sonin.mn
Сэтгэгдэл (1)

Дайн болж буй энэ үед Орос улс Ирантай тогтоосон цэргийн хамтын ажиллагаагаа улам өргөжүүлж байна гэж Америкийн The Wall Street Journal цахим сэтгүүлд бичжээ.


Тухайлбал, Москвагаас Техранд хиймэл дагуулын зургууд, дроныг шинэчлэн сайжруулах технологийг өгч байна. Тодруулбал, “Шахед” дроны шинэчилсэн эд ангиудыг нийлүүлсний сацуу Украинд дронуудыг хэрэглэсэн туршлагаасаа хуваалцаж, тухайн байлдааны ажиллагаанд хэдэн дроныг ямар өндрөөс ашиглах талаар зөвлөгөө өгчээ.


Мөн Ойрх Дорнод дахь АНУ-ын болон түүний холбоотнуудын цэргийн баазуудын байршлын талаарх мэдээллийг дамжуулсан байна. Чухамдаа Оросоос ирсэн мэдээлэл нь Ойрх Дорнод дахь Америкийн радаруудад цохилт өгөх боломжийг олгожээ. Орос-Ираны цэргийн хамтын ажиллагаа нь Украинд болж буй дайны явцад маш ихээр өргөжсөн юм. Дайн эхэлснээс хойш Оросын тал Ираны 57 мянган “Шахед” дроныг ашиглан довтолжээ. Одоо энэ дроныг Орост сайжруулан үйлдвэрлэж, Иран руу илгээж байна.


Харин эдгээр мэдээлэлд Оросын тал ямар нэгэн тайлбар хийсэнгүй. Энэ талаар АНУ-ын Ерөнхийлөгч тусгай элч Стивен Уиткоффын хэлснээр, тагнуулын мэдээллийг Иранд өгч байгаа гэдгээ Оросын тал үгүйсгэсээр байгаа ажээ. 


Ойрх Дорнодын дайн нь олон талаар Орост ашигтай байгаа юм. Тухайлбал, дайнтай холбоотойгоор Америкаас Украинд нийлүүлж буй агаарын довтолгооноос хамгаалах хэрэгслийн тоо цөөрчээ. Үүний сацуу Ираны тал Ормузын хоолойг хааснаар түүгээр тээвэрлэдэг нефть, шингэрүүлсэн хийн нийлүүлэлт үндсэндээ зогсож, үнэ өслөө. Үнийг тогтворжуулахын тулд Трампын засаг захиргаа Оросын нефтэнд тавьсан хоригоо сулруулсан байна. Харин дайны улмаас Ираны дэглэм унах аваас Орос улс холбоотноо алдана. 



Б.Адъяахүү