sonin.mn
Сэтгэгдэл (53)

2025 оны долдугаар сарын 18-19-нд шилжих шөнө Улаанбаатар хотын Сүхбаатар дүүргийн гуравдугаар хорооны нутаг дэвсгэрт байрлах “Канте” (Cante) шөнийн цэнгээний газрын гадаа залуус бүлэглэн нэгэн иргэний биед халдсан ноцтой хэрэг гарсан. Тус хэргийн гол холбогдогчоор УИХ-ын гишүүн асан Ц.Цэрэнпунцагийн хүү Ц.Санжаачойпэл болон “Эрэл” группын захирал Б.Эрдэнэбатын хүү Э.Тэмүүлэн, "Таванбогд"-ын Ц.Баатарсайханы хүү Б.Амарсайхан нар нэрлэгдэж, 48 цаг саатуулагдсан ч шүүхийн шийдвэрээр суллагдсан байна.


Энэ явдал олон нийтийн бухимдлыг өдөөж, "олигархиудын хүүхдүүд хуулийн өмнө хариуцлага хүлээдэггүй" гэх ойлголтыг дахин бататгав. Ц.Санжаачойпэл нь өмнө нь ч мөн удаа дараа зөрчил гаргаж байсан талаар мэдээлэл бий. Түүний эцэг Ц.Цэрэнпунцаг нь УИХ-ын гишүүнээр ажиллаж, шашны асуудлаар хууль санаачлан, Буддын шашны нэрээр улс төрийн оноо цуглуулж, өөрөө ч шарын шашины зэрэг дэв горилж явсан нэгэн. Гэвч гэр бүлийнх нь гишүүдийн үйлдэл олон нийтийн ёс суртахуун, хууль дээдлэх зарчимтай зөрчилдөж буй нь анхаарал татаж байна.


Ц.Цэрэнпунцагийн охин Пүүжээ гэхэд жагсаал хийж буй иргэдийг “завтай амьтад” хэмээн сошиал орчинд доог тохуу хийж байсан бол, төрсөн ах Ц.Бэгзсүрэн нь хүн буудаж амийг нь хөнөөсөн хэргээр ял эдэлж байсан ч Ерөнхийлөгч асан Н.Багабандийн уучлалаар суллагдаж байжээ.


Төрийн түшээ байсан Ц.Цэрэнпунцаг “бурхан, шашин, буян ном”-ын тухай ярихдаа их дуртай нэгэн. Гэвч үнэндээ тэр өөрийн үр хүүхдүүдээ ёс суртахуунтай, хуулийг дээдэлдэг иргэн болгож хүмүүжүүлэх ёстой байв. Хууль, ёс зүй, бурхан шашин, нийгмийн шударга ёсны тухай ярьдаг хүмүүсийн ар гэр, үр хүүхдийн үйлдэл зөрж буй нь үнэхээр эмгэнэлтэй.


Энэ мэт хэрэг явдлыг олон нийт марталгүй, харин ч хууль бүх хүнд тэгш үйлчилдэг байх шаардлагыг улам чангаар тавих цаг болсон байна. Төр, хууль, ёс суртахуун гурвын зааг алдагдсан нийгэмд шударга ёс тогтоно гэдэг зүүд зэрэглээ л болж байна.


М.Чой