sonin.mn
Сэтгэгдэл (0)

 Монголын эгэл жирийн бүсгүй бид хоёр УИХ-ын гишүүн Ц.Нямдоржийг шууд мэтгэлцээнд нэн эелдгээр урьсан боловч өнөөдрийг хүртэл хариу өгөөгүй л байна. Бид хоёрыг голоод байгаа юм уу, бултаад байгаа юм уу гэдэг нь бүрхэг хэвээр. Ер нь манай эрхтэн дархтнуудад гэм биш зан болсон нэгэн үзэгдэл байдаг. 

 

УИХ-ын сонгууль дөхөөд ирэхлээр чухам ард иргэдийнхээ араас хөл хугалах нь холгүй хөөцөлдөж, “хөөе уулзья, учрая, ярилцья, хөөрөлдье” гэдэг хүмүүс зөөлөн сэнтийд залрангуутаа нөгөө сонгогчоо намаг шалбааг мэт үзэх төдийгүй ил тод басамжилдгийн тод жишээ нь Ц.Нямдорж болоод байна. Уг нь эрхэм гишүүн Ц.Нямдоржоос асуух, санал солилцох, дискусс үүсгэх олон асуудал байгаа юмсан.

 

Тухайлбал ардчилсан гэгдэх Монголд улс төрийн хэлмэгдэл байгаа эсэх, гишүүн Ц.Нямдоржид холбоотой зарим асуудлууд /тухайлбал Хятадын тусгай албадтай харилцаж байсан эсэх/, нийгэм улс төрийн тулгамдсан асуудлууд /өрийн дарамт болох бонд, Ерөнхийлөгчийн сонгуулийн хууль/ зэргээр түүний байр суурийг сонсох хүсэлтэй байна.

 

Гэвч тэрээр өнөөг хүртэл Эрдэнэтуул, Одончимэг нарыг хүн гэж үзэхгүй байна уу, олон түмэнд хэлэх олигтой үг нь олдохгүй байна уу, таг чиг л байсаар. Иймд УИХ-ын эрхэм гишүүн Ц.Нямдоржийг энэ сарын 19-ий орой буюу 19.30 минутаас ТВ9 телевиз дээр уулзахыг урьж байна. Ярилцья, хөөрөлдье, мэтгэлцье. Эрх биш бүсгүйчүүл учраас бид таныг хазахгүй, хавирахгүй, У.Хүрэлсүх шиг шанаадахгүй.

 

Асуудлын гол нь ер нь эрх мэдэлтэнгүүд аман дээрээ ард түмэн гэж ярьчихаад амьдрал дээр жирийн иргэний улаан нүүрийг хараад юу ярих нь сонин байна. Ер нь бид цааш цаашдаа эгэл жирийн иргэд Ерөнхийлөгч, сайд дарга нар болон бусад эрхтэн дархтнуудыг халз ярилцлаганд дуудаж  байхыг уриалж байна.  Тоож ирэхгүй бол эгэл биднийг хумхын  тоос төдий  үздэг үнэн нүүр царайг нь олон түмэнд илчлэх болно.


Иргэн:  Л.  Эрдэнэтуул,  А. Одончимэг.