sonin.mn
Сэтгэгдэл (5)

АБУ-ДАБИ, 2026 оны хоёрдугаар сарын 5 /DW/. Орос, АНУ, Украины төлөөлөгчид өчигдөр Арабын Нэгдсэн Эмирт Улсын Абу-Даби хотод уулзлаа. Талууд хэлэлцээгээ пүрэв гарагт буюу өнөөдөр үргэлжлүүлэхээр болсныг эх сурвалжууд мэдээлжээ. 


Нэрээ нууцлахыг хүссэн Украины нэгэн албан тушаалтан Axios хэвлэлд ярилцлага өгөхдөө, уулзалтын эхний өдөр үр дүнтэй болсон гэсэн байна. Уулзалтуудыг хаалттай хэлбэрээр хийж байгаа юм. 


Оросын төлөөлөгчдийг Зэвсэгт хүчний Жанжин штабын ерөнхий газрын дарга Игорь Костюков, Украины талыг Үндэсний аюулгүй байдал, батлан хамгаалахын зөвлөлийн нарийн бичгийн дарга Рустем Умеров нар ахлан оролцож байгаа бол АНУ-ын талаас хэлэлцээнд Ерөнхийлөгчийн тусгай элч Стив Уиткофф, Дональд Трампын хүргэн Жаред Кушнер, мөн Армийн сайд Дэниел Дрисколл нар оролцож байгаа аж. 


Украин, Америкийн албан тушаалтнуудын ярьсныг эш татан Politico сонинд мэдээлснээр, уулзалтын үеэр талууд газар нутгийн асуудлыг хэлэлцсэн байна.


Орос, АНУ, Украины төлөөлөгчдийн гурван талт уулзалтууд нэгдүгээр сарын 23-24-нд Абу-Дабид болж, дайныг зогсоох талаарх АНУ-ын санал болгосон төлөвлөгөөг хэлэлцсэн юм. Эх сурвалжуудын мэдээллээр, талууд хэд хэдэн заалт дээр санал нэгдсэн ч газар нутгийн асуудлаар тохиролцоонд хүрээгүй байна. АНУ-ын Төрийн нарийн бичгийн дарга Марко Рубио эхний шатны хэлэлцээний дараа мэдэгдэхдээ, шийдэгдээгүй байгаа ганц асуудал бол Донбассийн асуудал гэжээ. Оросын тал Донбассаас Украины цэргийг гаргахыг шаардаж байгаа бол Киев энэ шаардлагыг эсэргүүцсээр байгаа аж. Донбасс нь Украины бүрэлдэхүүнд багтдаг боловч зарим газар нутаг нь Оросын цэргүүдийн хяналтад байгаа юм. 



Д.Жаргал

Эх сурвалж: "Монцамэ" агентлаг