Сэтгэгдэл (12)
Зээ хүүгийнх нь амь нас дээсэн дөрөөн дээр дэнжигнэж, замын түгжрэлд саатаж, яарч байсан эгзэгтэй үед цагдаагийн албан хаагчид таарснаар амийг нь аварсан тухай Чингэлтэй дүүргийн 12 дугаар хорооны иргэн Х.Амарсайхан бидэнтэй талархсан сэтгэгдлээ хуваалцлаа.
 
-Тэр өдөр яг  ямар үйл явдал болсон бэ. Зээ хүүгийн тань биеийн байдал ямар байна вэ?
 
-Зургадугаар сарын 19-ний өглөө зээ хүү минь санамсаргүй тагтнаасаа юм авах гэж байгаад хагарсан хамгаалалтын шилэнд баруун гарын судсаа зүссэнээс болж цус их хэмжээгээр алдаж, яаран эмнэлэг явж байсан юм. Ажлын өглөө байсан болохоор зам түгжрээ ихтэй яах аргаа мэдэхгүй сандралдаж, хүүгийн минь гарнаас цус алдан тогтохгүй байсан. Гэтэл пургон машинтай цагдаагийн алба хаагчид таарч тусламж хүсэхэд найрсгаар машиндаа суулгаад шууд л дуут дохиогоо асаан, эмнэлгийн анхны тусламж үзүүлэн цаг алдалгүй “Гэмтэл Согог Судлалын Үндэсний Төв”-д хүргэж өгсөн. Үнэхээр тэр үед хүүгийн минь амь нас хэдхэн секундээр  хэмжигдэж байсан. Маш их цус алдсан учраас дусал залгаж, шарлага, боолт хийлгэхээс эхлээд эмчилгээ хийгдсэн.
 
-Машинд анхны тусламж үзүүлсэн үү. Тусалсан хүмүүстэйгээ холбоо барьсан уу?
 
- Тухайн үед яарч сандарсан, балмагдсан байсан болохоор бидэнд тусалсан цагдаагийн алба хаагчдын нэрийг асуух нь байтугай машиных нь дугаарыг харах ч сөхөө байгаагүй. Аз болж нэг дугаар тэмдэглэн үлдсэн нь дэд ахлагч Д.Болортуяа байв. Хэд хоногийн дараа залган “Талархал илэрхийлье” гэхэд “Яахав ээ, эгчээ. Зээ хүүгийн тань бие л зүгээр бол болжээ” гээд ер хаана ажилладгаа тодорхой хэлдэггүй шүү. Эгч нь өөрөө эрэл сурал болж байж олж мэдсэн юм.
 
Эргүүл хамгаалалтын газрын алба хаагч нар болох цагдаагийн дэд ахлагч Д.Болортуяа, цагдаагийн ахлагч Б.Баттогтох, цагдаагийн ахлагч цагдаа жолооч С.Тэгшбаатар нар болох өргөсөн тангарагтаа үнэнч залуустаа дахин дахин талархаж байна. Мөн тэр үед тэд үүрэг авчихсан яарч явсан юм билээ. Машинд явж байх үед анхны тусламж үзүүлэн, сандарч балмагдсан ээжийг нь хүртэл тайвшруулж сэтгэлийн дэм өгсөн. Эмч нар хэлэхдээ “Цаг алдалгүй маш түргэн ирсэн нь хүүхдийн амь насанд аюул, эрсдэл учрахаас хамгаалсан” гэсэн. Миний зээ хүү хөгжмийн сургуульд суралцдаг. Хүүгийн маань амь насыг авраад зогсохгүй ирээдүй, авьяас чадварыг нь гэрэлтүүллээ.
 
-Энэ үйл явдлын дараа дуут дохиогоо асаагаад явж байгаа эмнэлэг болон цагдаагийн автомашиныг харахад танд юу бодогдож байна вэ?
 
-Манай гэр бүл биеэрээ мэдэрч, ойлголоо. Дуут дохиогоо асаагаад явж байгаа эмнэлэг, гал команд, цагдаагийн байгууллагын машинд зам тавих хэрэгтэй. Дотор нь яарсан, тэвдсэн, хайртай хүнийх нь амь нас хэдхэн хормоор хэмжигдэж буй хүмүүс яваа шүү. Тиймээс жолооч нараа зам тавьж өгч байгаарай.
 
 
С.Саруул
Эх сурвалж: “Зууны мэдээ” сонин