УИХ-ын гишүүн Ч.Лодойсамбуу сэтгүүлчдийн асуултад хариулав.

Энэ үеэрээ тэрээр: "Нэгдүгээрт, манай намын шаардлага маш тодорхой. Намрын чуулганаар, өөрөөр хэлбэл энэ ондоо багтаан Засгийн газрын бүтэц, бүрэлдэхүүнийг багасгахгүй бол Засгийн газрыг огцруулах асуудлыг дэвшүүлнэ гэж ил тод мэдэгдсэн. Ардчилсан намын үеийн дэд сайд, Ардын намын үеийн дэд сайдын асуудал дээр ганцхан байр суурь бий. 3.6 сая хүн амтай улсад 36 сайд хэрэггүй гэж бид үзэж байна.

Өнөөдөр 36 сайдтай болчихоод байна. Гэтэл 3.6 сая иргэнээс 600 мянгаас бусад нь ядуу байна. Тэр 600 мянга нь ч цөөрөх нөхцөл байдал руу орж байна. Ийм байхад сайдын тоог нэмээд, зардлыг өсгөсөөр байна. Үүний үр дүнд ядуурал нэмэгдэж, амьжиргааны түвшин буурч, хүмүүс цалин урамшууллаа авч чадахгүй байдалд орж байна.

Төрд ажилладаг хүмүүс байр сууриа алдахаас айж, үзэл бодлоо илэрхийлж чадахгүй байна. Тиймээс захиа бичиж, хашхирч, эсэргүүцлээ илэрхийлж байна. Ийм нөхцөлд сайдын тоог нэмье, 36 сайдтай байя гэж яаж хэлж чаддаг байна вэ гэдгийг ойлгохгүй байна. Магадгүй бид шинээр сонгогдож орж ирсэн учраас цочир мэдрэг байгаа юм болов уу. Гэхдээ бусад нь яагаад үүнийг олж харахгүй байгааг би ойлгохгүй байна. Манай Ардчилсан нам үүнийг байнга хэлж байгаа. Харин үүний хариуд Ерөнхий сайд, Засгийн газар хууран мэхлэлт хийж байна гэж бид үзэж байна. “128 бүтцийг байхгүй болгож, төсвөөс 40 тэрбум төгрөг хэмнэлээ” гэж ярьж байгаа нь худлаа.

Тэр 128 хяналтын менежер, бүтээмжийн менежер гэж нэрлэгдэж байсан хүмүүс нь өмнө нь компаниудаас цалинжиж байсан. Өөрөөр хэлбэл, компанид томилогдсон хүмүүс байсан. Одоо харин 16 хүн төсвөөс цалинжина. Энэ төсөвт тэдэнд зориулсан 100 төгрөг ч байхгүй. Ийм байхад олон нийтэд худлаа ярьж байна.

Монгол Улсын Ерөнхий сайд, Засгийн газар ил тод бус, залилангийн шинжтэй үйлдэл хийж байна гэж бид үзэж байна. Энэ нь өөрөө Засгийн газар огцрох хангалттай үндэслэл юм. Би хувьдаа байнга маргаан үүсгээд явах нь чухал гэж бодохгүй байна. Ядаж нэг хоногийн өмнө ч гэсэн зогсоод, хууль журамдаа орж, парламентын ёс жудагт нийцэж ажиллаасай гэж хүсэж байна. Парламент чинь угаасаа тийм үүрэгтэй байгууллага биз дээ. Тиймээс бид Ерөнхий сайдаас тодорхой шаардлага тавьж байна. 16 дэд сайд, нийт 36 сайдынхаа тоог 26 болгож цомхотго. Хэрэв үгүй бол Засгийн газрыг огцруулах асуудлыг тавина. Энэ асуудлаар Ардчилсан намын бүлэг өчигдөр яаралтай хуралдсан.

Манай намын бодлого бол тодорхой:

• Бизнес эрхлэгчдийг дэмжинэ
• Эдийн засгийн эрх чөлөөг хамгаална
• Төрийн данхар бүтцийг эсэргүүцэж, цомхон төрийг бий болгоно
• Мэргэжлийн үйл ажиллагааг дэмжиж, ардчиллыг амилуулна
• Зах зээлд төрийн оролцоог хумина

Эдгээр нь Ардчилсан намын үндсэн туг болсон үзэл санаа, зарчим юм. Өнөөдөр компаниуд бидэнд хэдэн зуугаараа хандаж байна. Сошиал орчинд ч харж байгаа байх “дансыг маань хаалаа” гэж хүмүүс орилж, бухимдаж байна. Ийм байхад дахиад 16 сайд нэмнэ гэдэг ямар утгатай юм бэ? Томилогдож буй сайд нарын сайн, мууг энд ярихыг хүсэхгүй байна. Зарим нь боломжийн залуучууд байна. Нэг эмэгтэй байна Хулан тэр Оранотой хийсэн хэлэлцээрээрээ мэргэжлийн, чадварлаг боловсон хүчин гэдгээ харуулсан. Харамсалтай нь Ардын нам руу орчихсон бололтой. Миний бодлоор буруу газар л явж байна. Харин чадварын хувьд бол маргах зүйлгүй. Бусдынх нь талаар одоогоор хэлэх зүйл алга." гэлээ.

Н.Отгончимэг