sonin.mn
Сэтгэгдэл (0)

Нарны гүүр ашиглалтад ороод хэд хонож байтал гүүрний чанар чансааг байгаль ээж шалгаад өглөө. Шилдэг технологиор, 100 жилийн баталгаатай барьсан гэх гүүр дээр энэ сарын 25-нд 16 тээврийн хэрэгсэл мөргөлдсөн хэрэг гарч шөнийн 01.00 цагт замын түгжрэл үүсгэж байв. Тэр ч бүү хэл, зарим машин нь даатгалын компаниа дуудтал ирж явсан даатгалын машин нь мөргөлдсөн аж.

 

Хоёр уулзвар дээр найм, наймаараа мөргөлдсөн дүр зургийг харсан хэнд ч тийм таатай сэтгэгдэл төрөхгуй нь мэдээж. Эхний хоёр машин мөргөлдөж, маргаанаа эцэслэн шийдээгүй байхад араас нь ирсэн олон машин тоормозлосон ч гулгасаар байгаад наалдчихсанд халаглах жолооч олон байсан юм. Тухайн үед зам тэр чигээрээ мөсөн гулгуур мэт болж явган хүн явахад ч хүндрэлтэй байсан гэж жолооч нар ярьж байна.

 

Анхны хялмаагаар л ийм гулгаатай болохоо харуулсан Нарны гүүрэнд азаар том аваар гараагүй.''Гэхдээ өвлийн улиралд, өвлийн дугуйтай яваад ч нэмэргүй гэдгийг дээрх осол батлах мэт. Замын түгжрэлд залхсан жолооч шинээр ашиглалтад орсон гүүрийг сонгож явах нь мэдээж. Тиймээс замын хөдөлгөөний ачаалал буурахад ашиг түсаа хамгийн ихээр өгч байна гэх Нарны гүүрээ өвлийн улирапд бүрэн ашиглаж чадах уу гэсэн асуулт гарч байгаа юм.

 

Уг гүүрийг нээх үеэр “Гүүрийг барих ёстой технологийн дагуу барьсан. Ашиглагдсан техник нь Япон Улсдаа хамгийн сүүлийн үеийн технологид тооцогддог” хэмээн инженер нь ярьж байсан. Гүүрний дам нуруу нь гэхэд л сүүлийн үеийн хамгийн сайн чанарын ган төмрөөр хийгдсэн. Түүний дээр нь 24 см зузаан бетон, 10 см зузаан асфальт давхарласан. Харин ч Монголын цаг уурыг япончууд төдийлөн тооцоогүй бололтой.

 

Нарны гүүр ийм осол гарахаар халтиргаатай байгаа нь ган хийц, металлтай холбоотой гэнэ. Учир нь ямар ч металл өвлийн улиралд хүйтэн байдаг. Иймд шинэхэн орсон цас хайпахгүйгээр ийнхүү мөсөн гулгуур болсон байх гэж жолооч нар дүгнэж байна. Бусад зам доороо төмөргүй, шороон хучилттай учир мөс тогтдоггүй гэнэ. Энэ байдлаараа тус гүүрний халтиргаа гулгааг арилгахгүй бол жолооч нар өвлийн цагт сонгож зорчих нь юу л бол.

 

Замын ачааллыг 30 хувь бууруулах нь битгий хэл зөвхөн дулааны улиралд ашиглаж, өвөл машин тэрэг зорчдоггүй болбол яах вэ. Ийнхүү монголчуудад үнэгүй хийж өгсөн Нарны гүүр анхны шалгалтдаа бүдэрлээ. Манайхан шинэ зүйлийн нээлт хийхээрээ л дэлхийд байхгүй зүйл бүтээчихсэн юм шиг хөөрцөглөж, сайд дарга нар нь ч юм үзээгүйгээ гайхуулах гэсэн шиг нааш цааш олон хөлхөлдөж байсныг бодохоор ичгэвэртэй санагдсаныг нуух юун.

 

Гэтэл өнөөх нь хэдхэн хоногийн дараа тараа таниулж эгэл олны дургүйг хүргэх нь энэ. Гэхдээ Нарны гүүрэнд гол буруу нь байгаа юм биш. Нарны гүүрийг барьсан байгууллагуудын удирдлагуудад л гол буруу нь бий. “Гүүрэнд халтиргаа гулгаанаас хамгаалсан ногоон чулуу шигтгэж өгсөн. Тиймээс өвлийн улиралд ямар ч гулгаа гарахгүй” хэмээн хэлж байсан мэргэжилтэн нь өнөөдөр юу бодож суугаа бол.

 

Ямартай ч автозамын газрын дарга Д.Нанзаддоржийн ярьснаар Нарны гүүрний хойд хэсэг буюу хуучнаар Тээврийн товчооны зам байсан хэсэгт халтиргаа гулгаанаас хамгаалсан замын барзгар хамгаалалт хийсэн. Харин гүүрний өгсүүр хэсэгт гулгааны хамгаалалт хийгээгүй юм байна. Энэ асуудлыг шийдэх хүсэлтийг Японы талд өгсөн ч өнөөдрийг болтол хариу ирээгүй байгаа ажээ.

 

Ийнхүү Нарны гүүрний замд мөстлөгөөс хамгаалах ямар нэгэн арга хэмжээ авахгүй бол цас их унах нь тодорхой болсон ирэх өвөлд автомашины осол гарахгүй гэсэн баталгаа алга. Жолооч нарын ярьж байгаагаар давс, элс цацаж болох ч энэ бол аюулаас хамгаалах арга биш юм.



Нарны гүүрний тухай жолооч Ч. Баянмөнхөөс тодрууллаа.


-Нарны гүүр ашиглалтад орсноор замын түгжрэлээс салж чадсан уу?

-Замын түгжрэлийн ачаалал багасалгүй яахав. Энэ гүүрийг ашиглалтад орохыг автомашинтай бүхэн л хүлээж байсан байх.



-Саяхан орсон цаснаар хэд хэдэн машин мөргөлдсөн. Энэ юунаас болсон гэж бодож байна?

-Манай жолооч нар шинэ зам дээр хэт хурдтай явснаас болсон байх. Нөгөө талаар цас, мөснөөс улбаатай гулгаанаас хамгаалах хамгаалалт хийгээгүй гэж л хүмүүс ярьж байна. Ер нь манай автозамын засвар болон гүүр барьж байгаа компаниуд нүглийн нүдийг гурилаар хуураад байх шиг санагддаг. Бүтэн жил хийгээд ч зам засварын ажил дуусдаггүй. Нэг талын замыг нь засаж, нөхөж байхад нөгөө талын зам нь эвдэрчихсэн байх жишээтэй. Нарны гүүрийг япончууд барьсан 100 жилийн баталгаатай. Эхний 20 жилд нь ямар ч засвар орохгүй л гээд байсан. Гэтэл хэдхэн хоногт л стандартын дагуу баригдаагүй нь нотлогдож байна шүү дээ.



-Яг цас орж байх үед өөрөө хаана явж байв?

-Цас нэлээд удаан орсон шүү дээ. Ямар ч байсан би Нарны гүүрээр урагшаа гарч Яармаг орох санаатай хорооллын эцсээс Саппорогийн тойрог уруу
уруудаад явж байсан. Гэтэл машинууд мөргөлдчихсөн түгжрэл үүсчихсэн байгаа нь харагдсан. Ер нь бусад гүүрнээс илүү их гулгаатай баригдчихсан юм биш үү. Хүмүүс гүүр гэж яриад байгаа ч жолооч нарт гүүрний зам нь чухал шүү дээ.



-Өөрөө уг гүүрээр явган явж үзсэн үү?

-Үзсэн. Явган хүний замгүй баригдсан болохоор шөнө орой явган хүн гүүрээр явахад хүндрэлтэй санагдсан. Зарим жолооч ямар их хурдтай явдаг билээ. Гай хэлж ирэх биш хийсч ирдэг. Гэнэт гэрэлд цохиулах, хүн осолдох ч аюул гарч болзошгүй санагдсан.

В.Нэргүй
Эх сурвалж: “Үнэн.мн”