sonin.mn
Сэтгэгдэл (5)

Монгол Улсын Ерөнхийлөгчийн 2027 оны сонгуулийн бэлтгэл ажил хэдийн эхлээд байна. Мэдээж нэр дэвшүүлэлт, сонгуулийн сурталчилгаа эхлэх яагаа ч үгүй боловч энэ сонгуулийн улс төрийн зургийг зурах, урьтач хөрсийг бэлдэх ажлууд нь ид өрнөж байгаа гэсэн үг. МАН, АН-аас Монгол Улсын Ерөнхийлөгчийн 2027 оны сонгуульд нэр дэвшигчид үндсэндээ тодорхой, тэр бүү хэл тэдний ялгарал юу байх нь хүртэл тодорхой болоод байна.


Гэвч цагийн юмыг цагт нь гэсэн зарчим улс төрд маш чухал тул энэ тухай яриаг түр хойш нь тавья.


Монгол Улсын Ерөнхийлөгчийн 2027 оны сонгуульд ИЗНН, "Үндэсний Эвсэл", ХҮН намаас хэн хэн нэр дэвших нь үндсэндээ уг сонгуулийн үр дүнг тодорхойлно. Учир нь АН, ИЗНН, "Үндэсний Эвсэл", ХҮН намаас нэр дэвшигчид ардчилсан хүчний саналыг дөрөв хуваах бөгөөд МАН-ын нэр дэвшигч эхний шатанд шууд ялах нөхцлийг бүрдүүлэх учиртай.


Иймээс чухам чухам тэд хэн хэн байх вэ? гэдэг нь их чухал. МАН-ын урьдчилсан тооцоогоор бол 5 орчим хувийн л санал авахуйц сул нэр дэвшигч байж гэмээн тус намын ялалтад хувь нэмрээ оруулах аж.


Үүнтэй зэрэгцэн, Монгол Улсын Ерөнхийлөгчийн 2027 оны сонгуулийн эхний нэр дэвшигч бараг л тодорч буй нь УИХ-ын гишүүн, Байгаль Орчин, Уур Амьсгалын Өөрчлөлтийн Сайд, ИЗНН-ын дарга Б.Батбаатар юм байна. Тэрээр намынхандаа ч Ерөнхийлөгчид нэр дэвшинэ гэдгээ ил тод зарлаж, санхүүжилт, пиарын ажлаа төлөвлөн бэлдэж эхэлжээ. Хамгийн гол нь "дээд тал нь 5 орчим хувийн л санал авахуйц сул нэр дэвшигч байх ёстой" гэсэн эрх баригчдын шалгуурыг тэрээр хангаж буй бололтой.



Э.Солонго