Зээлдэгчдийн холбооны мэдэгдэл
 
МУ-н Үндсэн хуулийн 5-р зүйлийн 4-т “Төр нь үндэсний эдийн засгийн аюулгүй байдал, аж ахуйн бүх хэвшлийн болон хүн амын нийгмийн хөгжпийг хангах зорилгод нийцүүлэн эдийн засгийг зохицуулна” гэсэн байдаг. Төр Үндсэн хуулийн энэ үүргээ биелүүлж чадаагүй 30 жил боллоо.
 
Одоо зээлтэй иргэд бид өөрсдийн тэмцлийг явуулна.
 
Арилжааны банк бол хувийн Компани.
 
Хувийн компаний мөлжлөгийг УИХ, ЗГ, Монгол банк, Санхүүгийн зохицуулах хороо ч хязгаарлаж чаддаггүй юм байна.
Монгол улс хамгийн өндөр хүүтэй 10 орны нэг хэвээр байна. Санхүүгийн зохицуулах хорооны 2018 мэдээнээс үзэхэд, Арилжааны банкны зээлийн хүү дунджаар жилийн 25%, ББСБ-38,4%, Хадгаламж зээлийн хоршоо 34,8%, Ломбард 42%-тай байна. Монголд өнөөдөр арилжааны 14 банк, 539 ББСБ үйл ажиллагаа явуулж байна. Арилжааны банкнаас 740000 гаруй, ББСБ-с 234000 зээлдэгч байна
 
Зээлдэгчдийн холбоо 2016 оны 3-р сараас эхлэн Арилжааны банк болон ББСБ-уудын зээлийн хүүг бууруулахаар тэмцэл хийж эхэлсэн. Тэр цагаас хойш хэлтэй, амтай болгон зээлийн хүү хэт өндөр байна гэж ярьж, сонгуулийн шоу болгож, одоо ч ярьж байна. Хийж байгаа нь харагдахгүй байна. Энэ нь монгол айл бүрийг хямрааж байдаг асуудлын 1 болсоор байна.
 
Зээл авч байгаа 1 хүн, 1 ААН дангаараа зээлдэгч байгууллагын мөлжпөгийн эсрэг тэмцэх нөхцөлгүй. Зээл авахаа л больчих гэдэг зүйл хэлдэг. Харин зээлтэй иргэд бид нэгдэж энэ тэмцлийг хийнэ.
Бид, монополь байдлаа ашиглан, зээлийн гэрээгээр түрүү барьж, дэлхийд байхгүй өндөр хүү болон санхүүгийн үйлчилгээний хураамж зэргээр Монголчуудыг хувалзлан мөлжиж байгаа банк болон ББСБ, ломбард зэргийн эсрэг тэмцэх гэж байна. Зээлдэгчгүйгээр банк, санхүүгийн үйлчилгээний байгууллага оршин тогтнож чадахгүй.
Төр мөнгөний бодлогоо барьж чадахгүй байна. Зээлийн хүүг бууруулах гол арга бол Инфляцыг бууруулах, төгрөгийн ханшийг тогтвортой барих явдал байдаг. Сүүлийн 9 жилд монгол төгрөгийн ханш 110%-иар буурсан
Инфляцийг төр болон Монгол банкны бодлогоор барьдаг гэх боловч чадахгүй байна. Учир нь
 
- Арилжааны банкууд болон ББСБ-уудын гол хөрөнгө оруулагчид нь өмнө нь Монгол банкинд ажиллаж байсан хүмүүс байдаг. Банкны эздүүд болон тэдний эрхийг хязгаарлах эрх бүхий байгууллагын эрх мэдэлтнүүдийн хооронд Мафийн шинжтэй хуйвалдаан байдаг. Тэдгээрийн хуйвалдаан саад болж байна.
Валютын зохицуулалтын тухай хууль-д Арилжааны банк болон ББСБ-д валютыг дураараа өсгөх эрхийг өгчихсөн байдаг. (Валютын ханшыг өсгөж худалдаад нэг ашиг олдог, дахиад тэр мөнгөө өндөр хүүтэй зээлүүлж давхар ашиг олж байна.)
Сүүлийн 1-2 сарын дотор Арилжааны банкууд хадгаламжийнхаа хүүг буулгасан боловч бүх төрлийн зээлийнхээ хүүг буулгахгүй байгааг,
Сүүлийн 2 жилээс өмнө авсан зээлүүдийн хүүг одоогийнхтой дүйцүүлж буулгахгүй байгааг,
Сүүлийн жилүүдэд интернет банк, мессеж үйлчилгээ, банк хоорондын шилжүүлгийн хураамж гэх мэт шинэ үйлчилгээ гаргаж маш их хэмжээний ашиг олж байгаа ч, үйлчилгээний үнийн талаар үйлчлүүлэгчээс санал авдаггүй, боловсон дээрмийг хийж байгаа нь хууль бус тул бид эсэргүүцнэ.
/жишээ: 1 хүн өдөрт дунджаар 5 гүйлгээ хийж байна, үүний хураамж нь 500 төгрөг болно. Үүнийг сард бодоход 15000, жилд доод тал нь 180000 үүнийг хаан банкны 2 сая үйлчлүүлэгчид үржүүлэхэд 360.000.000.000 төгрөг болно./
Зээлийн эргэн төлөлтийн графикийг өөрт ашигтай хувилбараар хийдгийг,
Тэтгэврийн зээлэнд хүү тогтоодгийг, ипотекийн зээлийн урьдчилгаа өндөр байгааг,
Бизнес тэр дундаа жижиг, дунд бизнес эрхлэгчдийг илүү дэмжихгүй байгааг,
Зээл олгохдоо 1%, хугацаанаас өмнө зээлээ хаахад 1% шимтгэл авдагийг,
Монгол банкинд хувьдаа ББСБ-тай хүмүүс ажиллаж байгааг
Зээлтэй иргэд, ААН бид эсэргүйцэж байна.
 
Зээлдэгчдийн холбооны зүгээс Арилжааны банк болон ББСБ-уудтай хийх тэмцэл:
 
1. Зээлийн хүүг бууруулах, үйлчилгээний хууль бус мөлжлөг явуулахаа зогсоох шаардлагыг холбооны зүгээс хүргүүлнэ. Хэрвээ арга хэмжээ авахгүй бол зээлдэгчид тэмцлийн дараагийн алхамд шилжинэ. Жагсаал, цуглаан зохион байгуулна. Шинээр үүссэн нөхцөл байдлыг үндэслэн Банк болон ББСБ- уудыг шүүхэд өгнө. Зээлдэгчид зээлээ шилжүүлнэ. /Энэ дашрамд, шүүх, прокурорын байгууллагууд, өмгөөлөгчид, шүүгчдэд хэлэх зүйл байна. Эдийн засгийн хямрал болон төгрөгийн ханшны уналтаас болж төлбөрийн чадвараа алдсан зээлдэгчид буруугүй. Учир нь, “Валютын зохицуулалтын тухай хууль”-ийг хараач гэж албан ёсоор хэлмээр байна. Үүнийг өдий болтол харахгүй зөвхөн зээлийн гэрээг үндэслэж шийдвэр гаргахаа зогсоогоочээ.
2. Өөрсдөөс үл шалтгаалсан нөхцөлөөс зээлээ төлж чадаагүй барьцааны эд хөрөнгөө хураалгасан иргэд, ААН-үүдийн эрх ашгийг хамгаалж тухайн банкийг шүүхэд өгнө.
3. Иргэдэд харилцах данс нээж, картаар үйлчилж байгаа ч иргэдийн мөнгийг эргэлдүүлж ашиг олж байгаа. Үүнд хүү тооцуулна. Иргэд харилцах дансаа хадгаламжийн данс болгож түүндээ картын үйлчилгээг холбуулахыг мэддэггүй. Мөнгөө зүгээр ашиглуулж байна. Үүнийг иргэдэд ойлгуулна. 30 жилийн туршид чин сэтгэлээрээ, нуруугаа бөхийтөл, хуруугаа мойнийтол ажиллаж байж Банк, санхүүгийн байгууллагуудыг цамцандаа багтахгүй болтол цатгаж, таргалуулсан. Монголчууд дэндүү их тэвчээртэй хүмүүс. Гэхдээ одоо цаг нь болсон. Цаашид хэн нэгэн туслахыг харж суух боломж байхгүй. Миний бие Сэтгэлзүйчийн хувьд, Зээлийн өрөө төлөх асуудлаас болж айл болгонд маргаан үүсч, сэтгэл гутрал, гэр бүл салалт үүнтэй уялдаад өрх толгойлсон эмэгтэйчүүд, өнчин хүүхдүүд, архидалт, биеэ үнэлэлт, гэмт хэрэгт холбогдох, хулгай дээрэм ихсэх, хичнээн олон зуугаараа мөнгөний эрэлд хүний нутаг руу дайжих, амин хувиа хичээх хүмүүжил, ажилгүйдэл гэх мэт нийгмийн хамаг л хямрал гэр бүл дахь мөнгөтэй холбоотой бий болж байгааг өдөр тутам зөвлөгөө авахаар ирж байгаа хүмүүсээс мэдэрдэг.
 
Арилжааны банк, ББСБ, ХЗХ, Ломбардын эсрэг зээлдэгч бид нэгдэж тэмцэнэ
 
Иргэд, ААН байгууллагууд “Зээлдэгчдийн холбоо” гэсэн раgе мөн  дугаарт холбогдож нэгдэнэ үү. 85458615
Хэвлэл мэдээллийн байгууллагын та нөхдөөс манай мэдээллийг зээлтэй иргэн бүрт хүргэх талд дээр дэмжиж туслаарай гэж чин сэтгэлээсээ хүсэж байна.
 
ЗЭЭЛДЭГЧДИЙН ХОЛБОО
 
 
 
 
Ч.Анхныбаяр