sonin.mn
Сэтгэгдэл (0)

Өөрсдийгөө шинэчлэлийн хэмээн тодотгосон хамтарсан Засгийн газрын дэд сайд нарыг тун удахгүй томилох бололтой. Намууд аль яамны дэд сайдаар хэнийг сонгохоо бараг шийдчихсэн гэнэ. Гэсэн хэдий ч дэд сайдын асуудлаа хэлэлцэхгүй байгаа нь олны сонирхлыг татаж байна. Чухам яагаад тэд дэд сайд нараа томилохгүй байна вэ.

Ямар нэг зүйл дээр тохиролцоонд хүрч чадахгүй байна уу гэсэн таамаг төрж байгаа юм. Үүнийг нотлох гэсэн мэт Ардчилсан намынхан парламентад суудалгүй намуудаас дэд сайд сонгох гэж байна гэсэн шуугиан ч тараад байна. Хэрэв энэ үнэн бол “Буян” Жагаа, “Анод” Даваа тэргүүтэй хүмүүс дэд сайд болно гэсэн үг. Угтаа Ардчилсан намынхан хамтарсан Засгийн газарт AH 10, МАХН-МҮАН-ын “Шударга ёс” эвсэл тав, ИЗНН нэг дэд сайдтай байхаар хуваарилсан гэдэг.Тэгвэл АН- ынхан үнэхээр парламентад суудалгүй намуудаас дэд сайд сонгох гэж байгаа юм бол дээрх хуваарилалтаа өөрчлөхөд хүрнэ. Чухам юуны учир ийм шийдэлд хүрнэ гэж. МАХН-МҮАН-ын “Шударга ёс” эвслийн бүлэг өнгөрсөн баасан гаригт Орон нутгийн сонгуулийн хуулийн төслийн зарим нэг зүйл заалтууд дээр санал нэгдэхгүй байгаа учраас завсарлага авсан. Үүнээс үүдэн АН-ынхны гэдэн хөдөлсөн хэмээх судлаачид ч байна. Харин намын гишүүд тийм зүйл байхгүй. Дэд сайд нар журмын дагуу томилогдоно хэмээж байгаа юм.

Ямартай ч МАХН-МҮАН-ын “Шударга ёс” эвсэл өөрт оногдсон таван суудлаа МАХН гурав, МҮАН хоёр гэсэн зарчмаар хуваажээ. Харин ИЗНН-д Соёл, спорт, аялал жуулчлалын дэд сайдад хэнийг томилохоо хараахан шийдээгүй байгаа аж. Ардчилсан намаас дэд сайд болох эхний хүмүүсийн нэр тодроод байгаа бөгөөд тэдний хоёр нь үе дамжсан улстөрч аж.

АН-ын дэд сайдуудыг тольдвол:
Хүн амын хөгжил, нийгмийн хамгааллын дэд сайд- И.Нарантуяа
Хууль зүйн дэд сайд- АТГ-ын Тамгын газрын дарга Ч.Өнөрбаяр
Батлан хамгааллын дэд сайд- ҮЗХ- ны гишүүн Г.Байгальмаа
Эрчим хүчний яамны дэд сайд- Эрчим хүчний газрын дарга Ц.Баярбаатар
Хөдөлмөрийн дэд сайд- Б.Ургамалцэцэг
Сангийн дэд сайд- О.Магнай
Боловсрол, шинжлэх ухааны дэд сайд Ч.Куланда нарын нэр тодорчээ.

Түүнчлэн үлдсэн гурван дэд сайдын хоёрт нь ямар ч байсан УИХ-ын гишүүн асан Бадамдамдингийн хүү Б.Баттүвшин, УИХ-ын гишүүн асан Батж.Батбаярын хүү Б.Батбилэг нарыг томилохоор ярьж байгаа сурагтай.

Харин МАХН-МҮАН-ын “Шударга ёс” эвслээс:
Эдийн засгийн хөгжлийн дэд сайд- О.Чулуунбат /МАХН/
Барилга, хот байгуулалтын дэд сайд- Ч.Чимэдцэрэн /МАХН/
Уул уурхайн дэд сайд- н.Дэлгэрцогт /МҮАН/
Гадаад харилцааны дэд сайд- Э.Батшугар /МАХН/
Үйлдвэр, Хөдөө аж ахуйн дэд сайд- Б.Цогтгэрэл/МҮАН/ нарын нэр тодроод байна.
Ийнхүү хамтарсан Засгийн газрын дэд сайд нарын бүтцэд гурван улстөрч эцгийн гурван хүүгийн нэр яригдаж байна.

УИХ-ын гишүүн асан Бадамдамдингийн хүү Б.Баттүвшин, УИХ-ын гишүүн асан Батж.Батбаярын хүү Б.Батбилэг нар УИХ-ын 2012 оны сонгуульд намын жагсаалтаар нэр дэвшсэн хэдий ч хараахан их хурлын гишүүн болж чадаагүй билээ. УИХ-ын гишүүн асан Батж.Батбаяр УИХ-ын 2012 оны сонгуульд өөрийн нэрийг татан байж хүү Б.Батбилэгийнхээ нэрийг намын жагсаалтаар нэр дэвшүүлсэн. Гэвч Б.Батбилэг УИХ-ын гишүүн болоогүй тул тэрбээр хүүгээ дэд сайд болгохоор намын нөхөдтэйгөө хэлэлцжээ. Монгол Улсын гурав дахь Ерөнхийлөгч, МАХН-ын дарга Н.Энхбаяр ч мөн хүүгээ намын жагсаалтаар УИХ-д зүтгүүлсэн боловч Э.Батшугарыг СЕХ-ноос нэр дэвшүүлээгүй. Тиймээс Н.Энхбаярын намын нөхөд нь даргынхаа ачийг хариулахаар хүүг нь дэд сайдад зүтгүүлж байгаа бололтой.

Н.Будсүрэн
Эх сурвалж: "Улаанбаатар таймс"