sonin.mn
Сэтгэгдэл (0)
ТОКИО. /TASS/. АНУ-ын Ерөнхийлөгч Дональд Трамп, БНАСАУ-ын удирдагч Ким Жөн Ун нар Вьетнамын нийслэл Ханой хотноо уулзах үеэрээ тохиролцоонд хүрч чадаагүйтэй холбоотойгоор Японы Ерөнхий сайд Шинзо Абэ Гадаад хэргийн яамныхаа удирдлагуудтай яаралтай зөвлөгөөн хийсэн байна. Телевизийн “NHK” сувгаар мэдээлснээр, тохиролцоонд хүрч чадаагүйн шалтгааны талаарх бүх мэдээллийг аль болох хурдан цуглуулахыг Абэ Гадаад хэргийн яамандаа үүрэг болгожээ.
Одоо энэ ажлыг Ханой хотод ажиллаж байгаа Японы Гадаад хэргийн яамны тусгай төлөөлөгчид хийж байна. Тэд Трампыг дагалдан яваа төлөөлөгчдийн гишүүдтэй нягт хамтран ажиллаж байгаа аж.
Хэрэв Солонгосын хойгийг цөмийн зэвсгээс ангижруулах арга хэмжээ авахгүй бол АНУ БНАСАУ-д буулт хийхгүй гэж Японы гадаад бодлогын байгууллагын төлөөлөгч урьд нь сэтгүүлчдэд мэдэгдсэн тухай “NHK” мэдээлж байна.
Дональд Трамп, Ким Жөн Ун нар Ханойн дээд хэмжээний уулзалтын үеэр тохиролцоонд хүрч чадаагүй боловч яриа хэлэлцээгээ үргэлжлүүлнэ гэж Цагаан ордон өмнө нь мэдээлсэн билээ.
 
Д.Жаргал
Эх сурвалж: Монцамэ агентлаг