sonin.mn
Сэтгэгдэл (12)

ОХУ-ын Ерөнхийлөгч Владимир Путин, Францын Ерөнхийлөгч Эммануэль Макрон нар долдугаар сарын 1-ний өдөр утсаар ярьж, Ираны цөмийн асуудлыг дипломат арга замаар зохицуулахыг хоёр тал дэмжиж байгаагаа илэрхийлэв. Энэ нь хоёр улсын удирдагчид ойрын гурван жилийн хугацаанд утсаар ярьсан анхны тохиолдол юм. 


Францын Елисей ордоны мэдээлснээр, Макрон, Путин нар хоёр цаг гаруй ярилцсан байна. Хоёр орны удирдагчид хамгийн сүүлд 2022 оны есдүгээр сарын 11-нд, даруй Украины хямрал хурцадсанаас хойших хагас жил гаруйн дараа утсаар ярьж байсан гэж Оросын мэдээллийн агентлаг мэдээлжээ.


ОХУ-ын Кремлийн ордны албан мэдээнд тэмдэглэхдээ, хоёр орны удирдагчид Ираны цөмийн эрчим хүчийг энхийн зорилгоор ашиглах хууль ёсны эрхийг хүндэтгэж, Иран цөмийн зэвсгийг үл дэлгэрүүлэх тухай гэрээгээр хүлээсэн үүргээ үргэлжлүүлэн биелүүлэх ёстой, тэр дундаа Олон улсын атомын эрчим хүчний агентлагтай хамтран ажиллах ёстой гэжээ.


Украины хямралтай холбогдуулан, Украин, Орос хоёр орныг аль болох хурдан гал зогсоох хэлэлцээрт хүрч, өнө батын, урт хугацааны шийдэл олохын тулд хэлэлцээг эхлүүлэхийг Макрон уриалсан гэж Елисей ордон мэдэгдсэн аж.


Кремлийн ордон Путины хэлсэн үгнээс иш татаж, Украины хямрал бол Оросын аюулгүй байдлын ашиг сонирхлыг олон жилийн турш үл тоомсорлож, одоо Украинд орчин үеийн олон төрлийн зэвсгээр хангах замаар дайсагнах үйл ажиллагаагаа сунжруулж буй барууны орнуудын бодлогын шууд үр дагавар юм гэж тэмдэглэсэн байна.


Г.Бямба