Нийслэлийн удирдлагууд Улаанбаатар хотыг 2020 он хүртэл хөгжүүлэх ерөнхий төлөвлөгөө гэгч айхтар зүйл гаргаад нэлээн удаж буй. Энэ хүрээнд жижиг, том нийлсэн олон ажил хийгдэх төлөвтэй. Эдгээр ажлын нэг нь авто худалдааны цогцолбор байгуулж, нийслэлд авто худалдааны төвүүд болон энэ төрлийн үйл ажиллагаа эрхэлдэг томоохон захуудыг нүүлгэх явдал юм.
Энэ сургаар төвлөрсөн том худалдааны төвтэй болох нь гэж бодож байтал хэрэг бишдээд явчихав. Учир нь ирэх сарын 1-н гэхэд нийслэлд ил задгай зогсоолд болон захуудад автомашины худалдаа эрхэлж буй бүх цэгийг шинэ цогцолбор руу шилжүүлнэ гэж шавдуулах болов. Ийм богино хугацаанд асар том бүтээн байгуулалтын ажлыг хийчихдэг юм байхдаа гэсэн шүү юм бодож суутал албаныхан хэд хоногийн өмнө хэвлэлийнхнийг дагуулан очиж, авто худалдааны цогцолборын шавыг тавьсан юм.
Гэтэл бид 22-ын товчоо орчмоос урагш хоёр км гаруй улаан шороо пургисан замаар явж хоосон талд очлоо. Тэнд авто худалдааны цогцолборыг байгуулах аж. Албаны хүмүүс болон ажил гүйцэтгэгчид “Аравдугаар сарын 1-н гэхэд авто зогсоолуудыг байгуулж, эхний ээлжинд тээврийн хэрэгслүүдийг нааш нь төвлөрүүлнэ” гэж байна.
Том, жижиг нийлсэн 15 мянган автомашины зогсоол байгуулна гэдэг тийм ч амар хэрэг биш байлтай. Гэтэл сарын хугацаанд хөрс хуулалт хийж, цементэн талбай байгуулчихна гэнэ.
Авто зогсоолоо хугацаандаа байгууллаа гэж бодоход худалдаачдыг хоосон цементэн дээр ирээд зогс гэж байгаатай агаар нэг санагдаад байх юм. Хотын төвд км хүрэхгүй зам янзлах гэж хэд хонодог билээ. Тэгвэл төв замаас салж, цогцолбор хүрэх хоёр км гаруй шороог хатуу хучилттай зам болгоно гэдэг ёстой үлгэр биз. Тийшээ очиж худалдан авалт хийнэ гэхээр санаанд бууж өгөхгүй юм.
Ингэж элдвийг бодсоор хамгийн том авто худалдааны төв болох “Да хүрээ”-г зорьж авто худалдаачидтай уулзаж, тэдний сэтгэгдлийг сонссон юм. Машинаа өнгөлж, зүлгэсэн худалдаачид “Бидний төлөөлөл тийшээ явж үзээд ирсэн.
Хоёр хоногийн өмнө очиход дөнгөж хөрсөө хуулж байсан. Хэзээ дуусах ажил юм, бүү мэд. Манайхныг ирэх сарын эхээр нүү гэсэн. Хэрвээ тийм хоосон тал руу “хөөвөл” энд байгаа хүмүүсийн олонх нь явж чадахгүй” гэцгээж байв.
Тэдний ийн хэлэх нь ч аргагүй. Тэд сардаа түрээсийн мөнгөнд 60 мянган төгрөг тушаадаг бөгөөд нэг авто машины зогсоол өдөрт хоёр мянган төгрөгийн үнэтэй аж. Гэтэл авто худалдааны цогцолборт жижиг тэрэгний зогсоол дөрвөн сая, том тэрэгнийх 18 сая төгрөг. Хэдийгээр худалдаж аваад өөрийн өмч болгож ашиглах боломжтой ч худалдаачдад тийм чадал нь алга гэдгийг тэд мөн хэлж байсан юм.
Тус зах дээр 10 гаруй жил автомашины бизнес эрхлэгч “Бид нар ямар талх зарж байгаа биш, нэг машин зарах гэж өчнөөн ажил болно. Тэгэхээр тэр дөрвөн сая төгрөгийг төлнө гэдэг үнэхээр хүнд.
Дээр нь ганц машины зогсоол авахгүй шүү дээ. Дор хаяж дөрвөн машины зогсоол авах болно. Яах учраа олохгүй л байна” хэмээн учирлаж байв.
Албаныхны үзэж буйгаар эдгээр томоохон захыг нүүлгэчихвэл л нийслэлийн замын түгжрэл багасч, хөрс болон агаарын бохирдол багасах гэнэ. Гэтэл “Да хүрээ” зах байрладаг Шар хаданд тус зах Сэтгэцийн эрүүл мэндийн үндэсний төв хоёроос өөр томоохон байгууллага байхгүй. Хүний урманд их, дээд сургууль нэгээхэн ч үгүй. Гэтэл замын түгжрэлээс болж ажил, сургуулиасаа хоцорлоо гэдэг үг лав л ард иргэдийн амнаас гараагүй нь тодорхой.
Харин тэр хавийн замын түгжрэл нь “Да хүрээ” захыг түшиглэсэн ил зогсоолд автомашины худалдаа эрхлэгчдээс үүдэлтэй.
Тэд үйлчлүүлэгчдэд зориулсан зогсоолгүйгээс иргэд машинаа зам дээр тавьж замын ачааллыг нэмэгдүүлдэг нь хэний ч нүдэнд ил.
Тэгвэл хөрсний бохирдлын хувьд Туулын сав газарт баригдах авто худалдааны цогцолбор цементэн талбайтай болохоор хөрс бохирдуулахгүй гэж албаныхан хэлж байсан.
Үүнтэй адил нийт талбайнхаа 95 хувийг цемент болон зориулалтын хатуу хучилттай замтай болгосон “Да хүрээ” зах хөрс бохирдуулаад байна гэвэл өрөөсгөл ойлголт.
Тэр ч бүү хэл мэргэжлийн хяналтынхан ирээд шалгахдаа “Авто худалдааны төв яг энэ газар шиг стандартыг дагаж мөрдөхөд болох юм байна” гэдэг юм билээ. Ингээд бодохоор хүний бүтээн байгуулаад өдий хүргэчихсэн бүхнийг төр нь булааж, бусниулах гээд байгаа юм шиг харагдах. Харин авто худалдааны цогцолбороо бүрэн ашиглалтад оруулчихаад “Та нарт чихэр шиг санал тавья. Нүүгээд ир” гэсэн бол өөр хэрэг.
Энэ талаар ч худалдаачид хэлж байсан юм. “Хоосон цементэн дээр хар хүйтэнд бид юу хийх юм бэ. Тэрнийхээ оронд бүх зүйлээ бэлтгэчихээд бидэнд санал тавьсан бол яваад л очно шүү дээ. Бид чинь хамгийн доод тал нь энд 10 гаруй жил ажиллачихсан болохоор гэрээ нааш нь нүүлгэж, хүүхдүүдээ ч энэ хавьд сургууль, цэцэрлэгт оруулчихсан” гэцгээж байв.
Нийслэлд төдийгүй улсын хэмжээнд хамгийн томд тооцогдох авто худалдааны уг төвд таван мянга гаруй хүн худалдаа эрхэлдэг.
Тэднээс гадна энэ захыг түшиглэж амьдралаа залгуулдаг олон хүн бий. Ундаа, ус, халуун цай, аарц зардаг настнуудаас эхлүүлээд өчнөөн олон цайны газар энд бий.
Тэр хүмүүс ч мөн захын хувь заяа хэрхэхийг хүлээн сэтгэлээ чилээж сууна. Үүгээр ч зогсохгүй захыг нүүлгэхээр болбол чингэлгээ жижиг тоосгон байшингаар сольсон түрээслэгчдийн хөрөнгө хог дээр үсрэх нь.
Үүнээс гадна авто худалдааны цогцолборт хийгдэх бүх зохион байгуулалт энэ газарт бий. Банкны нэг цэгийн үйлчилгээ, авто машины даатгал болон бусад бичиг баримт бүрдүүлэхийн тулд явдал чирэгдэл болохгүйгээр захынхаа хашаан дотор шийдчих боломжтой. Шинээр хийх гэж байгаа ажлыг нь хэдийн хийчихсэн байхад ингэж олон хүний ажил, амьдралыг алдагдуулж, бизнесийг нь дампууруулах гэж улайрах хэрэг байна уу.
Авто худалдааны төвүүдийг нүүлгэх ажлыг хотын удирдлагууд цаасан дээр хийчихэж байгаа болохоор амар байсан биз. Харин бодит амьдрал дээр дээрх 5000 хүний ар гэрийнхэн нийлсэн багаар бодоход 20 мянга орчим хүн үүрээ эвүүлсэн шогоолз шиг бужигнах нь байна.
М.Санчир
Эх сурвалж:
Сэтгэгдэл0
хаах хэрэгтэй. нүүлгэ.
"Төр төмбөгөр, ёс ёмбогор"гэдэг үг байдаг даа. Машин худалдаж амьдардаг бол хаана ч зарсан ямар ялгаа байнаа. Авах хүмүүс нь очоод л авна шүү дээ. Бүхнийг бэлэнчилдэг, амар хялбарыг хайж амьдардаг "коммунист сэтгэлгээ"-нээсээ салах хэрэгтэй дээ. Одоо хаа дуртай газраа машин тавьчихаад зардаг болсон байна. Тэр чөлөөлөгдсөн газруудыг нь машины зогсоол болговол иргэд олон түмэнд хэрэгтэй. Даанч нөгөө газрын наймаачид зараад барилга бариулчих байх л даа.
машин авах хүн нь хаана ч бсан очоод авна. Тиймээс нүүлгэх нь зөв .оронд нь сургууль цэцэрлэг орон сууц барьж ард түмнийхээ амьдралд нэмэр болсон нь дээр. Хугацааны хувьд дэд бүтэц цах энэ тэр нь шийдэгдсэн ийм газруудыг төр авч шийдвэрлэсэн нь хамгийн чухал. дэмжиж байна.
Зөв. Шалтаг тоочоод байвал барагдах ч үгүй. Харин чөлөөлөгдсөн авто зогсоолуудын газар дээр зөвхөн цэцэрлэг барина гээд тусад нь тогтоол гаргачих хэрэгтэй бн. Цэцэрлэг бол үнэндээ олдохгүй хэцүү бншд. Тэгсэн мөртлөө хүн амаа өсгөх бодлого барьж байгаа гээд байгаа. Яаж тэгж хэлж чаддаг бн.
Xerev xotiig zunuj khugsroogyi zaluu xyn udirdbal suud SNINI ULAANBAATARiig baiguulax xeregtei baix yum
Odor bur mashin avax bish Er ni mashinii khudaldaag DARXAN BAGANUURt tuvluruulex xeregtei
Gexdee No ni zarj baisan gazriig luivarchid abch baigaad l gol buruu ni baigaa Tegexeer bas cholooloxgyi gej gyriix ni shudarga esond niicnee