sonin.mn
Сэтгэгдэл (2)

ВАШИНГТОН, 2026 оны хоёрдугаар сарын 3 /DW/. Энэтхэгийн Ерөнхий сайд Нарендра Моди Оросоос газрын тос худалдан авахаа зогсоохыг зөвшөөрсөн гэж АНУ-ын Ерөнхийлөгч Дональд Трамп түүнтэй даваа гарагт утсаар ярьсныхаа дараа мэдэгджээ. 


Трампын тайлбарласнаар, Энэтхэг улс АНУ-аас, магадгүй Венесуэлээс худалдан авах газрын тосоо нэмэгдүүлэхэд бэлэн байгаа аж. “Ингэснээр долоо хоног бүр мянга мянган хүний амь насыг авч одож буй Украин дахь ДАЙНЫГ ЗОГСООХОД тусална!” хэмээн Трамп бичсэн байна. 


Тэрбээр мөн Энэтхэгт ногдуулаад байсан худалдааны татварыг 25 хувиас 18 хувь болгон бууруулахаар зөвшөөрснийг онцлон тэмдэглэжээ. Н.Моди Америкийн бараа бүтээгдэхүүний худалдан авалтыг нэмэгдүүлэх алхам хийнэ гэж Д.Трамп мэдэгджээ. Түүний мэдэгдсэнээр, Энэтхэг улс “АНУ-ын хувьд тариф болон тарифын бус саад тотгорыг тэг болтол бууруулах алхмуудыг хийх аж”. 


Харин Н.Моди Оросын газрын тосны талаар дурдаагүй байна. Тэрбээр Х нийгмийн сүлжээнд бичихдээ, АНУ-ын Ерөнхийлөгчтөй “үр өгөөжтэй, гайхалтай” яриа өрнүүлсэн гэжээ.


“Энэтхэгт үйлдвэрлэсэн бараа бүтээгдэхүүнд ногдуулсан татварыг 18 хувь болгож бууруулахаар болсонд маш их баяртай байна” хэмээн тэрбээр бичээд ОХУ-аас импортолдог газрын тостой холбоотой асуудлыг дурдаагүй байна.



Д.Жаргал

Эх сурвалж: "Монцамэ" агентлаг