Нийслэлийн Засаг даргын Тамгын газар, нийслэлийн Аялал жуулчлалын газар, Монголын аялал жуулчлалын холбоо, “Монгол Костюмс” ХХК хамтран 13 дах жилдээ “Дээлтэй Монгол” наадмыг Их жанжин Д.Сүхбаатарын талбайд зохион байгууллаа. Энэхүү арга хэмжээ нь өнгөрсөн хугацаанд Монголчуудын уламжлалт соёл түүний дотор үндэстэн ястны дээл хувцас, эд хэрэглэл, ардын урлагийн биет бус өвийг гадаад, дотоодод сурталчлан таниулах, залуучуудын оролцоог нэмэгдүүлэх, аялал жуулчлалын бүтээгдэхүүн үйлчилгээг хөгжүүлэх зорилгоор зохион байгуулж ирсэн юм.
Наадмыг нээж, нийслэлийн Засаг дарга бөгөөд Улаанбаатар хотын Захирагч С.Амарсайхан хэлсэн үгэндээ “Монгол өв соёлоо хүндлэн дээдэлж, үндэсний дээл хувцсаараа гоёон төв талбайдаа хуран цугласан Нийслэл хотын иргэд, оршин суугчид төдийгүй манай улсыг зорин ирсэн зочид төлөөлөгч, аялагч, жуулчид та бүхэндээ “Дээлтэй Монгол” наадмын баярын мэндийг өргөн дэвшүүлье. Монгол түмний минь түүхийн нэгээхэн хэсэг соёл, ахуй амьдралыг шингээн хөгжиж ирсэн олон үндэстэн, ястны өмсгөл, эдлэл хэрэгсэлтэй ард түмэн билээ бид. Олон мянган жилийн түүхэн хөгжлийн явцад бий болж, үндэстнийхээ язгуур ахуй амьдралын онцлогийг таниулагч, оюун санааны илэрхийлэл болсон зүйл бол яах аргагүй та бидний үндэсний дээл, хувцас юм. Бид үндэсний хувцсаараа дамжуулан үр хойчдоо агуу түүх соёл, уламжлалынхаа нэгээхэн хэсгийг өвлүүлэн үлдээж, дэлхий дахинд Монгол үндэстэн гэдгээ түгээн таниулах өндөр ач холбогдолтой гэдгийг энд онцлон тэмдэглэж хэлмээр байна. Энэ жил 13 дахь жилдээ зохион байгуулагдаж байгаа наадам маань жил ирэх тусам цар хүрээгээ улам тэлж байгаад баяртай байна. Наадмыг зорин ирсэн та бүхэнд талархлаа илэрхийлж, Нийслэлчүүдийнхээ өмнөөс сайн сайхныг хүсэн ерөөе” хэмээлээ.
Сэтгэгдэл0
Миний сайхан Монгол орон минь
Дээлийг минь Хитадууд булаачихгэд байгаа болохоор бvх хvн едер бvр дээл емсеж байх хууль гаргачихмаар юм!!
Энэ үнэхээр сайхан уламжлалт, хүндэтгэлтэй үйл ажиллагаа болж чаджээ. Талархаж байна. Монголын уламжлалт өв ДЭЭЛ маань маш гоё шүү, бас хүндэтгэлтэй, тансаг, гоё хувцас.