sonin.mn
Сэтгэгдэл (0)

"Капитал" банкны гүйцэтгэх захирал А.Ариунболд, Санхүү удирдлагын газрын дарга З.Мөнхсүрэн, теллер Х.Мандах нарыг шүүх хурал өчигдөр Баянзүрх дүүргийн эрүүгийн хэргийн шүүхэд болж шийдвэрээ гаргалаа. Шүүхээс А.Ариунболд, Т.Мөнхсүрэн нарт холбогдох хэргийг "Гэмт хэргийн бүрэлдэхүүнгүй" хэмээн үзэж, хэрэгсэхгүй болгосон байна.

Харин Х.Мандахыг Банкны хууль тогтоомж зөрчиж, бусдад онц их хэмжээний хохирол учруулсан хэрэгт гэм буруутай хэмээн үзэж 5.1 жил, бусдын хөрөнгийг залилан мэхлэх замаар бусдад онц их хэмжээний хохирол учруулсан хэргээр мөн 10.1 жилийн ял оноолоо.

Ингээд Эрүүгийн хуулийн Ерөнхий ангийн 57 дугаар зүйлд заасны дагуу хөнгөн ялыг хүндэд нь оруулж тооцсоноор биеэр эдлэх ялыг 10.1 жил байхаар тогтоол гарчээ. Мөн шүүгдэгч Х.Мандахаас шүүхийн шийдвэрийн хүрээнд 100 мянган төгрөг, 200 мянган төгрөгтэй тэнцэх эд хөрөнгө битүүмжилж, хохирогч Ж.Бямбацогтод 924 сая төгрөгийг төлүүлж, хохиролгүй болгохоор шийдвэрлэсэн байна.

Түүнчлэн хохирогч А.Адилбек, Ц.Авдил, Т.Наранцэцэг нарын дансыг мөрдөн байцаалтын явцад битүүмжилсэн шүүхийн шийдвэрийг цуцалжээ. Хэргийг эргэн дурдахад "Капитал" банкны ажилчид үйлчлүүлэгчдийнхээ хоёр тэрбум төгрөгийг "маржин худалдаа" хэмээх арилжаанд оруулж тоглоод алдсан байна.

Энэ дагуу тус банкны албан тушаалтнуудад эрүүгийн хэрэг үүсгэж, яллагдагчаар татаад байсан юм. Улмаар "Капитал" банкны дотоод хяналт муу, албан тушаалтнууд нь ажилаа зохих хууль журмын дагуу явуулдаагүйгээс дээрх хэрэг гарсныг тогтоосон байна.

Улмаар харилцагчдийн мөнийг олон удаагийн үйлдлээр өөр дансанд шилжүүлж байсныг тус банкны хяналт хавих ёстой албан тушаалтнууд зохих төвшинд үүргээ биелүүлээгүй, удирдлагын мэргэжлийн ур чадвар муу, банкны ердийн үйл ажиллагаа сул байсантай холбоотой гэж мэргэжлийн байгууллага дүгнэжээ.

Б.Цэцэгдэлгэр

Эх сурвалж: