Ардчиллын анхдагч, МоАХ-ы анхны Ерөнхий Зохицуулагч, УИХ-ын гишүүн, Дэд Бүтцийн Сайдын үүрэг гүйцэтгэгч Санжаасүрэнгийн Зориг агсан 1998 оны 10 сарын 2-нд бусдын гарт амь насаа алдсан билээ.
 
Түүний дараа талийгаачийн сонгогдож байсан  Дорнод аймагт болсон  УИХ-ын нөхөн сонгуульд төрсөн дүү Санжаасүрэнгийн Оюун нь МҮАН, МСДН-ын "Ардчилсан Холбоо" эвслээс нэр дэвшин сонгогдсоноор улс төрийн амьдралд оролцох болсон юм. Улс төрд орохынхоо өмнө С.Оюун Англид "Рио Тинто" компанид ажиллаж байсан байдаг.  
 
С.Оюун УИХ-д сонгогдмогцоо ахынхаа намаас гарч, Иргэний Зориг Намыг Х.Хулан, Т.Эрдэнэбилэг, З.Нармандах, ДарьСүхбаатар нарын хамт үүсгэн байгуулсан бөгөөд тус нам 2000-2016 он хүртэл тасралтгүй парламентад суудалтай байсан билээ. С.Оюун ч УИХ-ын гишүүнээр тасралтгүй 18 жил ажиллахын сацуу С.Баярын удирдсан Засгийн Газарт Гадаад Харилцааны Сайд, Н.Алтанхуягийн удирдсан Засгийн Газарт Байгаль Орчин, Ногоон Хөгжил, Аялал Жуулчлалын Сайдаар тус ажилласан.
 
Энэ хугацаанд тус нам Монголын Ногоон Нам, Ардчилсан Нам, Эх Орон Намтай сонгуулийн эвсэл байгуулж, Бүгд Найрамдах Нам, Монголын Ногоон Намтай нэгдэж, бас салж байв. Үр дүнд нь БНН-ын улсын бүртгэлийн дугаар, Монголын Ногоон Намын нэрийг авсан юм. Мөн тус намд М.Зоригт, Д.Энхбат,Х.Бат-Ялалт,О.Магнай гээд олон ч улс төрч орж, басхүү гарч байлаа. Хачирхалтай нь УИХ-д тасралтгүй 16 жил суудалтай байсан Иргэний Зориг-Ногоон Намаа   Ардчилсан Намд нэгтгэх шийдвэрийг дарга С.Оюун нь 2016 оны хавар гаргасан ч гишүүд нь хүлээн зөвшөөрөөгүй юм.
 
Үүнээс үүдэн С.Дэмбэрэл, Р.Булгамаа, Ч.Базар тэргүүтэй гишүүд нь АН-д элссэн бол Ц.Ганхуяг даргатай хэсэг гишүүд нь бууриа сахин УИХ-ын 2016 оны сонгуульд оролцож байв. Харин намын дарга С.Оюуны хувьд АН-д ч элсэлгүй, намаасаа ч УИХ-д нэр дэвшилгүй үлдсэн. Тэгвэл тэрээр өдгөө улс төрийг орхихоор шийдсэн бололтой, АН-д  огт элсээгүй бөгөөд тэр бүү хэл өөрийнхөө удирдаж байсан ИЗНН-аа ч орхин, судалгааны ажил хийж буй аж. Иргэний Зориг -Ногоон Намын буурийг сахин үлдсэн гишүүд нь  С.Оюуны улс төрийн шийдэлд тун  шүүмжлэлтэй хандаж буй бөгөөд өдгөө үндсэндээ тус намын үйл ажиллагаа  зогссон байна.
 
Ч.Явуу