sonin.mn
Сэтгэгдэл (7)

Ардчилсан Нам энэ Ням гарагт буюу 8-р сарын 31-нд шинэ даргаа тодруулна. Намын даргад нэр дэвшигчдийг бүртгэх ажил 8-р сарын 29-нд эхэлсэн ч түүнээс өмнө горилогсдын нэр ил болж, хэвлэлийн кампанит ажил ч өрнөөд байгаа нь нууц биш. АН-ын даргад нэр дэвшигчид дундаас УИХ-ын гишүүн, УИХ дахь АН-ын бүлгийн дарга О.Цогтгэрэл нам дотроо дэмжлэг сайтай байгаа нь илт.


Түүнээс ч болсон уу? О.Цогтгэрэлийг МАН-ынхан дэмжиж байна, Ерөнхийлөгч У.Хүрэлсүх дэмжиж байна, Монголын бүхий л баячууд дэмжиж байна, арай л Путин, Ши Жиньпин дэмжиж байна, Дональд Трамп дэмжиж байна гэх нь холгүй мэдээллийг ихээр түгээх болжээ.


Санаа нь хэн нэгний хүн гэсэн шошго зүүж байж л харлуулахаас өөр арга үлдээгүй бололтой. Гэхдээ нэг зүйлийг бодоцгооё. Улс төрд хэн нэгний залгамжлагч, тавиулууд байдаг нь нууц биш. Харин хэн нь тавиул байв, хэн нь бие даасан нэгэн байв гэдгийг тухайн улс төрчийн замнал буюу үйлдэл нь л яруу тод харуулдаг юм.


О.Цогтгэрэлийг анхандаа Н.Алтанхуягийн хүн гэдэг байв. Зөвлөх нь байсан нь үнэн л дээ.


Гэвч 2016 оноос хойшхи нь замналыг нь харахад тэднийг зөвхөн бүтээлч хамтын ажиллагаа л нэгтгэж байсан нь тодорхой харагддаг. Дараа нь түүнийг Ц.Элбэгдорж, Д.Дорлигжавын хүн гэдэг байв. АН хоёр хуваагдах ээдрээтэй үед тэрээр дээрх хоёр улс төрчийн яг эсрэг талд нь зогссон. АН-ы даргын цаасан гэгдэх сонгуульд ялаад байх үедээ тэрээр "Женко" Баттулгын хүн гэгддэг байв. Гэвч Х.Баттулгыг АН-ын даргын зөвлөх болж, ээдрээтэй олон асуудал дагуулж байх үед нь тэрээр намын хамт олныхоо талд эргэлзээгүй зогсож байлаа.


Өнөөдөр түүнийг МАН-ын захиалгын хүн мэтээр гүтгэж байна. Гэвч тэрээр 30 жил ув улаан байсан аймагт АН-ын анхны ялалтыг авчирч чадсан цэв цэнхэр нэгэн. 


О.Цогтгэрэл хэнээс ч хараат бус улс төрч гэдгээ үйлдлээрээ харуулсан гэдгийг түүний замнал илтгэнэ. Харин түүнийг намынхаа даргаар сонгож, 2028 оны ялалт руу хамтдаа зүтгэх эсэхээ АН-ын гишүүд өөрсдөө шийднэ. Сонголт мэргэн байг.


Б.Намуун