sonin.mn
Сэтгэгдэл (0)

SpaceX компани IPO гаргасны дараа анхны удаа улирлын ашиг олсон талаар тайландаа дурдсаны дараа Илон Маск ярихдаа, SpaceX ба Tesla компаниуд нэгдэх боломжийг үгүйсгэсэнгүй.  


Энэ талаарх шинжээчдийн асуултад тэрбээр хариулахдаа “минатай талбайд чечётка бүжиглэж байгаа” мэт мэдрэмж өөрт нь төрснийг дурдаад, гэхдээ энэ бол “маш зөв санаа” гэлээ. Ийм тайлбар хийсний дараа биржээс гадуурх арилжааны явцад SpaceX-ийн хувьцааны ханш 5 орчим хувиар өссөн байна.


Түүний ярьснаар, хоёр компанийн хувьцаа эзэмшигчдийн хүсэлтийн дагуу нэгдэх асуудлыг судлах бие даасан захирлуудын тусгай хороодыг байгуулжээ. Харин ашиг сонирхлын зөрчил үүсэх учраас Маск өөрөө хэлэлцүүлэгт оролцохгүй гэнэ. Тэрбээр хоёр компанийг удирдахын зэрэгцээ SpaceX компанийн ТУЗ-ийн дарга, техникийн захирлын үүргийг гүйцэтгэдэг. Зургаадугаар сарын 30-ны байдлаар Маск SpaceX-ийн хувьцааны 48.4 хувийг, Tesla-гийн хувьцааны 20 орчим хувийг эзэмшиж байв.


Дээрх хороод хоёр компанийг нэгтгэх хэлцлийн нөхцлүүдийг зөвшилцөөгүй байгаа бөгөөд заавал нэгдэнэ гэсэн баталгаа байхгүй гэдгийг Маск санууллаа.


Үүний сацуу хоёр компани хиймэл оюунд зориулсан программ хангаж, чип, роботехник, сансрын тооцоолон бодох хүчин чадал зэрэг салбарт нягт хамтран ажиллах нь илүү ашигтай байх боломжтой гэдгийг Маск онцолсон байна. 6 дугаар сараас 9 дүгээр сар хүртэлх хугацаанд SpaceX компани 4.4 тэрбум долларын цэвэр ашигтай ажиллаж, 14.6 тэрбумын орлого олсоныг тайланд дурдсаны дараа тэрбээр дээрх мэдэгдлийг хийлээ. Гэтэл жилийн өмнө 1.1 тэрбум долларын алдагдал хүлээж байжээ. Тус компани 6 дугаар сард IPO хийж, нэгж хувьцааг 135 доллароор худалдсанаар 85.7 тэрбум доллар босгосон юм. 



Б.Адъяахүү