж, улсыг хохиролгүй болгох ёстой" хэмээн хэлсэн байна. Тиймээс Ш.Батхүү дараагийн зээлээ эхний батлан даалтын барьцаагаар үргэлжлүүлж авсан байж болох талтай. Үгүй бол Д.Сугар гэх эрхэм ингэтлээ сүйд болж, бухимдаж явах хүн биш. 
 
Олон янзын асуудалд орооцолдож байсан ч олны өмнө цухуйж байгаагүй мань хүн баттай юман дээр л барьц алдсан байх учиртай. Тиймээс Д.Сугар нэг бол Ш.Батхүүг түлхэж, өөрийнхөө батлан даалтыг нуун дарагдуулсан.
 
Эсвэл Ш.Батхүү үнэхээр дараа дараагийн зээлээ хуурамч баримт бүрдүүлж, "Эрдэнэт" үйлдвэрийн зэсийн баяжмалыг барьцаалсан болж таарна. Юутай ч, өнгөрсөн долоо хоногийн дуулиан шуугианы эзэд бие биенийхээ эсрэг ноцож эхэлсэн нь баттай болов.
 
 
 
Ш.Батхүү:
 
Манай групп "Эрдэнэт" үйлдвэрт шатахуун нийлүүлэх гэх мэт маш олон төрлийн үйлчилгээ үзүүлдэг. 1997 оноос хойш найдвартай хамтарч ажилласан учраас баталгаа гаргаж өгсөн. Би 2008 оны үйл явдлыг ярьж байна. Төрийн өмчийн хорооны дарга Д. Сугар баталгаа гаргаж өгөх боломжтой гэсэн цохолт хийж өгсөн.
 
Үүнээс хойш "Стандарт" банкнаас хэд хэдэн удаа зээл авсан. Бид сүүлд авсан зээлээ зориулалтын дагуу ашиглаагүй нь буруутай... "Стандарт" банкны 120 сая ам.долларын зээл үлдэж байгаа. Энэ мөнгийг төлөх үүрэг надад оногдоно.
 
 
 
Д.Сугар:
 
Хамтарсан үйлдвэрийн совет хяналт тавьж, ТӨХ-оор хэлэлцэгдээд энэ гэрээ 2008 онд хэрэгжиж 20 сая ам.доллараа бүрэн төлж барагдуулсан. Тухайн үедээ "Эрдэнэт" үйлдвэр, Улаанбаатар төмөр зам, "Жаст" групп бүгд л энэ гэрээнээс тодорхой ашиг хүртсэн.
 
Ер нь томоохон аж ахуйн нэгжүүдийн дунд энэ зэргийн харилцаа бол байдаг л юм. "Жаст"-ын Ш.Батхүү хэвлэлийн бага хурал дээр мэдэгдэхдээ 2007 оны энэ процессыг 2009 онд "Стандарт" банктай байгуулсан луйврын шинжтэй гэрээтэйгээ холбогдуулах гэж оролдож байна лээ.
 
 
Б.Ширнэн
 
Эх сурвалж: