sonin.mn
Сэтгэгдэл (0)
Өдийгөөс төдий хүртэл эв эрүүл, сав саруул байсан иргэн эрүүгийн хуультай зууралдаад л өвдчихдөг мода энэ зун дэлгэрлээ. Өөрөөр хэлбэл, төрийн өндөр, дээд албан тушаал хашиж байсан эрхмүүд хууль, хяналтын байгууллагаар шалгагдаж эхлэх даруйдаа шалтаг хайж ёолдог болов.
 
Юу нь өвдсөн юм бүү мэд. Юутай ч, эрүүгийн хуулийг эрүүл мэндийн актаар хөөрхөн гэгч нь дөнгөлчихдөг боллоо. Тиймээс тэдэнд оноосон ял нь ямба болж хийсэн хэргийнхээ горийг шоронд биш эмнэлэгт өнгөрөөх нь олонтаа болж дээ. Үүнээс үүдээд, эрх мэдэлтнүүдийн дунд ч өвчлөх мода их л өргөн тархсан байна.
 
Үүнд нь Ё.Отгонбаяр гишүүн ч нэрвэгдэж амжжээ. Тодруулбал, тэрбээр хоолны хордлого гэсэн оноштойгоор Сайд нарын II эмнэлэгт хүргэгдсэн байна. Хэвтэх, хэвтэхдээ экс ерөнхийлөгч, Н.Энхбаярын хажуу өрөөнд эмчлүүлж байгаа сурагтай.
 
Гэтэл эгэл жирийн ажилчин бид хоолны хордлогоор эмнэлэгт хэвтэх байтугай эмчид үзүүлэх хувь тохиодоггүй нь харамсалтай. Аа гэхдээ, хар захаас хүнсээ цуглуулдаггүй атлаа хоолондоо хордчихсон Ё.Отгонбаяр бүр ч харамсалтай юм шигээ.
 
Гэхдээ түүний дээрх онош үнэн, худал нь одоогоор тодорхойгүй. Нэрэн дээрээ өвдсөн гэж байгаа ч нидэр дээрээ чухам юу сэтгэж байгааг таамаглах аргагүй. Улс төрийн ууган хүчинд хамтдаа зүтгэж явсны хувьд Н.Энхбаяр, Ё.Отгонбаяр нарын хооронд нандин холбоо байдаг талтай.
 
Сайд байх цагтаа эскийн хүн хэмээгдэж байсан тэрбээр өнгөрсөн дөрөвдүгээр сард буюу МАН-ын удирдах зөвлөл хуралдсаны дараагаар Н.Энхбаярыг их л дотно эргэж байсан санагдана. Юутай ч тэд дахиад л энэ эмнэлэгтээ өвчтөн нэрээр учран золгоод авлаа.
 
Ирээдүйд харин сэжигтэн Ё.Отгонбаяр төрийн өмнөөс "аавынд" шийтгүүлж экс эрхэмтэй дахиад л таарахгүй гэх баталгаагүй. Түүний үйлдсэн гэх хэргийг товчлон сануулбал, тэрбээр Налайх дүүргийн харьяат, "Тавин лан" компанийн захирал Х.Цогнойжамцыг дарамтлан "Ланд круйзер-200" маркийн автомашиныг нь дээрэмдэж, хахууль авахыг завдсан хэргийг захиалсан хэмээн буруутгаж байгаа.
 
Түүнчлэн түүнийг Боловсрол, шинжлэх ухааны сайд байх цагт явагдсан хэд хэдэн тендерийг хууль, хяналтын байгууллагаас шалгаж эхэлсэн талаарх мэдээлэл ч гараад байна.
 
Харин түүний гэргий О.Эрдэнэсолонгын хэргийг аваал нөхөртэй нь хамтатган шалгах болсон талаарх мэдээллийг энэ сарын эхээр Авлигатай тэмцэх газраас өгсөн байдаг. Одоогоор тэдний хэргийг Улсын мөрдөн байцаах газарт шилжүүлэн шалгаж байгаа ч хэрэг бүртгэлийн явц удаашрах шатандаа орчихов.
 
Хэн ямар тушаа тавьчихсан юм бүү мэд, тэдний хэргийг хэтэрхий удаан шийдэж байгааг хүн бүр гайхаж байна. Магадгүй, түүний эхнэр О.Эрдэнэсолонгын толгой эргэм данс нь төөрч будлихаар их хэмжээний мөнгө агуулж байгаа гэх нь баттай мэдээлэл ч байж болох.
 
Түүнд холбогдох хэрэг үүсэх үеэр О.Эрдэнэсолонго нь дөрвөн банкин дахь өөрийн эзэмшлийн 10 гаруй дансанд их хэмжээний мөнгө байршуулан угаасан байж болзошгүй гэгдэж байсан ч өнөөдрийн байдлаар "Төрийн банк" буюу хуучнаар "Зоос", "Анод", "Улаанбаатар", "Голомт" банкинд 26 данстай гэгдэж байна.
 
Түүний ганцхан дансан дахь гүйлгээг шалгахад л 80-420 сая төгрөг ойр ойрхон шилждэг байсан байгаа юм. Харин Ё.Отгонбаяр эхэндээ энэ дансыг мэдэхгүй хэмээн мэлэрч гайхаад байсан ч эхнэрийнхээ хамсаатан, хүний машиныг дээрэмдсэн хулигаан болж таарсан.
 
Юутай ч, удаашралтай байсан түүний хэрэг хоолны хордлогоос болж дахиад л саатах нь бололтой. Гэхдээ үнэхээр хоолонд хордсон уу, хор найруулах гэсэн үү, гэдгийг хуулийнхан ажиглаж л байхад гэмгүй байх.
 
 
А.Чилүгэн
 
Эх сурвалж: