Баянзүрх дүүргийн IV хороонд газрын төлөөх ээлжит “дайн” дэгдлээ. Ийм төрлийн үл ойлголцол нийслэлд байсхийгээд гардаг ч ихэвчлэн оршин суугчид ялагдал хүлээн хохирч үлддэг.
Энэ удаа ч мөнөөх “бичигдээгүй хууль” үйлчиллээ. “Энэ дайн ганцхан өчигдөр өрнөсөн үйл явдал биш” гэдгийг тэр хавийн оршин суугчид гэрчилж байгаа. Чухам юунаас болж барилгын компанийнхан болон иргэдийн дунд үл ойлголцол үүссэнийг харахаар Баянзүрх дүүргийн IV хорооны дөрөвдүгээр байрны хойд талд сүндэрлэж байгаа 10 давхар орон сууцны барилгын талбайд очлоо.
Биднийг очиход тус дүүргийн оршин суугчдын төлөөлөл болон хорооны Засаг дарга Д.Оюунтуяа нар тэнд оччихсон байв. Ганц нэг телевизийн сэтгүүлч, операторууд Засаг даргын хамт очсон байхыг барилгын ажилчид нь хараад, барилга дээрээс “Муу п.... минь, битгий хүний бөгс ухаад бай” гэх мэтээр хорооны Засаг дарга руу орилолдож байлаа.
Энэ барилгыг “Мон Хаус” компанийн захиалгаар “Меррор Тауэр” компани гүйцэтгэж байгаа аж. Эдгээр компанийн аль аль нь монгол эзэн, монгол ажилчинтай юм билээ. Өнгөрсөн хавраас эхлэн барилгын ажлаа эхлүүлсэн уг компанийн үйл ажиллагааг тэр хавийн оршин суугчид анхнаасаа л эсэргүүцэж байсан ч хүчин мөхөстсөн тухайгаа хэлж байсан.
Барилгын компанийнхан шөнөөр ирж нүх ухан, хундаамаа цутгасан гэнэ. Иргэдийн автомашины зогсоолыг булаасан энэ компанийн албан ёсны зөвшөөрлийг үзье, барилгын инженер болон эзэдтэй нь уулзъя хэмээн хорооны Засаг дарга нь удаа дараа хүсэлт тавьж, шаардлага хүргүүлсэн ч өнөөг хүртэл тусыг эс олсон аж.
Бараагаа ч харуулдаггүй эзэдтэй энэ барилгын компанийнхан хундаамаа цутгасныхаа дараа оршин суугчдад “Долоон давхар орон сууцны барилга барина. Түүнийхээ нэг, хоёрдугаар давхрыг цэцэрлэг болгож, хорооныхоо хүүхдүүдийг бүртгэж авна” хэмээн чихэн дээр нь цэцэг ургуулжээ.
Гэтэл одоо долоо биш, 10 давхар барилга барьчихаад, доод талд нь хувийн цэцэрлэг ажиллуулахаар ярьж байгаа аж. Энэ нь амьдарч буй орчноо сүйтгүүлж, амар амгалан байдлыг мэдрээгүй хэдэн сар болсон оршин суугчдын ундууцлыг улам бүр хүргэсэн бололтой.
Өчигдрийн байдлаар 10 давхар болж сүндэрлэсэн барилгын тал бүрт нь гарч харахад автозогсоол, хүүхдийн тоглоомын талбай, ногоон байгууламжгүй барилга болох дүр зурагтай байв. Хэний ч нүднээ ил ийм газарт зөвшөөрөл олгож байгаа мэргэжилтнүүд нь газар дээр нь ирж хардаггүй л юм байх даа. Уг нь Нийслэлийн ерөнхий төлөвлөгөөний газар хэмээх байгууллага энэ асуудлыг шийдэж, зохицуулдаг баймаар юм.
Юутай ч хорооны Засаг дарга, оршин суугчдын үгийг үл тоон үйл ажиллагаа явуулж байгаа энэ барилгын нууц ноёнтон нь хэн бэ, албан ёсны зөвшөөрөлтэй эсэхийг нь сонирхохоор барилгын талбай руу ороход, “Талбай хариуцсан инженер гадуур ажилтай яваа. Энэ хүнтэй л ярь. Утасны дугаар нь 966372.., өөр дугаар байхгүй” гэх үгийг бараг хүн бүр тоть шиг давтаж байв.
Барилгын компаниас мэдээлэл авч чадаагүй учраас оршин суугчдын болон хорооны Засаг даргын байр суурийг сонссон юм.
Ийм газарт зөвшөөрөл олгодог дарга нарт хариуцлага тооцох хэрэгтэй
-Барилга баригдсан энэ газарт өмнө нь автозогсоол байсан гэлээ. Ямар зориулалтаар барилга барина гэж “Мон Хаус” компанийнхан иргэдтэй тохиролцсон юм бэ?
-Энэ газрыг одоогоос дөрвөн жилийн өмнөөс эхлэн зогсоолын зориулалттай ашиглаж байсан. Гэтэл өнгөрсөн хавраас эхлэн суурийг нь тавьж, барилга угсралтын ажил явагдаж эхэлсэн. Барилгын үйл ажиллагаа эхэлсэн цагаас эхлэн энэ барилгын компанийн нөхөдтэй уулзах гэж удаа дараа шаардах болон мэдэгдэх хуудас өгсөн боловч өнөөдрийг хүртэл ямар хүмүүс байдгийг нь ч харж чадаагүй. Ингэнэ тэгнэ гэж иргэдтэй тохирсон зүйл байхгүй.
Энэ хугацаанд иргэдээс нэг ч удаа санал хүсэлтийг нь сонсоогүй шууд үйл ажиллагаагаа эхлүүлсэн гэдэг нь өөрөө хууль зөрчсөн үйлдэл. Яагаад гэвэл Нийслэлийн иргэдийн төлөөлөгчдийн хурлаас Барилгын ажлыг эхлүүлэх, ашиглалтад оруулах үйл ажиллагаатай холбоотой журмыг энэ оны дөрөвдүгээр сарын 10-нд баталсан шүү дээ.
Гэтэл энэ компанийн барилгын ажил эхлүүлэх зөвшөөрөл нь дөрөвдүгээр сарын 28-нд гарсан байдаг. Энэ журманд 30х30 метр тутмын оршин суугчдын оролцоог хангаж, саналыг нь авах ёстой. Ингэсний эцэст барилгын үйл ажиллагаа явуулах зөвшөөрөл авах ёстой байсан. Гэтэл ажлаа эхлүүлэхдээ иргэд, оршин суугчдын саналыг огт сонсоогүй.
Мөн дулааны шугам сүлжээ, цахилгаан түгээх сүлжээ компанийн техникийн нөхцөлүүд нь дандаа хугацаа дууссан байгаа. Хугацаа дууссан техникийн нөхцөлд үндэслэн барилгын ажлыг эхлүүлэх, үргэлжлүүлэх зөвшөөрлийг Нийслэлийн ерөнхий төлөвлөгөөний газрын Хот байгуулалт, дэд бүтцийн хяналтын албаны дарга Т.Эрдэнэтуяа олгосон байгаа юм.
Ингэж хууль зөрчиж, зөвшөөрөл авчихаад шөнө оройн цагаар барилга угсралтын ажлаа хийж, иргэдийн амар амгалан байдлыг алдагдуулж байна. Энэ мэтээр дураараа дургиж, дунд чөмгөөрөө жиргэн байж барьсан барилга нь ашиглалтад орсон хойноо ч оршин суугчдын тав тухыг хангахуйц барилга болохгүй нь хэнд ч илт. Машины зогсоол, хүүхэд хөгшдийн нарлах талбай бүү хэл, явган хүний зам ч үгүй нь харагдаж байгаа биз дээ.
-Албан ёсны газрын зөвшөөрөлтэй юм болов уу?
-Таван жилийн хугацаатайгаар 2012 онд авсан 20х20 метр буюу 400 ам метр талбайн зөвшөөрөлтэй. Гэтэл 16х16 ам метр талбайд нь эд нар барилгаа барьчихсан. Тэгэхээр хаана нь ногоон байгууламж, автозогсоол байх нь бүрхэг.
Үндсэндээ хүний тухтай амьдрах боломжийг хангаж чадахгүй орон сууц болох нь тодорхой байна. Хүний амьдрах орчныг бүрэн цогцлоож чадахгүй ийм газарт зөвшөөрөл олгож л байдаг.
Бидний амар амгалан байдлыг байнга эвддэг
Ж.Цэрэнпил Баянзүрх дүүргийн IV хорооны иргэн
Бид энд барилга барихад дургүй байсан. Гэхдээ шөнө ирээд газрыг нь ухчихсан байсан. Энд долоон давхар барилга барих гэж байна. Түүнийхээ доод талын хоёр давхарт цэцэрлэг барих гэж байгаа гэж хэлсэн. Үнэн бол сайхан л юм гэж бодож байтал саяхнаас хувийн цэцэрлэг гэнэ гэх яриа тархаад байна. Иргэдтэй гэрээ ч хийгээгүй байж барилгын ажлаа эхлүүлчихээд, сүүлд нь ингэж хуурч болохгүй биз дээ. Түүнээс гадна дандаа шөнө оройгоор, эсвэл амралтын өдрөөр маш их дуу чимээ гаргадаг. Манай байрнууд чинь хуучных учраас ахмадууд голдуу байдаг. Гэтэл биднийг хүндэтгэх хэрэгтэй шүү дээ. Харин ч бас сүүлийн үед чимээ нь арай л багасаад байна. Түүнээс биш, хэцүү байсан шүү.
Зөвшөөрлийг нь шалгахад техникийн нөхцөл нь хугацаа хэтэрсэн байсан
Иргэдийн амьдрах орчныг бүрэн эвдэж байна шүү дээ. Хуучин автозогсоол байхад машинаа тавьдаг байсан иргэдийн эрхийг зөрчөөд одоо бас бус хүмүүсийн эрх ашгийн зөрчиж байна. Ийм газарт зөвшөөрөл олгодог мэргэжлийн байгууллагуудыг л буруутгамаар байна.
Албан ёсны зөвшөөрлөө шалгуул гэхээр юм үзүүлэхгүй байсан. Өнгөрсөн ням гарагт хорооны Засаг дарга, оршин суугчдын төлөөлөл нийлж, цагдаагийн хүч ашиглан байж зөвшөөрлүүдийг нь үзсэн. Гэтэл техникийн нөхцөл нь хугацаа хэтэрсэн гэх мэт зөрчил илэрсэн. Оршин суугчдыг дээрэлхсэн иймэрхүү үйлдэл удаа дараа гардаг боллоо. Үүнийг болиулах хэрэгтэй шүү дээ.
М.Уянга
Эх сурвалж:
Сэтгэгдэл0