Уул Уурхай, Хүнд Үйлдвэрийн Сайд Г.Ёндон сайдаар томилогдохоос өмнө буюу 2019 онд "Монголросцветмент" Төрийн Өмчийн Үйлдвэрийн Газрын Орлогч Захирлаар ажиллаж байх үедээ хоёр хүүхдийнхээ сургалтын төлбөр болох 10.7 сая төгрөгийг төрийн өмчийн үйлдвэрийн газраас "Гёте" дунд сургууль руу шилжүүлсэн нь баримтаар ил болсон билээ.
Г.Ёндон сайд энэ тухай: "Би буруу зүйл хийсэн гэж бодохгүй байна."Монголросцветмет" Төрийн Өмчит Улсын Үйлдвэрийн Газар нь улсын төсөвтэй хамаагүй, ашгийн төлөө аж ахуйн нэгж. Иймээс ч тус  компанид 10 гаруй жилийн өмнөөс хэрэгжиж байгаа журам бий.Уг  журмаар компанийн гүйцэтгэх удирдлагыг урамшуулах, сургалтын төлбөрийн хөнгөлөлт эдлүүлэх гэсэн заалттай. Гэхдээ компани ашиггүй ажиллах үед хөнгөлөлт олгодоггүй. 
Миний хувьд "Монголросцветмет" компанид 2018 оноос гэрээ байгуулан ажилласан бөгөөд тус компани 2019 онд 34.8 тэрбум төгрөгийн борлуулалт хийн, түүхэндээ хамгийн өндөр ашигтай ажилласан. Иймээс ч хөдөлмөрийн гэрээ болон компанийн журмын дагуу урамшуулал авсан. Хүүхдийнхээ сургалтын төлбөрийг төлүүлсэн нь үнэн" хэмээн тайлбарласан юм.
 
Үүнтэй холбоотойгоор МАН-ын нэр бүхий гишүүд Уул Уурхай, Хүнд Үйлдвэрийн Сайд Г.Ёндонг огцруулах асуудлыг дэвшүүлэн тавьж эхлээд байна. Гэхдээ Г.Ёндон нь МАН-ын гишүүн биш тул намын зүгээс ёс зүйн хариуцлага тооцох боломж хязгаарлагдмал аж. 
 
Мөн шинээр хэрэгжиж эхэлсэн Үндсэн хуулийн нэмэлт, өөрчлөлтийн дагуу Засгийн газрын гишүүн-Монгол Улсын Сайд нарыг гагцхүү Ерөнхий сайд нэр дэвшүүлж, томилж, чөлөөлдөг болсон. 
Иймээс ч Уул Уурхай, Хүнд Үйлдвэрийн Сайд Г.Ёндонд хариуцлага тооцох бүх эрх ганцхан Монгол Улсын Ерөнхий Сайд, Монгол Ардын Намын Дарга У.Хүрэлсүхэд байгаа юм.
Нөгөөтэйгүүр "сахилга хариуцлага, дэг журам" ярих дуртай Ерөнхий Сайд У.Хүрэлсүхийн яриа үнэн бодитой эсэхийг шалгах нэг хэмжүүр нь Г.Ёндонгийн асуудлыг хэрхэн шийдвэрлэхээс харагдаж ч мэднэ.
 
Э.Мягмар