sonin.mn
Сэтгэгдэл (11)

ЭМГЭНЭЛ


МОНГОЛ УЛСЫН НАЧИН ЖИГМЭДИЙН ОРГИЛБОЛД 

/1968-2025 он/


Монгол Улсын начин Жигмэдийн Оргилболд таалал төгсөж, монгол бөхийн ертөнцөд нөхөж баршгүй хүнд гарз тохиолоо. 


Тэрбээр Булган аймгийн Баян-Агт суманд 1968 онд төрсөн бөгөөд бага балчир наснаасаа бөхийн спортыг сонгон хичээллэж, улмаар улсын наадамд 1997 оны улсын баяр наадмаар улсын арслан Л.Сосорбарамаар гурав, улсын арслан М.Мөнгөнөөр дөрөв, улсын заан З.Дүвчингээр тав даван шөвгөрч улсын начин цол хүртсэн. Мөн улсын наадамд 1994, 1995 онуудад дөрөв давж байжээ. Сар шинийн барилдаанд 1993 онд цолгүй залуу бөх дунд шөвөгт шалгарч байсан түүхтэй.


XX-XXI зуунд төрөн гарсан бөхчүүдээс хамгийн өндөр 210 см өндөртэй начин маань самбо барилдааны 1990 оны дэлхийн залуучуудын аварга, Ази тивийн аварга, Дэлхийн цомын мөнгөн медальт тэрээр улсын болон олон улсын тэмцээнд олон удаа медальт байрт шалгарч байсан самбо бөхийн Олон Улсын хэмжээний мастер бөх байлаа.


Ж.Оргилболд начны аав Жигмэд нь "Орхон" үүлдрийн хонь бий болгоход онцгой гавьяа байгуулж "Төрийн шагнал" хүртсэн түүхт хүн юм. 


Талийгаачийн төлөв даруу, нөхөрсөг, тусч, хичээнгүй зан чанар, бөхийн бахдам амжилт, түүх нь бид бүхний зүрх сэтгэлд үүрд хадгалагдан үлдэх болно. 


Гэр бүл, үр хүүхэд, төрөл төрөгсдөд нь гүн эмгэнэл илэрхийлье.


МОНГОЛЫН ҮНДЭСНИЙ БӨХИЙН ХОЛБОО