sonin.mn
Сэтгэгдэл (18)

“Ерөнхийлөгчийн 2027 оны ээлжит сонгуульд аль намаас хэн нэр дэвших вэ” гэдэг өнөөдрийн улс төрийн хамгийн анхаарал татсан асуулт болоод байна. Уг сонгуулийн хуанлийн дагуух албан ёсны үйл ажиллагаа эхлээгүй болохоор УИХ-д суудалтай намуудаас аль нь ч нэр дэвшигчээ ил болгоогүй байгаа юм.


Гэхдээ МАН, АН, ХҮН нам, Үндэсний эвсэл, ИЗНН дор бүрнээ нэр дэвшигч дээрээ дотоод “яриа хөөрөө”-тэй байна. Ингээд дуншиж байтал өнгөрсөн долоо хоногийн сүүлээр “Алтандорнод Монгол” компанийн ТУЗ-ийн дарга Т.Ганболд “Ерөнхийлөгчид нэр дэвших санал ирвэл нэр татгалзахгүй, өрсөлдөнө” гээд мэдэгдчихлээ.


Гэхдээ тэрээр УИХ-д суудатай таван намын алиас нь нэр дэвшихээ хэлсэнгүй үлдээв. МАН-ын хувьд горилогч нь багталцахгүй болсон. Г.Занданшатараас эхлээд С.Бямбацогт, Б.Жавхлан, Я.Содбаатар гээд 70-аад оныхон нь бараг тэр чигтээ дэвших бололцоотой “эрийн цээ”-нд хүрсэн. АН ч ялгаагүй, нэр дэвших хүсэлтэй улстөрч олонтой. Лу.Гантөмөр, Б.Пүрэвдорж, С.Баярцогт, Х.Тэмүүжин зэрэг эв нь таарвал “Үгүй” гэхгүй улстөрчидтэй. Тэр бүү хэл, судалгаа болгоноор илт “ялаад” байдаг Н.Алтанхуяг гэдэг гишүүн тус намд бий.


Үндэсний эвсэл бол Н.Номтойбаярын халаас, ширээ хоёрын нэгээс нэр дэвшигчийнх нь нэр гарч ирнэ. ИЗНН болохоор Б.Батбаатар өөрөө “Нэр дэвшинэ” гэчихсэн. Үгүй бол АН-ын Я.Санжмятав, Д.Одхүү зэрэг хуучны кадрууд нэр дэвших боломжтой.


Тэгэхээр Т.Ганболд аль намаас нэр дэвших вэ. ХҮН намаас уу. Тэгэх магадлалтай юм байна. Учир нь Т.Ганболд 2008 онд МАН /МАХН/-д элссэн. Харин 2015 онд тус намаас гарч ХҮН намд элсэж байжээ. Улмаар 2016 онд ХҮН намын дарга болсон. Гэвч 2020 он гэхэд ХҮН намаасаа гарч Монголын Үндэсний Сэргэн Мандалт гэдэг нам байгуулах хүсэлтээ Дээд шүүхэд хүргүүлж байжээ. Гэхдээ тухайн намыг Дээд шүүх бүртгээгүй байна. Тиймээс Т.Ганболд ХҮН намаас “залгах”-ыг хүлээж байж мэдэхээр байна. Аль эсвэл, Ерөнхийлөгчийн 2027 оны сонгуулийг олны анхааралд оруулж, хөдөлгөх -улс төрийн чулуу- болж байж мададгүй гэнэ.




Б.ГАРЬД

Эх сурвалж: “Зууны мэдээ” сонин