sonin.mn
Сэтгэгдэл (42)

Соёл, Спорт, Аялал Жуулчлал, Залуучуудын Сайдын багцад туссан "Соёлын эрхийн бичиг" санаачилга буюу 18.3 тэрбум төгрөгийн киноны ваучер тараах саналыг УИХ дэмжээд буй билээ. Энэ нь нийгмийн шүүмжлэлийг ихээхэн дагуулж буй. Үүнтэй холбоотойгоор өчигдөр Соёл, Спорт, Аялал Жуулчлал, Залуучуудын Яамны Төрийн Нарийн Бичгийн Дарга А.Даваажаргал тус яамны харьяа байгууллагуудын удирдлагын хамт Төрийн ордонд хэвлэлийн хурал хийв.


Энэ үеэрээ тэрээр: "2025 оны төсвийг батлах үйл явцтай холбогдуулан Соёл, Спорт, Аялал Жуулчлал, Залуучуудын Сайдын төсвийн багцын Соёлын эрхийн бичиг арга хэмжээний зардалтай холбоотой сөрөг, ташаа ойлголтууд нийгэмд их явж байна. Соёл, Спорт, Аялал Жуулчлал, Залуучуудын Яамнаас хэрэгжүүлж буй бодлогын хүрээнд бид соёлын дархлааны асуудлыг улсын амин чухал гол сэдэв, асуудал гэж үздэг. Соёлын дархлаа гэдэг нь Монгол Улс оршин тогтнох, Монгол Улс дэлхий дахины улс орнуудаас ялгарч буй томоохон үзэгдэл. 


Сүүлийн жилүүдэд гадаад орны соёлын янз бүрийн довтолгоо болон соёлын даяаршилтай холбоотой Монголын орчин үеийн залуучуудын дунд үндэсний өв соёл, түүх судлал, үндэсний эх хэлний асуудал хөндөгдөж байна. Энэ хүрээнд хийж хэрэгжүүлж буй ажлын нэг бол Соёлын эрхийн бичиг юм.


Энэ эрхийн бичгийн гол агуулга нь Монгол Улсад буй 16-18 насны 183 мянган хүүхэд, залуучууд бий. Тэдэнд чиглэсэн үндэсний соёлын өв, язгуур эрх ашгийг зааж сургах асуудлыг бодлогын хэмжээнд авч хэлэлцэж байгаа.Энэ бодлогыг эсэргүүцнэ гэдэг бол соёлын дархлааг эсэргүүцэж байгаа, улс, үндэстнийхээ соёлын орон зайг гадны орон зайнаас хамгаалах хамгаалалтын бодлогыг эсэргүүцэж байгаатай адилхан зүйл" хэмээсэн юм.


Мөн энэ үеэр УДЭТ-ын захирал Н.Наранбаатар: "Харь орны кинонууд их гарч байна. Гудамжны хамгийн болохгүй үг хэллэг энд гарч байгаа. Яагаад энэ кинонуудыг хуулиар хааж болдоггүй юм бэ? Энэнээс чинь л болоод мафижилт, зодоон цохион, дээрэм зэргийг өөрсдийнхөө хөрсөнд дэлгээд тавьчихаж байна. Үүнээс болоод цэвдэг сэтгэлтэй хүн хайрлахгүй иргэд боловсорч байна. Эцэстээ энэ нь гэр бүл салалтад хүргэж байна." гэсэн дээд боловсрол эзэмшсэн хүн ярьж байна гэхэд эргэлзмээр хачин инээдтэй зүйл ярьсан билээ. Ухаангүй ноёнд урагшгүй албат гэдэг.


Мэдээж нийгмийн асар их шүүмжлэлийг хүлээж буй хатагтай, сайд Ч.Номин "хурган дарга нартаа" олны өмнө гарч, "18.3 тэрбумын ваучер"-ыг дэмжиж ярь гэсэн үүрэг өгсөн байж таараа.


Харин "урагшгүй албат"-уудынх нь яриа олон нийтийн дургүйцэл, жигшил, зэвүүцлийг илүүтэй төрүүлж буйг нийгмийн сүлжээний хандлагаас харж болно.


Монгол соёлдоо дургүй, үр хүүхдүүддээ хайргүй нэг ч Монгол хүн байхгүй. Гагцхүү эрэмбэ дарааллын хувьд одоо Монгол хүүхдээ эрүүл саруул өсгөн бойжуулж, нийгэм, эрүүл мэнд, боловсролын тэгш хүртээмжтэй биш юм аа гэхэд анхан шатны стандарт хангасан нөхцөлд амьдруулах нь л чухал. Иймээс л төсвийн үр ашиггүй шийдэл болох "18.3 тэрбумын ваучер"-ыг эсэргүүцэж байгаа хэрэг.


Харин Соёл, Спорт, Аялал Жуулчлал, Залуучуудын Яамны Төрийн Нарийн Бичгийн Дарга А.Даваажаргал гэх нөхөр болон уг салбарын "хурган дарга" нарын үзэж буйгаар "18.3 тэрбумын ваучер"-ыг дэмжээгүй хүн бүр бараг л Монголын дайсан болох юм гэнэ дээ, базарваань.


А.Бат-Эрдэнэ