sonin.mn
Сэтгэгдэл (28)

2025 оны 6 дугаар сарын 9-нд болсон Монгол Ардын Намын VII бага хурлын үеэр УИХ-ын гишүүн Г.Тэмүүлэн Монгол Улсын Ерөнхий сайдын албан тушаалд нэр дэвшиж өрсөлдсөн нь олон нийтийн анхаарлыг татсан билээ.




Чөлөөт зах зээл, хариуцлагатай төсөв, хувийн хэвшлийн дэмжлэг



Г.Тэмүүлэн нэр дэвших үеэрээ улс орны өмнө тулгамдаж буй эдийн засгийн хүндрэлтэй нөхцөл байдлыг онцолж, эдийн засгийн эрх чөлөөг дээдэлсэн бодлогоор хариу өгөх хэрэгцээ байгааг тодотгосон юм. Тэрээр:

“Эдийн засагт нүүрлэж буй хүндрэлийг эрсдэл багатайгаар даван туулах нь энэ цагийн хамгийн чухал асуудал болж байна. Энэ ч үүднээс бодит өөрчлөлт, үр дүн авчрах шийдэл бүхий эдийн засгийн эрх чөлөөний бодлогыг дэвшүүлэн Ерөнхий сайдад өрсөлдлөө,” хэмээн тайлбарласан.


Мөн тэрээр төрийн зардлыг бууруулах, импортын хэрэглээг хязгаарлах, томоохон төсөл, хөтөлбөрүүдийг эрэмбэлж, санхүүгийн сахилга батыг эрхэмлэх тухай дурьдаж байв.


Түүнчлэн:


“Иргэд, ААН-үүд, хувийн хэвшлээ дэмжих, төрийн өмчит компаниудаа олон нийтийн болгох, баялгийн болон орлогын дахин хуваарилалтыг татвар болон нийгмийн даатгалын тогтолцоогоор шинэчлэх нь бодлогын шийдэл” хэмээн үзэж байгаагаа илэрхийлсэн юм.



Залуу үеийн төлөөлөл ба улс төрийн соёл



Г.Тэмүүлэнгийн өрсөлдөөн нь МАН доторх үзэл санааны ялгааг тодруулсан, илүү зарчимч, эрүүл өрсөлдөөн явагдах боломж байсныг олон ажиглагч онцолж буй. Тэрээр өөрийн өрсөлдөөнөө:

“Нам дотроо үзэл санаа, үнэт зүйл, бодлогоороо өрсөлдөж, улс төрийн соёл төлөвшүүлэхийн төлөө явсан. Энэ бол миний хувьд нэр төрийн хэрэг байлаа” хэмээн дүгнэсэн.

Түүний дэвшүүлсэн гол үзэл санаа нь МАН-ын уламжлалт төр төвтэй эдийн засгийн бодлогын хажуугаар чөлөөт зах зээл, хувийн хэвшлийн үүргийг нэмэгдүүлэх, төрийн оролцоог бууруулах замаар бодит үр дүн гаргах шинэ гарц санал болгосноороо онцлог.



Бодлогын өөрчлөлтийн шалтгаан


Монгол Улсад инфляц өндөр хэвээр, төсвийн алдагдал их, зээлийн хүү өндөр байгаа нь эдийн засгийн бүтцийн шинэчлэлийг шаардаж байна. Г.Тэмүүлэн эдгээр асуудлыг шууд нэрлэж, улстөрчдийн популизмаас ангид, шинжлэх ухаанд суурилсан эдийн засгийн бодлого нэвтрүүлэх цаг ирснийг онцолсон юм.


Түүний санал болгосон шийдлүүдэд:


Төсвийн зардлыг хумих


Импортын хэт хэрэглээг зохицуулах


Төрийн өмчийг олон нийтэд эзэмшүүлэх


Нийгмийн даатгал, татварын системийн шинэчлэл багтсан байна.







Г.Тэмүүлэнгийн Ерөнхий Сайдд нэр дэвшсэн явдал МАН дотор шинэ үеийн, шинэ үзэл санааны төлөөлөлл хэдийн буй болсныг илэрхийлсэн явдал болсон юм. Хэдийгээр намынхаа бага хурал дээр ялалт байгуулж чадаагүй ч түүний дэвшүүлсэн үзэл баримтлал, ялангуяа чөлөөт зах зээлийн зарчимд суурилсан төрийн шинэчлэл, бодлогын шинэ хандлага нь цаашид МАН-ын бодлогын хэлэлцүүлэгт чухал байр суурь эзлэх бүрэн боломжтой. Ийм эрүүл саруул үзэл санаа МАН дотор илүү их түгээсэй.


М.Амухүү