sonin.mn
Сэтгэгдэл (14)

Дэлхийн хоёрдугаар дайныг дурсахад хамгийн түрүүнд Германы нацист дэглэмийн хийсэн аймаглан устгалт санаанд ордог. Еврейчүүдийг системтэйгээр устгасан энэ аймшигт геноцид хүн төрөлхтний ой санамжид хар толбо болон үлдсэн билээ. Гэвч Европт өрнөсөн энэ харгислалаас холгүй, Азийн өргөн уудам нутагт Японы эзэн хааны арми ч ялгаагүй, бүр зарим талаар илүү ч аймшигт үйлдлүүдийг хийсэн байдаг.


Нанжингийн харгислал: Аллага, хүчин, айдас


1937 оны өвөл Хятадын Нанжин хот Японы армийн мэдэлд оров. Хот эзлэгдсэний дараа зургаан долоо хоногийн турш иргэдийг олноор нь хүйс тэмтрэх аймшигт хядлага өрнөжээ. Судлаачдын үздэгээр 300 мянга гаруй хүнийг хүйс тэмтэрч, хэдэн арван мянган эмэгтэйчүүдийг хүчирхийлсэн баримт үлдсэн байна. Хүүхэд, хөгшид ялгаагүй буудуулж, Японы цэргүүдийн “дасгал сургууль”-д хүртэл ашиглагдсан тухай гэрчүүдийн мэдүүлэг бий. 


731-р тусгай анги: Шинжлэх ухааны туршилт нэрийн дор тамласан нь


Азид өрнөсөн японы харгислалын хамгийн жигшүүртэй нь Харбины ойролцоо байрлаж байсан 731-р тусгай анги.



Энд олзлогдогсдыг лабораторийн “туршилтын туулай” болгож, амьд биед халдварт өвчин зориуд тарааж, хүнийг хөлдөөн, амьд дээр нь зүсэн задлан хийж байжээ. Тахал, холера, мялзан зэрэг аймшигт өвчнийг зориуд халдааж, хэдэн арван мянган хүнийг золиосолсон нь хожим баримтаар батлагдсан. Шинжлэх ухааны нэрийн дор үйлдэгдсэн энэ харгислал хүн төрөлхтний ёс суртахууны хязгаарыг давсан хэрэг байлаа. 


“Тайтгаруулагч эмс” ба секс боолчлол


Япончуудын харгислал зөвхөн Хятадаар хязгаарлагдсангүй. Солонгос, Филиппин, Индонез, Бирм, Малайз гээд эзэлсэн улс орнуудынхаа мянга мянган эмэгтэйчүүдийг “тайтгаруулагч эмс” нэрийн дор хүчээр дайчилж, цэргүүдийн хэрэгцээнд зориулсан секс боол болгожээ.


Мөн сая сая энгийн иргэдийг төмөр зам, уурхай, зам гүүрийн ажилд албадан хөдөлмөрт дайчилсан нь өлсгөлөн, өвчин, зодуурын улмаас олон мянган хүний аминд хүрсэн байдаг.


Түүхийн сургамж


Гитлерийн нацистуудын хийсэн аймаглан устгалт хүн төрөлхтний түүхэнд хар мөр үлдээсэн бол, Японы эзэрхэг гүрний үйлдсэн харгислал Ази даяар түүнээс дутахгүй асар их зовлон тарьсан. Аль аль нь хүний эрх, нэр төрийг бүрэн үгүйсгэсэн, геноцидын шинжтэй аймшигт үйл явдал байв. Тиймээс ч “Япончуудын харгислал нацистуудаас илүү гарна уу гэхээс биш дутахгүй” хэмээн дүгнэхүйц хангалттай үндэслэлийг түүхийн баримтууд өгдөг.


С.Сарнай