sonin.mn
ПЁНЬЯН. /Kyodo/. Вашингтон Пёньяныг чиглэсэн байр сууриа өөрчлөхгүй бол БНАСАУ-АНУ-ын дээд хэмжээний уулзалт энэ онд болохгүй гэж БНАСАУ-ын удирдагч Ким Жөн Уны дүү, ойрын туслах Ким Ё Жон өнөөдөр мэдэгджээ.
Солонгосын Хөдөлмөрийн намын Төв хорооны хэлтсийн нэгдүгээр орлогч дарга Ким Ё Жоны "KCNA" агентлагт нийтэлсэн мэдэгдэлд дурдсанаар, БНАСАУ-ын АНУ-тай өрнүүлж буй хэлэлцээ зогсонги байдалд орсон тул одоогоор цөмийн зэвсгээс ангижрахгүй ажээ.
БНСУ Вашингтон, Пёньяны цөмийн хэлэлцээг үргэлжлүүлэх чиглэлд ажиллахыг АНУ-ын Төрийн нарийн бичгийн даргын орлогч, БНАСАУ-ын асуудал хариуцсан АНУ-ын тусгай төлөөлөгч Стивен Бигунд уриалснаас нэг хоногийн дараа дээрх мэдэгдэл гарчээ.
 
“С.Бигун Сөүл хотод айлчилж, Солонгосын хойгт “энх тайвныг цогцлоох үйл явцыг” хэрхэн урагшлуулах талаар БНСУ-ын Засгийн газрын төлөөлөгчидтэй хэлэлцсэн” гэж Ерөнхийлөгч Мүн Жэ Иний ажлын албанаас мэдээлсэн байна.
 
Ким Ё Жоны хэлсэн үгнээс үзэхэд, БНАСАУ Дональд Трампыг 11 дүгээр сард болох ерөнхийлөгчийн сонгуулиар улиран сонгогдох эсэхийг хүлээж байж магадгүй ажээ.
БНАСАУ, АНУ хоорондын санал зөрөлдөөнтэй асуудлууд шийдэгдээгүй байгаа тул Пёньян Вашингтонтой дээд хэмжээний уулзалт хийх “шаардлагагүй” гэж үзэж байна гэж Ким Ё Жон мэдэгдсэн хэдий ч ах нь Д.Трампыг хүндэлдэг гэдгийг нэмж хэлжээ.
Хоёр удирдагч ойр дотно харилцаатай болохыг тэрбээр хэлээд, Пёньян цөмийн туршилт хийх, тив хоорондын баллистик пуужин харвах зэрэг Вашингтоны “ихэд” эмээж буй өдөөн хатгасан ажиллагаанаас зайлсхийсээр ирснийг хэлсэн байна.
Гэвч АНУ дээд хэмжээний уулзалт хийнэ хэмээн найдаж байгааг үл харгалзан Пёньян энэ онд Вашингтонтой дээд хэмжээний уулзалт хийхийг зөвшөөрөхгүй гэж тэрбээр хэлээд, шинэ сорилтоос эмээдэг америкчуудтай нүүр нүүрээ харан уулзах нь Ким Жөн Уны хувьд “цаг дэмий үрсэн явдал” болж буйг тэмдэглэжээ.
Гэсэн хэдий ч хоёр удирдагчийн шийдвэр, шийдэмгий байдлаас бүх зүйл шалтгаалах тул ирээдүйд юу болохыг урьдчилан хэлэх боломжгүй юм гэж Ким Ё Жон нэмж хэлжээ.
Тэрбээр АНУ “эргэлт буцалтгүй хатуу арга хэмжээнүүдээ” хэрэгжүүлбэл БНАСАУ-ыг цөмийн зэвсгээс ангижруулах үйл явц биеллээ олно гэж хэлжээ. Мөн тэрбээр хориг арга хэмжээг сулруулах талаар яриагүй гэдгээ хэлсэн боловч Пёньян Вашингтоноор юу хийлгэхийг хүсэж байгааг дурдаагүй байна.
Сингапурт 2018 онд болсон анхны дээд хэмжээний уулзалтын үеэрээ Д.Трамп Солонгосын хойгийг цөмийн зэвсгээс бүрэн ангижруулахын хариуд Пёньянд аюулгүй байдлын баталгаа олгоно гэж амласан юм.
Гэсэн хэдий ч Д.Трамп, Ким Жөн Ун нар өнгөрсөн оны хоёрдугаар сард Вьетнамд болсон уулзалтынхаа үеэр Вашингтоны цөмийн зэвсгээс ангижруулах шаардлага, Пёньяны хориг арга хэмжээг сулруулах уриалгын талаар санал зөрөлдсөн билээ.
 
 
Э.Хулан
Эх сурвалж: "Монцамэ" агентлаг