сонин mn
Сэтгэгдэл (38)
Хөдөлмөр, Нийгмийн Хамгааллын Сайд Т.Аюурсайханыг энэ долоо хоногт чөлөөлнө. Үүнтэй холбоотойгоор түүний оронд хэнийг томилох вэ? гэдэг асуудал яригдаж эхлээд байна. Эх сурвалжуудын өгүүлж буйгаар УИХ-ын гишүүн Б.Саранчимэг, УИХ-ын гишүүн М.Оюунчимэг нарын нэрс МАН-ын удирдлагын түвшинд яригдаж буй ажээ. Тэгвэл тэдний хэн нь хэн болох тухай асуултанд хариулт эрье.
 
Б.Саранчимэгийн хувьд өмнө нь НИТХ-ын төлөөлөгч, Үндэсний цэцэрлэгт хүрээлэнгийн захирлаар тус тус ажиллаж байгаад 2016 онд УИХ-д сонгогдсон. "Мон Уран"-ы Б.Наранхүүгийн төрсөн эгч. Өмнөх парламентын үед дэгдсэн ЖДҮ-гийн зээлийн асуудалд нэр холбогдож, төрсөн дүүдээ зээл авч өгсөн байсан юм. Өөрөөр хэлбэл ЖДҮ-чдийн нэг.
 
Мөн сонирхолтой нь тэрээр төрсөн дүү Б.Наранхүү шигээ УИХ-ын чуулганы хуралдаанд идэвх муутай оролцдог нэгэн болохыг ирцийн бүртгэлээс харж болох аж.
 
Өөрөөр хэлбэл түүний дүү Б.Наранхүү улс төрчдөд маш их хандив дэмжлэг үзүүлдэгийг нь харгалздаггүй юм бол Хөдөлмөр, Нийгмийн Хамгааллын Сайд болох давуу тал багатай.
 
М.Оюунчимэгийн хувьд Монголын Үндэсний телевизийн "ММ" агентлагийн тоймч, сэтгүүлч байхаасаа Монголчуудад танил болсон нэгэн. Аахар шаахар цахим буллид л өртчихдөгөөс бус элдэв хууль бус үйлдэлд холбогдоогүй нэр цэвэр улс төрч. ОХУ, АНУ-д боловсрол эзэмшсэн.
УИХ-д сонгогдсоноосоо хойш хөдөлмөр нийгмийн хамгааллын салбарын асуудлыг УИХ-ын түвшинд хэлэлцэх чиг үүрэг бүхий Өргөдлийн байнгын хороо, Нийгмийн Бодлогын Байнгын Хорооны даргаар ажиллаж байсан туршлагатай. Өөрөөр хэлбэл уг салбарын онцлог, алдаа оноог хэдийн мэдчихсэн хүн гэсэн үг. Нөгөөтэйгүүр сэтгүүлч хүний хувьд эгэл бор амьдралын зовлон, жаргалыг ч маш сайн мэднэ. Хөдөлмөр, Нийгмийн Хамгааллын Сайд ойр ойрхон солигдож, уг салбарт асуудал овоороод буй. Энэ хүнд үед ачаа үүрч, Хөдөлмөр, Нийгмийн Хамгааллын Яамыг эмхэлж, эгэл олныхоо цалин хөлс, хөдөлмөрийн нөхцлийг сайжруулах, нийгмийн салбарт тулгамдсан олон асуудлыг бага ч атугай шийдвэрлэх албыг хэн хаших вэ? гэдэг асуудал МАН-ын хувьд тун чухал шийдвэр болох юм.
 
Б.Батбаяр