sonin.mn
Сэтгэгдэл (0)

 


Нийслэлийн иргэдийн төлөөлөгчдийн хуралд Чингэлтэй дүүргээс нэр дэвшээд байгаа “Эко" констракшны захирал С.Нямдаваатай холбогдох газрын тухай асуудал манай редакцид ирсэн юм. Тодруулбал, С.Нямдаваа нь Ялалт кино театрын өмнөх талбайг орчин үеийн залуусын амарч зугаалахад зориулсан усан оргилуур бүхий цэцэрлэгт хүрээлэн шахам болгож тохижуулна хэмээгээд газрынх нь зөвшөөрлийг авсан аж. Гэтэл өнөөдөр нөгөө усан оргилуур бүхий амралтын талбай огт өөр оффисын барилга болчихсон байх юм. Учрыг лавлавал “Эко” констракшны оффисын барилга баригдаж байгаа гэлээ. Одоогоор дөрвөн давхар барилга хэдийнээ баригдчихсан хэзээ мөдгүй ашиглалтад орох дөхөж байна.

"Эко" констракшны С.Нямдаваа гэж ажил үйлсээсээ илүү амрагийн явдлаараа олны танил болсон нэгэн. Бизнесийн салбарт гэрлийн хурдаар орж ирсэн "Эко" констракшны босс С.Нямдавааг хэрхэн ийм өндөрлөгт хүрснийг гайхах хүн олон байдаг. Нийслэлийн иргэдийн хуралд хахууль өгч орсон гэгддэг тэрээр хотын аль л байрлал сайтай газруудыг өөрийн болгож чадсан ч чанар муутай барилга барьдаг гэдгээрээ харин ч нэг алдаршсан. Хэдэн жилийн өмнө болсон үерийн үеэр“Эко”-гийн барилгуудааас нэлээд их "но’’ илэрснийг хүмүүс мэдэж байгаа. Муу барилга барьж, өндөр үнээр шахдаг “Эко”-гийн босс одоо Нийслэлийн иргэдийн хуралд дахиад нэр дэвшчихсэн явна.

Тэрээр өнгөрсөн дөрвөн жил нийслэлийн иргэдийн төлөө юу хийсэн юм бол. Түүний хийсэн ажил гэвэл хотын төвийн байрлал сайтай газрыг хувьдаа авчихаад одоо зориулалтыг өөрчлөн дөрвөн давхар барилга барьчихсан нийслэлийн иргэдэд “худал” хэлэх л ажил хийжээ.

Үнэн хэрэгтээ “Эко" констракшны захирал С.Нямдаваа компанийхаа үйл ажиллагаанд дорвитойхон анхаарч, чанартай барилга барьж чаддаггүй нөхөр. Түүнд холбогдох залилангийн хэргийг өнгөрсөн 2011 оны сүүлчээр Баянзүрх дүүргийн Цагдаагийн хэлтэст удтал шалгаж байгаад Прокурорын газар руу шилжүүлж залилан хийсэн хэргээр Эрүүгийн хуулийн 148.4-т заасанчлан хавтаст хэрэг үүсгээд намжсан. Сураглавал ахиухан мөнгө төлөөд салсан гэж дуулдана лээ. Ер нь "Эко" констракшны барьж босгосон орон сууц байнгын хэл амтай байдгийн дээр мэргэжлийн хяналтынхан хүртэл тэр бүр зөвшөөрч чаддаггүй. Товчхондоо мэргэжлийн хяналтын салбар хариуцсан байцаагч нарын “шүдний өвчин” болох дөхсөн асуудал болсон гэх юм билээ. Өнгөрсөн өвөл л гэхэд "Эко" С.Нямдаваагийн удирдаж босгосон “Голден Парк” хотхоны оршин суугчид нь дүн өвлийг үстэй дээл, үнэгэн малгайтай давах нь холгүй зутруу амьдарч яваа гэсэн мэдээлэл хэвлэлээр нэг гарсан. Түүнчлэн Экогийн барьсан барилгууд цаг хугацаандаа уралдаж баригдах гээд бөөн халтуур. Дээр нь хуучин муусайн техник ашиглагдсан гэдэг утгаараа байнга л эвдэрч хэмхэрч байдаг.

Түүний босгох барилгууд нь “өндөрт суунаглагдан босдог” хэр нь лифтгүй байх жишээтэй.
Өч төчнөөн иргэний насаараа цуглуулсан мөнгийг авчихаад чанар үнэртсэн хэл амгүй байшин бариад өгсөн бол иргэд гомдоллоод байхгүй л байх. Ийм байж болох уу. Энэ мэдээж шударга явдал яавч биш. Хогийн сэгээр байшин босгоно гэгчийг үзүүлж нотлодог энэ эрхмийн ажилаас хэзээ нэг чанар үнэртэж ханхалсан байдаг болноо. С.Нямдаваагийн ээлжит бас нэг шуугиан бол ”Тэнгис” кино театрын өмнөх нийтийн эзэмшлийн талбайг хашин авч, усан оргилуурыг нь үгүй хийсэн үйл явдал. Уг нь анх тэрхүү газрыг авахдаа гоёмсог усан оргилуур барина хэмээн зураг сэлт харуулж, ойр орчимд нь амьдарч,    ажилладаг хүмүүсийн талархлыг хүлээж байсан. Гэвч өнөөдрийг хүртэл оргилуурын талаар чимээ таг болж оффисын барилгаа сүндэрлүүлээд авсан байх юм. Уг нь энэ газар нийслэлийн өмчид байдаг гэж дуулдах юм билээ. Гэтэл өнөөдөр С.Нямдаваа гэх бизнесмэний гараар ороод дуусч байгаа нь энэ. Энэ мэтчилэн газар гишгэх, гал үлээхээс бусад нь худал хуурмагаар дүүрсэн нөхөр Нийслэлийн Иргэдийн төлөөлөгчдийн хуралд дахин санаархаж нэр дэвшээд хотын гудамжаар нэг рекламны самбараа байрлуулсан харагдана. С.Нямдаваа 2008 онд Нийслэлийн ИТХ-ын төлөөлөгч болж дэд бүтэц, барилга бүтээн байгуулалтын талаар анхаарч ажиллахаар сонгогдсон хүн л дээ. Харамсалтай нь бүтээн байгуулалт бус сүйтгэн байгуулалтад хөтөлдөг түүний үйлдлийг эөвтгөх гарц олдохгүй нь бололтой.

“Нийслэлийн нутаг дэвсгэрт олгох газар байхгүй” гэж ярьдаг манай газрын албадын дарга нар өнөөдөр хотын төвийг нүхлэх үйл ажиллагаагаа зогсоох нь бүү хэл нэг компанийн үйл ажиллагааг иргэдийн эрх ашгаас дээгүүр тавьж байгаа нь сонирхолтой. Ногоон байгууламж, амралт чөлөөт цагийн бүсээс илүү сүүдэрлэсэн том барилга барих төлөвлөлтийг энэ нийслэлд хэн зөвшөөрөөд байна вэ гэдэг нь тун сонирхолтой. Ямар гээч эрх мэдэл ийнхүү замбараагүй барилгажилт явуулж, авлига үнэртүүлсэн ажил хийдгийг манай иргэд анзаарч байгаа байх. Энэ хотын төлөө ажиллана гэж амлан сонгуульт албанд зүтгэхээр зэхэж буй хүний ийм байдал анзаарагдахгүй байхын ч арга алга.

П.Дөлгөөн

Эх сурвалж: "Нийслэл Таймс"