Сэтгэгдэл (67)
Д.Сумьяабазар хотын дарга боллоо. Өөрийнх нь хэлснээр биеийн амрыг бодвол энэ ажлыг хүлээж авахгүй байсан биз. Уул уурхайнхан салбарын сайд болох үед нь Д.Сумьяабазарыг яаж угтлаа. “Улс орны эдийн засгийг авч яваа энэ чухал салбарыг бөх хүнээр удирдуулах гэлээ" гэж ирээд л ам уралдуулан муулсан. Одоо яг тэрэн шиг л үйл явц өнөөдөр өрнөж байна. “Гэнэт яагаад болчихов. Бөх хүн хот удирдах гэлээ Циркээ аврах гэж ийм шийд гаргаж, банкаа аврах гэлээ” гэж ирээд л элдвээр нь ярьж байна. Угтаа уул уурхайн салбарын хамгийн зөв бодлогоор удирдаж ирсэн хүн юм шүү. Зарим үед намынхантайгаа ч зөрж байр сууриа хамгаалж байлаа Нэг л мэдэхэд ууп уурхайн салбарынхан, бизнес эрхлэгчид түүнийг амаа олохгүй магтдаг, аргагүйн эрхэнд хүлээн зөвшөөрсөн. Д.Сумьяабазар Эрдэнэс Таван толгойн хувьцааны тодорхой хувийг олон улсын бирж дээр арилжаалж, төмөр зам зэрэг томоохон төслийг хөдөлгөхөд хөрөнгө оруулалт хийе гэсэн сая оруулж байсан ч манай улстөрчдийн алсын хараагүй байдлаас болж дэмжигдээгүй. Өнөөдөр түүнийг улстөрч гэдгээр нь хүлээн зөвшөөрөхөөс аргагүй.
 
 
 
Түүнийг бөх хүн нийслэлийг өөд татаж чадахгүй гэж байгаа бол андуурчээ. Тийм сайн юм бол өрсөлдөгч намынхан нь Д.Сумьяабазараас илүү бодлого, мөрийн хөтөлбөр гаргаж тавиад ялахгүй яасан юм. Энэ удаагийн Орон нутгийн сонгуулиар тэр ямар улстөрчөө харууллаа. Улс төрд тэр өрсөлдөгчөө олонтаа өвдөг шороодуулж ирлээ.
 
 
 
Өөрийн намын албан тушаалд горилогчид ч мөн түүн рүү хорт үгийн сумаа шидэж байх шиг харагдлаа. Тэр УИХ-ын сонгуульд Сонгинохайрханаас дэвшээд ялалт байгуулсан. Дараа нь Сонгинохайрханы намын хороог авлаа. МАН-ын дотоодод хоёр жилийн өмнө Нийслэлийн намын хорооны сонгууль болов. Тэр сонгуульд мөн л ялав. Нэгэнт ялсан учраас сая Нийслэлийн сонгуулиа удирдаад орлоо. Гарлаа, дэвлээ, яллаа. Энэ гараа дэвээ, ялалт бол цэнгэлдэхийн дэвжээнээс өөр юм. Улс төрийн хор, тэмцэл ихтэй талбарт түүний улстөрчийнхөө хувьд хийсэн ялалт байсан. Шат шатанд нь өөрийнхөө ялалтыг тунхаглаж ирсэн түүнийг улстөрч биш гэж одоо хэн хэлэх юм. Хотын дарга болохгүй гзж тэр өөрөө хэлж байсан нь үнэн. Зарим нь хотын удирдлага болохыг улс төр лүү дараагийн шат руу орох дамжлага шат шиг бодож ирлээ. Өөрөөр хэлбэл УИХ, Засгийн газар луу очих шат болгодог. Харин Д.Сумьяабазар эсрэгээрээ УИХ-ын гишүүнээсээ больж, хотын удирдлага болж байна. Ялгаа байгаа биз дээ. Юм хийж бүтээе гэж бодвол УИХ-ын гишүүнээсээ татгалзаж болдог юм байна. Шинэ жишиг.
 
 
 
Түүнийг шүүж, шүүмжлэхээ азная. Дөрвөн жилийн дараа аяндаа хэр ажилласан нь харагдана. Өнөөдөртөө түүний гавьяа бол хорь гаруй жилийг хотыг удирдаж ирсэн мафийн бүлэглэлээс салгасан нь юм. Хотын мафийнхан бидний нийслэлд хоноцын сэтгэлээр хандаж, хот төлөвлөлт, газар олголтыг эмх замбараагүй болгосон. Тэгвэл Сумьяабазар түүний нөхөд нийслэлд салхи орууллаа. Эрс өөрчлөлт хийнэ гэдэгт найдах хэрэгтэй. 
 
 
 
Энэ хотод чинь зоригтой том өөрчлөлтүүд хийх хэрэгтэй байна. Дэлхийн хотууд смарт болж байна. Алийн болгон манай нийслэл XX зуундаа үлдэх юм. Д.Сумьяабазар нийслэл хотын 34 дэх дарга боллоо. Тулаанд хамт орж, ялалт байгуулчихаад цэргүүдээ орхиод явдаг жанжин байж яах юм. Гавьяа байгуулсан бол цааш дахин цэргүүдээ командалж явах нь зүйн хэрэг биз дээ. Нэгэнт хотын намын хорооноосоо Орон нутгийн сонгуульд ялтлаа командалж ирсэн жанжнаар нь хотыг удирдуулах нь хамгийн зөв сонголт байлаа. Өнөөдрийн хувьд Д.Сумьяабазараас өөр сонголт байсан гэж үү. НИТХ-д нэг, УИХ-д гурав сонгогдож, Засгийн газрын гишүүнээр ажилласан, төрийн албаны туршлагатай энэ хүнд итгэл хүлээлгээд үзье. Нэгэнт ямар зангарагтай улстөрчөө харуулчихсан. Эргэлзэх хэрэггүй. Дахиад нэг сориод үзье.
 
 
Д.Хүслэн