sonin.mn
Сэтгэгдэл (31)

УИХ-ын гишүүн, "Үндэсний эвсэл"-ийн тэргүүн Н.Номтойбаяр мэдээлэл хийлээ.


Тэрээр: "Өнгөрсөн хугацаанд миний бие олны анхаарал татсан, хэл ам дагуулсан зарим асуудлуудын талаар зөвхөн гадна талыг нь хөндөж, мөн чанарыг нь нууж байна гэсэн гомдол, мэдээллийг хэвлэл мэдээлэл болон иргэдээс хүлээн авч байсан. Үүний нэг нь Гашуунсухайт чиглэлийн төмөр замын бүтээн байгуулалттай холбоотой асуудал бөгөөд үүнд “Бодь” ХХК болон “Таван Богд” групптэй холбоотой гэрээ, үнийн маргаан багтсан. Тус гэрээний үнийн дүн 1 тэрбум 5 сая ам.доллар гэж яригдаж байгаа. Үүн дээр өмнө нь гүйцэтгэгчээр ажиллаж байсан “Samsung C&T” компанийн Хөгжлийн банкнаас авсан 276 сая ам.долларыг нэмбэл нийт дүн нь 1.3 тэрбум ам.долларт хүрч байна. Үүнийг өнөөгийн ханшаар төгрөгт шилжүүлбэл улсын төсөвт асар их, олон их наяд төгрөгийн хэмжээний санхүүгийн асуудал яригдаж байгаа юм.


Сүүлийн өдрүүдэд Ерөнхий сайд Л.Оюун-Эрдэнэ, ХЗДХ-ийн сайд Х.Нямбаатар, мөн УИХ-ын гишүүн Б.Энхбаяр нарын хооронд энэ асуудалтай холбоотой үнэн худал нь тодорхойгүй олон мэдээлэл цацагдсан. Үүнтэй холбогдуулан хууль, хяналтын байгууллагуудад тодорхой материалууд өгөгдөж байгааг бид харж байна. Мөн холбогдох албан тушаалтнууд мэдээлэл хийж, байр сууриа илэрхийлсэн.


Гэсэн хэдий ч олон мэдээллийн дунд тодорхой байгаа нэг зүйл нь: Уг гэрээнд гарын үсэг зурсан “Бодь” ХХК-ийн захирал Амундра, “Тавантолгой” ХК-ийн гүйцэтгэх захирал асан Удаанжаргал нарын байршил, нөхцөл байдал тодорхойгүй байгаа явдал юм. Миний санаж байгаагаар 2022 оны 12 дугаар сарын эхээр Ерөнхий сайд Л.Оюун-Эрдэнэ болон ХЗДХ-ийн сайд Х.Нямбаатар нар энэ хэрэгтэй холбоотой 17 хүний нэрсийг зарлаж байсан. Тэдний дунд Х.Баттулга болон гадаад руу оргон зайлсан байж болзошгүй хүмүүсийн тухай мэдээлэл ч байсан.


Мөн энэ хэрэгтэй холбоотойгоор нэг хүн амиа хорлохыг завдсан тохиолдол цагдаагийн байгууллагад бүртгэгдсэн байдаг. Энэ бүхнээс харахад уг асуудалд ноцтой нөхцөл байдал үүссэн нь тодорхой байна.


Өнгөрсөн хугацаанд энэ асуудалтай холбоотойгоор “нүүрсний сонсгол” зохион байгуулагдаж, нийт 5 цаг 40 минут үргэлжилсэн нээлттэй хэлэлцүүлэг болсон. Үүний үр дүнд тухайн үед сонсголд оролцсон УИХ-ын гишүүн Б.Энхбаяр уг асуудалд ноцтой зөрчил байж болзошгүй гэж үзэн, шинжээчийн дүгнэлт гаргуулж, холбогдох хууль, хяналтын байгууллагад хүргүүлсэн байна. Гэвч өнөөдрийг хүртэл дорвитой арга хэмжээ авагдаагүй байна. Иймээс өнгөрсөн үйл явдлуудыг дүгнэж үзэхэд Гашуунсухайт чиглэлийн төмөр замын бүтээн байгуулалт, түүнд оролцсон аж ахуйн нэгжүүдийг тойрсон авлига, хулгай, нүүрсний борлуулалттай холбоотой ноцтой асуудлууд байж болзошгүй гэж үзэх үндэслэл байна. Тиймээс Улсын Их Хурлын хяналт шалгалтын чиг үүргийн хүрээнд тусгай, түр хороо байгуулж, энэ асуудлыг дахин нягтлан шалгах эрх зүйн зохицуулалтыг бий болгон, бодитой шалгах шаардлагатай гэж үзэж байна. " гэв.


Б.Төгсбаясгалан