sonin.mn
Сэтгэгдэл (4)

ЛОНДОН, 2026 оны гуравдугаар сарын 12 /RIA Novosti/. Лондоны ICE бирж дээр Brent маркийн газрын тосны үнэ нэг баррель нь дахин 100 ам.доллароос давлаа.


Арилжааны мэдээллээс үзвэл, тавдугаар сард нийлүүлэх газрын тосны фьючерс үнэ 14.33 хувиар өсөж, 100.39 ам.долларт хүрсэн байна.


Энэ сарын 9-нд Brent газрын тосны үнэ огцом өсөж, нэг баррель нь 111 ам.доллароос давж, улмаар 119.5 ам.долларт хүрсэн нь 2022 оны зунаас хойших хамгийн дээд түвшин байв. Гэвч мөн өдрийн орой АНУ-ын Ерөнхийлөгч Дональд Трамп Иранд явуулж буй “цэргийн ажиллагаа бараг дууссан” гэж мэдэгдсэний дараа 90 ам.доллароос доошилж буурчээ.


Олон улсын эрчим хүчний агентлагийн гишүүн орнууд Ойрх Дорнод дахь нөхцөл байдлаас үүдэлтэй газрын тосны үнийн өсөлтийг тогтоон барихын тулд стратегийн нөөцөөсөө 400 сая баррель газрын тос гаргахаар тохиролцсоноо лхагва гарагт буюу өчигдөр мэдэгдсэн билээ.


Үүний дараа Д.Трамп АНУ-ын стратегийн нөөцийг ашиглах шийдвэр гаргаснаа мэдэгдээд, үнэ буурна гэдэгт итгэлтэй байгаагаа илэрхийлжээ. АНУ-ын Эрчим хүчний сайд Крис Райт тус улсын нөөцөөс 172 сая торх гаргана гэж мэдэгдсэний тавдугаар сарын фьючерс хэлцлийн үнэ 12.3 хувиар өсөж, 98.63 ам.долларт хүрсэн байна. АНУ, Израилын цэргүүд эрчим хүчний дэд бүтэц рүү нь довтолгоогоо үргэлжлүүлсээр байвал газрын тосны үнэ нэг торх нь 200 ам.долларт хүрч болзошгүй гэж Ираны эрх баригчид анхааруулсан байна.



Д.Жаргал

Эх сурвалж: "Монцамэ" агентлаг