Монгол Улсын Ерөнхийлөгч Х.Баттулга өнгөрсөн Мягмар гарагт УИХ-ын дарга Г.Занданшатарт өөрийн боловсруулсан Үндсэн хуульд нэмэлт өөрчлөлт оруулах хуулийн төслөө өргөн барьсан билээ. Уг Үндсэн хуулийн нэмэлт өөрчлөлтийн төслийг өнөөдөр Төрийн байгуулалтын байнгын хорооны хурлаар хэлэлцэн, зөвшилцөх ажлын хэсэг байгуулахаар болжээ.
 
УИХ-ын гишүүн Д.Лүндээжанцан нарын 62 гишүүний өргөн барьсан төслөөс гадна Ерөнхийлөгч Х.Баттулгын өргөн барьсан төслийг хамтатган хэлэлцэх ажлыг уг ажлын хэсэг хийх юм. Ажлын хэсгийг Ерөнхийлөгч Х.Баттулга ахалж, орлогчоор нь Ерөнхий сайд У.Хүрэлсүх ажиллана.
 
Харин ажлын хэсгийн бүрэлдэхүүнд МАН-ын бүлгээс УИХ-ын гишүүн С.Бямбацогт /Ажлын хэсгийн нарийн бичгийн дарга/, Д.Тогтохсүрэн, Ө.Энхтүвшин, Ц.Нямдорж нар, АН-ын зөвлөлөөс АН-ын дарга, УИХ-ын гишүүн С.Эрдэнэ, АН-ын зөвлөлийн дарга, УИХ-ын гишүүн Д.Эрдэнэбат нар ажиллах аж. 
Уг ажлын хэсэг  ирэх наймдугаар сарын 9-нд болох УИХ-ын ээлжит бус чуулганы хуралдаанаас өмнө зөвшилцөж дуусах юм байна.
 
Э.Мягмар