Тун удахгүй "UBS” телевизээр цацах “Бэрүүд” олон ангит кинонд тоглосон дуучин С.ГАНТОГООТОЙ ярилцлаа. 
 
Тус кинонд Монголын шинэ үеийн залуу уран бүтээлчид түлхүү оролцжээ. Тухайлбал, жүжигчин Н.Мөнхсоёл, О.Амгаланбаатар, мисс Т.Батцэцэг зэрэг олны танил жүжигчид хамтран тоглосон байна.
 
-Юуны түрүүнд таны тоглож буй “Бэрүүд” киноны тухай ярилцлагаа эхлүүлье.Та энэ кинонд яагаад тоглох болсон бэ. Кинонд тоглох саналыг хэзээ, хэн танд тавьсан бэ?
 
-“UBS” телевизийн захирал Л.Балхжав ах надад анх 2019 онд санал тавьсан. Кинонд тоглохоос гадна дууг дуулахыг хүсэж байсан юм. Тэгээд л кинондоо тоглож, “Хайрын өргөө”, “Улаанбаатарын дагина” хэмээх дууг дуулсан. Надад миний тоглох дүр их таалагдсан учраас саналыг нь дуртай хүлээж авсан.
 
-Өмнө нь танд кинонд дүр бүтээх саналыг хэн нэгэн тавьж байсан уу. “Бэрүүд” киноноос гадна өөр кинонд тоглосон уу?
 
-Өмнө нь “Монгол HD” телевизийн “Гацуурхан” киноны хэсэгт Солонгост байхдаа тоглож байлаа. Түүнээс өөр дэлгэцийн уран бүтээлд тоглож байгаагүй.
 
-Энэ цагийн Монголын залуу чадварлаг уран бүтээлч залуустай хамтран ажиллаж кинонд дүр бүтээх ямар санагдсан бэ. Мэргэжлийн хүн биш болохоор танд тэднээс суралцаж мэдэх зүйл их байсан болов уу?
 
-Түрүүн хэлсэнчлэн кинонд тоглох санал ирэхэд баярлаж, сэтгэлийн хөдлөлөөр маш хурдан зөвшөөрсөн. Гэсэн ч яг зураг авалт эхлэхэд бага зэрэг санаа зовж сандарч байлаа. Эхэндээ ч “Монголын урдаа барьдаг залуу жүжигчидтэй хамтран хэрхэн тоглох билээ” гэж бодож, сандарч тэвдэж байснаа нуухгүй. Гэвч зураг авалт эхлэхийн өмнө киноны найруулагчаас хоёр сарын турш кинонд хэрхэн жүжиглэх тухай урлагийн хичээл заалгасан. Мөн хамтран ажилласан уран бүтээлчдээсээ маш их тусламж, зөвлөгөө авсан. Тэр бүхний хүчээр анхныхаа кинондоо тоглосондоо баяртай байна. Тун удахгүй үзэгчдийн хүртээл болох гэж байгаа. Намайг дэмжиж хамтарч ажилласан кино багийнхандаа талархаж буйгаа энэ дашрамд илэрхийлэх нь зүйтэй болов уу. 
 
-Киноны анхны үзлэгийг хийчихсэн гэсэн. Өөрийгөө жүжигчний хувиар зурагтаар хараад ямар сэтгэгдэл төрсөн бэ. Та яг ямар дүрийг бүтээсэн бэ?
 
-“Бэрүүд” кинонд нэгэн бизнесмэн залуугийн дүрд тоглосон. Кино маань нээлтээ хийгээгүй байгаа учраас илүү дэлгэрэнгүй ярьж болохгүй байх. Тиймээс киног үзээд намайг хэрхэн, ямар дүр бүтээж хэр тоглосныг минь харах боломжтой. Анх киногоо үзээд “Давгүй байна шүү” гэсэн сэтгэгдэл төрсөн. Ийм бодол төрүүлтэл намайг чин сэтгэлээсээ дэмжин зөвлөж байсан киноны найруулагчдаа баярлаж байгаа шүү.
 
-Киноны зураг авалт их удаан хугацаанд өрнөсөн үү. Хүмүүс энэ киног хэзээ нээх вэ гэсэн хүлээлт их байна. Хэзээнээс үзэгчдийн хүртээл болох вэ?
 
-Киноны зураг авалт өнгөрсөн оны гуравдугаар сард эхэлсэн. “Бэрүүд” хэмээх 20 ангит киног энэ сарын 24-нөөс эхлэн долоо хоног бүрийн ням гарагт “UBS” телевизээр цацаж эхэлнэ. Надад бас киногоо үзэгчдэд хурдан хүргэхсэн гэсэн хүлээлт их байгаа. Киног бүх насныханд зориулсан учраас гэр бүлээрээ суугаад үзэж болно гэдгийг онцолж хэлмээр байна. 
 
-Кинонд тоглох үеэрээ бэртэл авсан гэсэн. Энэ нь кинонд тоглохоо больё гэсэн сэдлийг танд өгөөгүй юу. Ер нь дахин кинонд тоглох санал ирвэл хүлээн авах уу?
 
-Кино зураг авалт жил гаруйн хугацаанд үргэлжилсэн. Зураг авалтын үед кино багийнхандаа дараа болсон нэг зүйл надад тохиолдсон нь хөлөө маш хүнд бэртээж, хоёр сар гаруйн хугацаанд таягтай явсан. Энэ дашрамд кино багийнхнаасаа дахин хүлцэл өчиж байна. Кинонд тоглож буй хүний хувьд өөрийнхөө аюулгүй байдлыг давхар хангаж явах ёстой байсан. Гэсэн хэдий ч би бэртэж гэмтлээ гээд кино зураг авалтаа удаан хойшлуулаагүй, таягтайгаа киноныхоо зураг авалтыг хийлгэж байсан. Энэ хугацаанд намайг ойлгож, тусалж дэмжин хамтран ажилласан кино багийнхандаа үнэхээр их талархаж байна. Дахиад кинонд тоглох гоё санал ирвэл хүлээж авахаас татгалзах зүйл байхгүй. Залуу байгаа дээрээ олон зүйлд өөрийн хүч чадлаа сорихыг хүсдэг.
 
-“Бэрүүд” кино нь Монгол зохиолоор бий болж буй үндэсний контент гэж байна. Таны хувьд зохиолоо уншиж үзээд ямар сэтгэгдэл төрсөн бэ. Магадгүй гаднын уран бүтээлийг даган дуурайсан мэт зүйл ажиглагдсан уу?
 
-Огт тийм зүйл ажиглагдаагүй. Монголд байгаа энгийн амьдралыг хүүрнэн өгүүлсэн маш сайхан зохиол болсон байлаа. Тийм учраас би зохиолоо маш олон удаа уншсан. Надад хамаагүй ч бүх дүрийг нь судалж танилцсан. 
 
-Киноны дуу болох “Хайрын өргөө”-г  та дуулсан. Ер нь сүүлийн үед ямар уран бүтээл дээр ажиллаж байна вэ. Эмэгтэй дуучидтай хамтарсан хайрын тухай өгүүлэх уран бүтээлд тань үзэгч сонсогчид илүү дуртай байх шиг?
 
-Ер нь бол уран бүтээлээ туурвиж байгаа. Дэлхий дахинд тулгараад буй аюулт цар тахлын өвчний улмаас залуу уран бүтээлчид хэцүүхэн цаг хугацаатай нүүр тулаад байна. Гэхдээ тун удахгүй бид бүхэнд сайн сайхан цаг ирэх болно гэж найдаж байна. Кинонд дүр бүтээж тоглохоос гадна Монголын урлагийн ертөнцийн том хүнээс дуу авч дуулсандаа тун баяртай байгаа. “Бэрүүд” киноны маань нэг дуу болох “Хайрын өргөө” нь миний энэ оны анхны уран бүтээл болсон. Мөн “Улаанбаатарын дагина” хэмээх дуугдуулсан. Кино гарч ирэхээр давхар энэ дууг олон нийтэд хүргэх байх. Түүнчлэн тав дахь сингл дуугаа хүргэхээр Солонгост зураг авалтаа хийсэн. Энэ аюулт өвчин гарч хил хаахаас өмнө зураг авалтаа хийчихсэн байсан юм. Удахгүй та бүхэнд хүрэх болно. 2019 онд Улсын филармонийн дуучин Насанбуянтай хамтран анхны дуэт болох “Love ya” дууг хүргэсэн нь олны сэтгэлд багагүй хүрсэн. Тиймээс цаашид дуэт дуу дуулах хүсэл сонирхол их байгаа.
 
-Залуу хүний хувьд нийгмийн элдэв явдал болон болж буй сайн сайхны төлөө дуу хоолойгоо хүргэж явдаг. Саяхан гэхэд л эх нялхсын байрны тухай дуу хоолойгоо цахим орчинд хүргэснээр нөхцөл байдлыг өөрчилж чадсан шүү дээ?
 
-Урлагийн хүн учраас олон нийтэд зөв үлгэр дуурайл үзүүлж байхыг хүсдэг. Тиймдээ ч болж бүтэхгүй байгаа зүйлийн хажуугаар дуугүй өнгөрч чаддаггүй. Миний дүү Эх нялхсын эмнэлэгт хэвтэж эмчлүүлж байхад нь би эргэж очсон. Тэгээд олон жил засвар үйлчилгээ хийгээгүй нэмэлт хаалгыг ашиглаж байсныг хараад би үнэхээр дуугүй байж чадалгүй өөрийн цахим хуудастаа сэтгэгдлээ илэрхийлсэн. Энэ нь ч олон хүнд хүрсэн. Тэгээд Эх нялхсын удирдлагууд надтай уулзаж учир байдлыг ойлгуулсан. Тухайн хаалгыг өмнө нь ашиглаж байгаагүй бөгөөд яаралтай тохиолдолд ашиглах байсан юм билээ. Коронавирусийн тархалтын улмаас олон нийтийн бөөгнөрөл үүсгэхгүйн тулд уг хаалгыг ашиглах болсон юм билээ. Ингээд би тэр хаалгыг нь сайн дурын үндсэн дээр хандивын аян зохион байгуулж, шинэчилж өгөхийг хүссэн ч Эх нялхсын удирдлагууд өөрсдөө засвар шинэчлэлт хийх болно гэсэн. Тэгээд дараа дахин очиход их гоё засвар хийж шинэчилсэн байсанд үнэхээр их баярласан. Учир нь, манай нийгэм аливаа асуудлыг нааштайгаар хүлээн авч шийдэж байгаа нь сайхан санагдсан.
 
-Солонгост олон жил ажиллаж амьдарсан хүний хувьд чамгүй олон савангийн дуурь үзсэн болов уу. Тэр бүхнээс хүний амьдралд авах зүйл их гэж ярьдаг шүү дээ. Та энэ тал дээр ямар байр суурьтай байдаг вэ?
 
 
 
-Солонгосын кино урлаг Монгол төдийгүй дэлхийн олон орныг байлдан дагуулж байгааг бид бүхэн харж байна. Маш их зүйлийг тэндээс харж болно. Төр засгаас нь кино урлагийг бодлогоор маш сайн дэмждэг. Тэр хэмжээгээр улс орноо дэлхийд сайтар сурталчилж чаддаг.
 
 
 
Урлагаар улс орноо өндөр хэмжээнд сурталчилж буйн тод жишээ бол Солонгос орон. Тэр дундаа Солонгосын кино урлаг улс орныхоо бүх зүйлийг маш сайн сурталчилж чадаж байна.
 
-Та одоо Монголдоо чамгүй олон уран бүтээлийг үзэгчдэд хүргэж байна шүү дээ. Мэдээж хэрэг энэ түвшинд хүртэл асар их хичээл зүтгэл шаардсан байх. Ер нь уран бүтээлч бололгүй зөвхөн өндөр цалинтай ажил хийгээд Солонгост амьдрах боломж байсан болов уу?
 
-Солонгост 13 жил ажиллаж амьдарч байна. Сүүлийн гурван жилд нь эх орондоо ирж очин байна. Мөн би Солонгосын аялал жуулчлалын корпорацийн Монгол дахь элч дуучнаар гурван жил ажиллаж байна. Би од, олны танил болъё гэж хичээгээгүй. Ердөө л өөрийн хүсэл мөрөөдлийнхөө төлөө тууштай байсан. Надад энд хүрэхэд асар их саад бэрхшээл тулгарч байсан ч би бэрхшээлд өвдөг сөхөрч бууж өгөөгй. Зарим хүн намайг их азтай солонгос руу яаж яваад, “Оддын хаан”-д орж, “Яг түүн шиг” шоунд оролцдог байна вэ гэж асуудаг. Үнэндээ би азтай байх шалтгаанаа өөрөө олж авсан. Хүсэл мөрөөдөлдөө тууштай байснаар надад энэ бүх зүйл тохиолдсон юм. Аливаа зүйлд тууштай, шантрахгүй байх нь хүн бүрт бүхнийг авчирна.
 
 
 
Би одоо ч хөдөлмөрлөж, хичээж зүтгэсээр байна. Энэ байдал цаашид ч үргэлжлэх болно. Би 10 жилийн дараа ямар хүн болсон байх нь надад маш тодорхой харагдаж байна. Цаашид улам бүр өөрийгөө хөгжүүлж хөдөлмөрлөх болно. Залуусдаа ч гэсэн тууштай хөдөлмөрлөж амьдраарай гэж уриалахыг хүсэж байна.
 
 
 
Мэдээж хүн бүхэнд сайн сайхан амьдрахад мөнгө хэрэгтэй. Гэхдээ би хүсэл мөрөөдлөө алдахыг хүсээгүй. Тиймээс би мөрөөдлийнхөө төлөө хөдөлмөрлөсөн. Энэ хөдөлмөр тууштай байдлыг минь үнэлж, бүх зүйлийг маань амьдрал надад өгсөн юм. 
 
-Магадгүй та гаднын хөгжилтэй оронд олон жил амьдарсан учраас Монголд ирээд таалагдахгүй сэтгэлд тань хүрэхгүй олон зүйлтэй тулгарч байсан болов уу?
 
-Монголд дэлхийд гайхагдах олон зүйл байна. Гадаадад нэг жил битгий хэл, нэг сар байчихаад ирсэн хүнд энэ бүх зүйл мэдрэгддэг. Адаглаад бороо ороход нийслэл хотын төв талбай борооны усаар дүүрдэг шүү дээ. Монголчууд муу зүйлд их амархан дасчихдаг. Би бол муу зүйлд дасахыг хүсдэггүй. Яагаад гаднын оронд нөхцөл байдал тийм сайхан юм. Монголд яагаад ийм байж болохгүй байгааг гайхдаг. Би нэгэн үе Монголдоо яагаад өндөр цалинтай ажиллаж амьдарч чадахгүй байгаа юм бэ гээд улс орноо буруутгаж байсан. Гэхдээ миний бодол санаа одоо өөрчлөгдсөн. Иргэн бид өөрсдөө хөгжиж байж улс орноо хөгжүүлэхийг ойлгосон. Тиймээс би өөрийгөө маш ихээр хөгжүүлж олон зүйлд суралцаж байгаа. Монгол орны хөгжлийн түлхүүр залуус бидний гарт байгаа шүү гэдгийг хэлэхийг хүсэж байна.
 
 
Г.Нямсүрэн
Эх сурвалж: "Монголын үнэн" сонин