Хотын удирдлагуудын анхаарлыг хамгийн ихээр татаж, шагнал урамшууллын хур буусан салбар бол нийтийн тээвэр.  Тус сал­барынхны үзэж буйгаар тээврийн хэрэгслийнх нь өнгө үзэмж сайжирч, кондуктор, жолооч нарын зан харьцаа өмнө нь байгаагүйгээр өөрч­­лөгдсөнөөс ийнхүү шаг­налдаа даруулсан гэнэ.

Харамсалтай нь энэ бү­хэн цаасан дээр хэрэгжсэн хий хоосон зүйл бололтой. Бодит байдал дээр нийтийн тээврийн үйлчилгээ туйлын хангалтгүй байгаа нь бүгдэд ил байна.  Тухайлбал, авто­бус хоорондын эргэлтийн  хуга­цааг дагаж мөрддөг нийтийн тээврийн чиглэл үгүй аж.

Иргэдэд үйлчилж, чиг­лэлийн шугамд хамаарах автобусны зорчих эргэлтийн хугацаа, хоорондын ца­гийг нарийвчлан гар­гаж, тогтоосон байдаг аж.  Тод­руулбал, автобус хоо­рондын хүлээлтийн дундаж хугацаа 7-8, алслагдмал дүүрэг, хо­роодод 30 минут байх ёс­той гэнэ. Үүнийг нийтийн тээврийн үйлчилгээ эрхэлдэг аж ахуйн нэгжүүд мөрдөх учиртай.

Гэтэл үүнийг удаа да­раалан зөрчиж, иргэдийг хохироож буй том оврын автобусны талаар гомдол бидэнд  ирсэн юм. Энэхүү мэдээллийг лавлаж үзвэл “ДЮЦ” компанийн “Монел-Офецеруудын ордон-Сансар-56A”, “Мо­нел-100 айл-МУИС”, “Мо­нел-13 дугаар хороолол-56Б” чиглэлийн автобус иргэдэд үнэ­хээр чирэгдэл учруулдаг болох нь тогтоогдсон байна.

Уг нь, нийтийн тээврийн газартай байгуулсан гэрээ ёсоор бол 56А буюу “Монел- Офецеруудын ордон-Сансар” чиглэлд өдөрт тав, 56Б буюу “Монел-100 айл-МУИС-100 айл” чиглэлд найман авто­бус үйлчилгээнд гарах графиктай аж. Түүгээр ч зогсохгүй автобус хоорондын хүлээлтийн хугацаа нь 9-10 минут байхаар тогтжээ.

Өөрөөр хэлбэл, дээрх чиглэлүүдэд тус компаниас 13 автобус явдаг гэсэн үг. Гэтэл хүйтний эрч чангарч, ес эхэлсэн энэ үед автобус ирэхийг хүлээн, дор хаяж 30 минут зогсож байна.

Зөвхөн энэ чиглэлийн автобус ч биш, бусад чиглэлд ч хүлээлтийн хугацаа 20, цаашилбал 30, 40 минут болжээ. Чиглэл бүрт автобусны тоо хангалттай бус ч гэлээ эргэлтийн цагаа бариад, түргэн шуурхай үйлчилбэл иргэд гар, хөлөө хөлдөөх шахам буудал дээр дэвхцэж зогсох эмгэнэлтэй дүр зураг арилахсан.

Гэтэл албаныхан эл асуудлыг харсан ч хараагүй мэт дүр эсгэж, шагнаж урам­шуулахаа л бодож суу­на. Харин бодит байдал ямар байгаа талаар иргэдээс тод­руулснаа хүргэе.

 

Хүлээхээс өөр сонголтгүй юм даа

МУИС-ийн автобусны буу­дал дээр “Монел-100 айл-МУИС-100 айл-XIII хороолол” чиг­лэлийн автобус хүлээн зог­сох Сүхбаатар дүүргийн зургаадугаар хорооны иргэн Б.Нямцогт “Автобусаа хү­лээн  20 орчим минут зогсож байна. Энэ чиглэлд зөвхөн 56Б автобус л явдаг юм. Даанч ирнэ гэж байхгүй. Өвлийн хүйтэнд алхалтай биш” гэсэн юм. Иргэн Б.Нямцогтын хүлээсэн авто­бус удахгүй ирсэн. Харин түүний суусан автобус хө­дөлсөн цагаас дараагийн автобус ирэх хүртэлх хугацаа 30 минут байлаа.

 

Троллейбус удаан явдаг ч цагтаа ирдэг

 Сонгинохайрхан дүүр­гийн иргэн О.Буян “Автобус хоорондын хүлээлтийн ху­га­цаа хэрээс хэтэрлээ. Би “Таван шар” чиглэлийн автобус хүлээж,45 минут зогсож байна. Тэсгэм хүй­тэнд автобус хүлээснээс гар, хуруу хайрагдаж, эрүүл мэндээрээ ч хохирох тохиолдол байна шүү дээ. Жилийн аль ч улиралд энэ явдал байнга давтагддаг. Ямар нэг зохицуулалт хий­хийг хүлээсээр цөхөрлөө.

Нэгдүгээр эгнээгээр авто­бус явуулдаг болсон нь сайшаалтай. Гэвч Яармаг, Нисэх, Чулуун-Овоо, Таван шар зэрэг алслагдмал газ­руудад автобусны хүрэлцээ муу, хүлээлт их байдаг. Ми­ний бодлоор чиглэл бүрт троллейбус явуулмаар са­нагддаг. Удаан гэж шүүм­жилдэг троллейбус харин ч цагтаа ирдэг шүү” гэлээ.  

 

Хяналтад өртдөггүй цагийн хуваарь

Иргэдийг өдөр бүр хү­лээлгэсэн тохиолдол гарсаар байхад бурууг замын түгж­рэл, хальтиргаа руу чихэж, салбарынхаа нэрийг цэвэрхэн аваад үлдчихдэг, нийтийн тээврийнхэн, энэ удаа ч мөн адилхан хандаж байна.

Нийтийн тээврийн дис­петчерийн албаны дарга Г.Доржпалам энэ талаар “Бүх автобус өөрийн чиг­лэлдээ тогтсон цагийн ху­ваарийн дагуу явж байна. Үүнийг Замын удирдлагын төв, Авто тээврийн хянал­тын улсын байцаагчид байн­га хянадаг. Хэдийгээр автобусууд тогтсон цагтаа хөдөллөө ч гаднаас нөлөөлж буй шалтгаануудаас болж хоцрох, хүлээлт үүсгэх нь ажиглагддаг. Тийм то­хиолдолд авах арга хэмжээ алга.

Үнэхээр тухайн аж ахуйн нэгж 10 автобус гаргах байснаа тавыг явуулсан, эсвэл бүрэн биш тээврийн хэрэгслээр хөдөлгөөнд оролцсоноос гэмтэл гарч, хү­­лээлт үүссэн бол авто тээв­рийн тухай хуулийн дагуу торгох, цаашилбал хамтран ажиллах гэрээг цуцлах хүртэл арга хэмжээ авна” гэсэн юм.

Тэгвэл яг адилхан түгж­рэлтэй, хальтиргаатай за­маар зорчиж байгаа бага оврын автобус буюу мик­ро автобуснууд хүлээлт үүс­гэхгүй иргэдэд үйлчилдэг байна. Одоогоор нийс­лэлийн хэмжээнд бага оврын 226 микро автобус 24 чиглэлд зорчих эрх авч, гэрээ байгуулжээ. Үнэ төлбөрийн хувьд арай илүү ч хэзээ ирэх нь тодорхойгүй том оврын автобусыг хүлээж, хайран цагаа барж, даарч зогссоноос л дээр гэж иргэд үздэг.

Түүнчлэн үйлчилгээ сайжирсан гэх том оврын автобусандаа тавих анхаарлаа сайжруулж, тогтсон цагтаа хуваарийн дагуу үйлчилдэг болгомоор байна. Хэдий болтол өвөлд нь хальтиргаа гулгаанаас, дулааны улиралд зам засвараас боллоо хэмээн түмэн янзын шалтаг тоочиж хариуцлагаас мултрах вэ.

Үнэхээр тэргүүний, шил­дэг эсэхийг нь иргэд дүгнэдэг. Тэд зохих дүнгээ ч өгөөд эхэлчихэж. Тиймээс эл асуудлыг хотын удирдлагууд анхааралдаа авч, иргэдэд чирэгдэл учруулдаггүй жинхэнэ шилдэг нийтийн тээврийг бий болгох цаг болжээ.

Эх сурвалж: "Өглөөний сонин"