“Монгол Улсын иргэнд газар өмчлүүлэх тухай” хууль хэрэгжиж эхэлсэн 2003 оноос хойших 10 жилийн хугацаанд 98002 иргэн газар өмчлөн авсан нь нийслэлийн нийт хүн амын дөнгөж найман хувьтай тэнцэж байгаад ноцтой дүгнэлт хийсэн Э.Бат-Үүл баатар тэргүүтэй хотын удирдлагууд нэгэн мэргэн арга бодож олсон нь цахим бүртгэлээр Улаанбаатарчуудыг газартай болгох шийдвэр байв.
Өнгөрсөн наймдугаар сарын 1-нээс 15-ны хооронд цахим бүртгэлд 260 гаруй мянган иргэн хамрагдснаас аз од нь шовойсон 14 мянга орчим иргэн өөрийн гэсэн газартай болох эхний алхмаа хийчих шиг л боллоо.
НИТХ-ын 2013 оны 05 дугаар сарын 30-ны өдрийн 10/39-р тогтоолоор батлагдсан Гэр бүлийн хэрэгцээний зориулалтаар иргэнд өмчлүүлэх 15309 га бүхий 52 газрын байршил тогтоосноос эхний ээлжинд дээрх 14 мянга орчим иргэнд өмчүүлэхээр болоод буй.
Дээрх 52 байршлыг 2014 оны газар зохион байгуулалтын төлөвлөгөөнд тусган нийслэлийн хэмжээнд Хот, тосгоны төлөвлөлтийн норм ба дүрмийн дагуу 164 620 орчим иргэнд шинээр газар өмчлүүлэх боломжтой юм гэсэн.
Харин эхний сугалаанд оролцож газар өмчлөх эрхтэй болсон иргэдийн дунд сэжиг бүхий нэр ус нэлээн хэд цохиж явна.
Жишээ нь Сонгинохайрхан дүүрэгт газар эзэмших эрхтэй болсон иргэдийн дунд УМО6310803 регистрийн дугаартай Гён Шиг, Мин Гён гэгч тууж яваа бол бас л Сонгинохайрхан дүүрэгт МЬ77112302 регистрийн дугаартай Чүлтэмийн Алтанзул хэмээх аз нь атгандаа багтахаа больсон хүүхэн 2481,2489 дугаараар хоёр ч байршилд газар эзэмших эрх нээгдсэн бололтой юм.
Аз нь шовойж газартай болох эрх нь нээгдсэн иргэдийн нэрсийг харж суухад нэг айлын дөрвөн ч хүний нэр цохиж л явна. Гэтэл нэг айлын 11 хүн бүртгүүлснээс ганцынх нь ч нэр гялтайгаагүй тухай гомдлыг дөнгөж саяхан сонсоод л сууж байна.
Ер нь ингэхэд газрын албаныхны хэлээд байгаа “санамсаргүй байдлаар сонгосон” гэх үгний цаана хэн нэгний гар санаатай ажилчихаагүй л байгаа даа. Нөгөөтэйгүүр зөвхөн Монгол Улсын иргэн л өмчлөх учиртай газрыг хэчнээн солонгос, хятад бас бус нөхөд далдуур эзэмших эрхтэй болж байгаа бол. Үүнийг харж хянаж, цагдаж шалгадаг газар гэж байна уу, үгүй юу.
Тагнуул, цагдаа, хүчнийхэн юу харж, юу хийцгээж сууна вэ. Зарим нэг нь хэдэн гэр бүлээрээ мөрөөдөөд ч дийлэхгүй сууцгаахад хэн нэгний гарын үзүүр хөдлөх шиг болоход л хэсэг бүлэг хүмүүс хоёр, гурван байршилд газартай болоод байвал хойшдоо жинхэнэ газрын төлөөх дажин үүсэхгүй гэх газаргүй.
Ер нь ингэхэд цахим бүртгэл үнэхээр санамсаргүй сонгоод байна уу, хааяа нэг “санаатай” сонгуулаад байгаа хэрэг юм болов уу. Зарим нэг тохиолдлыг харахад үнэхээр “хуваарилалт нь шог” харагдаад болж өгөхгүй байна. Яах вэ эрхэм хотын дарга аа.
Эх сурвалж:
Сэтгэгдэл0
Buun luivar baigaa oilgomjtoi shuu dee.Uursdiinhuu bugs doloogch hahuuli ugsun hummustee hel amgui gazar olgoh arga