СӨҮЛ. /TASS/. БНАСАУ-д хүмүүнлэгийн тусламж үзүүлэх төслийг хэрэгжүүлэхэд зориулж хуваарилсан мөнгийг буцаан олгох асуудлаар Солонгосын Үндэстнээ нэгтгэх яам НҮБ-ын Хүнсний хөтөлбөртэй яриа хэлэлцээ хийж байгаа аж. Энэ тухай Үндэстнээ нэгтгэх яамны албан ёсны төлөөлөгч Ё Сан Ги мэдэгджээ.
БНСУ-ын Засгийн газар 2019 оны 6 дугаар сард Пёньянд Дэлхийн хүнсний хөтөлбөрөөр дамжуулан 50 мянган тонн будаа нийлүүлж, тээвэрлэлт, хуваарьлалтын зардал болох 11.6 сая ам.долларыг олгох шийдвэр гаргажээ. Гэсэн ч тухайн үедээ БНСУ, АНУ цэргийн хамтарсан сургууль хийснийг БНАСАУ эсэргүүцэж буйгаа илэрхийлж, тусламжийг хүлээн авахаас татгалзсан байна. 
 
Үүнтэй холбоотойгоор оны эцэс гэхэд буцаан олголт хийгдэнэ гэдгийг Ё Сан Хи онцлон тэмдэглэжээ.
Гадны улсуудаас тусламж авахгүйгээр цар тахал, хар салхины үр дагаврыг арилгахад учрах хүндрэл бэрхшээлүүдийг өөрсдөө даван туулахад гол анхаарлаа хандуулах талаар БНАСАУ-ын олон нийтийн хэвлэл мэдээллийн хэрэгслүүд байнга мэдээлдэг аж. Түүнчлэн цар тахал дэгдэж эхэлснээс хойш халдварын нэг ч тохиолдол бүртгэгдээгүй хэмээн тус улсын эрх баригчид мэдэгдээд байгаа билээ. 
 
 
Э.Аянзаяа
Эх сурвалж: Монцамэ агентлаг