sonin.mn
Сэтгэгдэл (0)
Монгол Улсын Ерөнхийлөгч Ц.Элбэгдорж 2014 оны 01 тоот зарлигаа өнгөрсөн лхагва гарагт гаргаж төрийг хэмнэлттэй, үр ашигтай горимд шилжүүлж эдийн засгийн харилцаанд иргэдтэйгээ ижил тэгш оролцох, тэдэнд тулгардаг бэрхшээлийг нэгэн адил үүрэх, улмаар энэ нь төрийн бодлогод нөлөөлдөг байх нөхцөл бололцоог бүрдүүлэхийг Засгийн газар, Улаанбаатар хотын удирдлагад чиглэл болгосон билээ.
 
Энэ зарлигийн хүрээнд Засгийн газрын зүүн талд буюу Улаанбаатар хотын төвд хашаагаар хүрээлүүлэн 10 гаруй жил балгаслан дүнхийж байгаа хуучин хэвлэх үйлдвэр буюу «Улаанбаатар таймс» сонины байрыг нурааж, буурин дээр нь 20-оос дээш давхартай орчин үеийн барилга барих үүргийг Ерөнхий сайд Н.Алтанхуяг, Улаанбаатар хотын захирагч Э.Бат-Үүл хоёрт үүрэг болгосон.
 
Хэдийгээр улаанбаатарчуудын ихэнх нь хотын яг төв дунд хэн ч халдаж зүрхлэхгүй олон жил дүнхийсээр байгаа энэ балгасын эзэн нь экс Ерөнхийлөгч Н.Энхбаяр болохоор л өнөөдрийг хүртэл хашаа, хамгаалалттай оршсоор байгаа гэдэг ойлголт байдаг ч үнэн хэрэгтээ шүүхийн шийдвэр гарч Нийслэлийн өмчид буцаагаад авчихсан учир Ерөнхийлөгч Ц.Элбэгдоржийн санаачлан хэрэгжүүлж эхлээд байгаа «Том төрөөс ухаалаг төр рүү» шилжих шилжилтийн төв цэг болоод байгаа юм.
 
Энэ нь ч ихээхэн учир шалтгаантай. Үндэсний аюулгүй байдал, нууцын зэрэглэлтэй материалтай харилцдаг онцгой нөхцөл байдлыг нь харгалзан үзэж Батлан хамгаалах яам, Гадаад харилwааны яамыг хуучин байранд нь үлдээж бусад яамдыг одоогийн балгасын суурин дээр баригдах 20 гаруй давхар орчин үеийн шаардлагад нийцсэн шинэ барилгад Монгол Улс оруулбал жинхэнэ горимд шилжих болно.
 
Засгийн газрын ордноос 100 хүрэхгүй метрт орчин үеийн мэдээлэл технологийн хамгийн сүүлийн үеийн хүчин чадлаар тоноглогдсон барилга барьж газар доогуур хооронд нь холбочихвол асар их хэмнэлт гарах нь тодорхой.
 
Өнөөдөр 16 яаманд албаны зориулалтаар хэрэглэгдэж байгаа хэдэн зуун машин ихэнх нь шаардлагагүй болж бензин тос, жолооч, слесарь, авто баазуудын гүйцэтгэх үүрэг эрс багасна. Яам болгоны үүдэнд үүсдэг бөглөрөл, уур уцаар, бухимдал ганц цэгт төвлөрч, үргүй зардал, нааш цааш сүлжсэн явдал суудал устаж алга болно.
 
Ерөнхийлөгч Ц.Элбэгдоржийн зарлигийн гол үзэл санаа нь хэтэрхий үрэлгэн, данхайсан том төрийн бүтцийг хумьж, нэг цэгт төвлөрүүлснээр ард иргэддээ дарамт болж, Улаанбаатарын хамгийн сайн байрлалуудыг эзлэн оршиж байгаа өнөөдрийн бүтцийг хамгийн үр ашигтай, зардал багатайгаар нэгтгэн зангидахад л оршиж байгаа билээ. 
 
Ер нь аль ч цаг үед данхайсан том төр хамгийн муу менежер байсаар ирсэн. Түүний хайгийн тодорхой жишээ нь Улаанбаатарт тархан байрласан өнөөдрийн 16 яам гэдэг нь бидний амьдралд өдөр бүр шахуу мэдрэгддэг.
 
Өнөөдрийн балгасын буурин дээр 20- 30 давхар орчин үеийн бүх л шаардлагыг хангасан гоёмсог байшин барих тендерийг нээлттэй зарлаж, гүйцэтгэгчийг тодруулбал ядаж л барилгын компаниудыг дэмжиж, хувийн хэвшлийнхэнд бодитой хөрөнгө оруулалт хийгдэх даацтай бүтээн байгуулалт болох нь тодорхой.
 
Улаанбаатарын төв дунд баригдах энэ томоохон барилгад бүх яамд шилжин байрласнаар яамдын одоо байрлаж байгаа байрнууд суларч тэдгээрийг дуудлага худалдаагаар худалдах нөхцөл бүрдэнэ. Эдгээр хуучин барилгыг авсан шинэ эзэд 40-50 жил болсон тэдгээр барилгыг нурааж олон давхар гоёмсог барилгууд барих эрх нээгдэнэ.
 
Энэ нь Улаанбаатарын өнгө үзэмжинд ч тустай. Эдгээрийг дагаад барилгын салбар цоо шинэ түвшинд гарах боломж бүрдэнэ. Эксийн газар хийгээд Ц.Элбэгдоржийн зарлиг хоёрыг эрэгцүүлж суухад ийм л дүр зураг хамгийн түрүүнд толгойд орж ирээд байгаа юм. 
 
Тэгээд ч өчигдөр Монгол Улсын Ерөнхийлөгчөөс Засгийн газарт чиглэл өгсөн зарлигийг Ерөнхийлөгчийн Тамгын газрын дарга П.Цагаан УИХ- ын гишүүн, ЗГХЭГ-ын дарга, Монгол Улсын сайд Ч.Сайханбилэг, Нийслэлийн Засаг дарга бөгөөд Улаанбаатар хотын захирагч Э.Бат-Үүл нарт гардуулсан.
 
Ерөнхийлөгчийн зарлигийг гардаж аваад Ч.Сайханбилэг сайд «Монгол Улсын Ерөнхийлөгчөөс санаачилсан «Том төрөөс ухаалаг төр рүү» гэсэн цогц бодлогыг багцаар нь хэрэгжүүлэхийн тулд Монгол Улсын шинэчлэлийн Засгийн газар санал санаачлагатай ажиллана гэдгээ албан ёсоор илэрхийлж байна.
 
Засгийн газраас 2014 оноос эхлэн хэрэгжүүлэх концессын бүх барилга байгууламж, бүтээн байгуулалтын ажлуудыг ойрын өдрүүдэд эцэслэн жагсааж гаргана. Төр, Засгийн газрын агентлагууд түрээсийн нөхцөлтэйгээр хувьчилсан байранд нэг дор төвлөрч орно гэдэг нь хувийн хэвшлийнхний хөрөнгө оруулалтад найдвартай нөхцөл байдлыг үүсгэж өгч байна.
 
Зарлигийг хэрэгжүүлэх ажилд Засгийн газар цаг алдалгүй орж зохих ажлуудыг хийнэ» гэсэн бол Улаанбаатар хотын захирагч Э.Бат-Үүл «Ерөнхийлөгчийн гаргасан зарлиг нь ихээхэн онцлог, 1990 оноос хойш болсон үйл явдал дотор содон ул мөрөө үлдээх арга хэмжээ боллоо гэж хэлж болно.
 
Төр, хувийн хэвшлийн хамтын ажиллагааг баталгаажуулж, харилцан бие биеийнхээ өмнө үүрэг хүлээсэн чиглэлтэй зарлиг өмнө нь гарч байсныг би санахгүй байна. Ийм зарлиг анх удаа гарч байна. Үндсэн хуулийн дагуу Ерөнхийлөгчийн зарлигийг бид заавал дагаж мөрдөх үүрэгтэй. Иймээс Нийслэлийн засаг захиргаа Засгийн газартай хамтарч зарлигийг хэрэгжүүлнэ» гэсэн.
 
Ийнхүү Ерөнхийлөгч Ц.Элбэгдоржийн санаачлан хэрэгжүүлэх хоёр дахь хувьсгал буюу «Том төрөөс ухаалаг төр рүү» шилжих шилжилт хотын төвд уйтгартай дүнхийх балгасыг буулгаж, 20 гаруй давхар гоёмсог ордон барих ажлаар үргэлжлэх нь тодорхой болов. «Том төрөөс ухаалаг төр рүү» хүрэх галт тэрэг хөдөлжээ. Одоо түүнийг хэн ч зогсоож үл чадна. 
 
Д.Энхтүвшин
 
Эх сурвалж: