sonin.mn
Сэтгэгдэл (21)

Манай sonin.mn сошиал сайтад хурц нийтлэлээрээ нэрээ дуурсгаж яваа Тодын Отгонбаяр зураачийн ээлжит бичвэрийг Easy буландаа нийтлэл болгов.


Оросын түрэмгийллийн эсрэг шударга дуу хоолойгоо хүргэдэг байсан бол энэ удаа мэргэжлээ онцлохоор шийдлээ. Намайг Лондонд хараар цагаачилж, гуйлгачилж явдаг гэсэн хардлага доромжлол сошиал сайтад мэр сэр явдаг. Би бол бүх насаа урлаг уран зурагт зориулсан зураач хүн. Энд ч уран зургаа зураад туурвиад бүтээгээд үзэсгэлэнд оролцоод, бас амьжиргаагаа залгуулаад болж байна.


Саяхан миний төрсөн өдөр тохиодог юм аа. Хүүхдүүд маань миний төрсөн өдрийг тохиолдуулан ийм гоё маш үнэтэй будагнууд авч бэлэглэжээ. Энэ будагнууд бол италийн алдарт MAIMERI PURO гэдэг компанийн бүтээгдэхүүн. Будагны чанарыг тодорхойлдог “Pigment” гэдэг үзүүлэлт байдаг. Энэ будаг бол маш өндөр “Pigment” чанартай учир маш үнэтэй. Зураачид үхэлддэг, нүдээ унагадаг будаг л даа. Монголд бол ховрын ховорт орох байх.



Энэ 5 жижиг будаг (40mg) нийлээд Англи-Британийн 151.45 £, Америк доллараар бол 199.58 (1 GBP=1.3178 USD), Монгол төгрөгөөр бол 720.394 (1 GBP = 4.756.65) болж байна, өнөөдрийн ханшаар шүү дээ. Будаг тус бүрийн үнэ бас өөр өөр. (Дэлгүүрийн цэснээс харна уу). Тэр нь боловсруулах процессын олон цөөнөөс болдог байх. Аливаа будаг, түүн дотроо уран сайхны зориулалттай тосон болон акрилик (Art paints) будагнууд нь химийн олон шат дамжлагаар боловсруулагддаг учир тэр хэрээрээ үнэтэй байдгийн учир энэ юм. 



Түүнийгээ дагаад зураачдын бүтээлүүд үнэтэй болдог. Аугаа их зураач Ван Гог талхныхаа мөнгөөр будаг шунх авч, хагас өлсгөлөн л тууж явсан гээд Урлагийн түүхэнд бичээстэй байдаг. Олон ч зураач тэгж амьдарч уран бүтээлээ хойч үедээ үлдээж байж дээ. Үүнийг ойлгодоггүй зарим хүмүүс (Зарим гэж байгааг анхаарна уу, би бүгдийг хэлээгүй шүү, уучлаарай. Урлаг ойлгодог, үнэ цэнийг нь мэддэг англи монголгүй сайхан хүмүүс олон бий дээ) зургаа бэлэглэчих гэдэг нь үнэхээр гомдмоор. 



Хөөрхий, бидний зураачид бол уйгагүй хөдөлмөрчид. Тэгж байж л уран бүтээлээ туурвина. За тэгээд дээр нь бийр, жааз, будгийн шингэлүүр, канвас, зургийн тавиур, этюдник гээд бусад дагалддаг материалуудын үнэ цэнийг нэмчихвэл зургийн үнийг нь сонссон захын хүний дургүй нь хүрдэггүй юм аа гэхэд сэжиг төрдөг биз ээ. 



Энэ зураач нөхөр мөлжих гээд байна, сайхан луйварчин юм даа гээд, аан. Энд зураачийн сэтгэн бодсон, зурсан цаг хугацааг огт тооцоогүй шүү. Түүнийгээ нэмчихвэл хачин л үнэ сонсогддог байж таарна. Би энэ тухай гайхуулах гэж бичээгүй, танин мэдэхүйн утгаар, уран зургийн материалуудын үнэ цэн ямар байдгийг сонирхуулах төдий гэдгийг эрхэм монгол уншигчид ойлгоно гэдэгт итгэж байна. 


Урлаг, уран зураг ойлгодог мэдэрдэг дэмждэг бүх монголчууддаа баярлалаа!



Тодын Отгонбаяр (Лондон зураач)