sonin.mn
Сэтгэгдэл (11)

Дэлхийн адууны өдрийг Монгол Улсад анх удаа энэ оны 7 дугаар сарын 11-13-ны өдөр тэмдэглэн өнгөрүүлэхээр болсон. Үүнтэй холбоотойгоор Хурдан морины салбар хорооны дарга, БХЯ-ны Төрийн нарийн бичгийн дарга хошууч генерал Д.Ганхуяг тэргүүтэй албаныхан мэдээлэл өглөө.


Тэрээр “Дэлхийн адууны өдрийг тэмдэглэн өнгөрүүлэх хүрээнд 7 дугаар сарын сарын 13-ны өдөр 07:00-10:30 цагийн хооронд олон улсын морин уралдаан зохион байгуулагдана. Тус уралдаанд дөрвөн улсын оролцогчид оролцох бөгөөд Монгол Улсаас морь түрээслэн өөрсдийн нэр дээр уралдуулах зохицуулалттай байгаа. Олон улсын уралдааны дараа 11:40-13:40 цагийн хооронд “Түмэн морьдын парад” зохион байгуулагдахаар төлөвлөгдсөн. Ойролцоогоор 10 орчим морь оролцуулахаар аймаг, орон нутгийн болон төрийн бус байгууллагууд саналаа илэрхийлсэн” гэв.



Морин парадад оролцох хүсэлтэй иргэд, аж ахуйн нэгжүүд “Морин парад 2026” цахим системээр бүртгүүлэх бөгөөд хэрэв бүртүүлж амжаагүй бол гарааны цэгээс дөрвөн километрийн зайд байршуулсан отоглох цэгт нэгдсэнээр 13-ны өдөр парадад оролцох боломжтой юм.  



Зохион байгуулагчдын зүгээс морин парадын оролцогч бүрт Монгол Улсын Ерөнхийлөгчийн өргөмжлөлийг гардуулна гэдгийг онцлоод энэхүү арга хэмжээ нь морины соёл, адууны эдийн засгийн бодлогыг хөгжүүлэхэд чухал ач холбогдолтой бөгөөд цаашид 5-10 жилийн хугацаанд гадаадын оролцогчдын тоо нэмэгдэж, дэлхийн хэмжээнд Монголд төвлөрсөн адууны баяр болон өргөжинө гэж үзэж байгаагаа илэрхийллээ. 


Мөн монгол адууны соёлыг сурталчилсан Айрагны фестиваль, жороо морины уралдаан, адуучин, морьт харваа зэрэг тэмцээн зохион байгуулагдах бөгөөд хаалтын арга хэмжээнд Монголын урлаг соёлын одод оролцсон шоу тоглолтыг зохион байгуулахаар төлөвлөжээ.