АН-ын ээлжит " 4-11" хэвлэлийн бага хурал боллоо.

Хурлын эхэнд УИХ-ын гишүүн Ө.Шижир: "Өглөө сэрэхэд тоггүй, орой ороход цахилгаангүй, тог цахилгаанаас хамаарч ус тасардаг нөхцөл байдалд Улаанбаатарын иргэд амьдарч байна. Энэ нь Монголын улстөрчид дандаа ирээдүй цагт асуудлыг ярьдаг байсныг нотолж буй юм. Хоёр жилийн дараа сайхан болно, дөрвөн жилийн дараа дэндүү гоё болно, арван жилийн дараа асар сайхан болно гэдэг худлаа амлалтуудыг өгч ирсэн.

Харин сүүлийн үед дөрөв дэх засаглал болсон хэвлэл мэдээллийн байгууллагууд тэдний худал амлалтуудыг эргэж, сөхөж гаргаж ирж байгаагаар иргэд хэрсүү болсон. Худал амлалтад ахиж итгэхгүй байх гэж найдаж байна.

Өнөөдөр эрчим хүчний аюулгүй байдал бол үндэсний аюулгүй байдалд хамаардаг. Эрчим хүчний аюулгүй байдал бүрэн алдагдлаа. Мөн 2024 оны 11 сарын 15-нд эрчим хүчний үнэ нэмэгдсэн нь иргэдэд эдийн засгийн хүндрэлтэй байдал үүсэж, худалдан авах чадварт хэрхэн нөлөөлж байгааг манай бүлгийн ажлын хэсгийнхэн маш сайн судалгаа хийсэн байгаа. Үүнд дүгнэлт хийх шаардлагатай гэж үзсэн.

Та бүхэн санаж байгаа байх. Сүүлийн нэг жилийн хугацаанд ДЦС-3 дээр дэлбэрэлт гарч, ДЦС-4 дээр гэмтэл гарч, хүний амь нас эрсэдсэн тохиолдол байна. Харамсалтай нь хэн ч үүнд хариуцлага хүлээдэггүй. Хариуцлага хүлээдэг тогтолцоо Засгийн газарт байхгүй болчихсон юм байна.

Манай Засгийн газар давхардсан чиг үүргийг давхардуулж бий болгодог. Үүнээс болж ажлыг хэн хариуцаж байгаа нь мэдэгдэхээ больчихдог. Эрчим хүчний үндэсний реформын хороог татан буулгасан нэртэй. Гэтэл өнөөдрийн байдлаар Шадар сайдын ажлын албан дээр Эрчим хүч, экспортыг дэмжих нэгж гэсэн бүтэц 11 сард байгуулагдсан. Нэг салбарыг хэд, хэдэн сайд тодорхой асуудлуудыг өөр өөр байдлаар хариуцаад эхлэхээр ирээдүйд үүсэх нөхцөл байдалд хэн ч хариуцлага хүлээхгүй байна.

Тийм учраас миний зүгээс өөрийн албан бланк дээрээ Эрчим хүчний сайд Б.Чойжилсүрэн, Т.Доржханд нарыг огцруулах саналыг гаргаж, Ерөнхий сайдад хүргүүлж байна.

Танхимынхаа сайдыг огцруулах бүрэн эрх Ерөнхий сайдад бий. Ерөнхий сайдын бүрэн эрхэд халдахгүйн тулд шинэ үндсэн хуулийн дагуу ийн санал хүргүүлж байна. Ерөнхий сайдыг байнга хариуцлага ярьдаг, үр дүн шаарддаг тухай УИХ-ын чуулган дээр ярьдаг. Хамгийн томоор ажлын хариуцлага алдсан хоёр сайддаа хэрхэн хариуцлага тооцохыг нь харъя" гэв.

Н.Отгончимэг