sonin.mn
Сэтгэгдэл (30)

МАН-ын сонгуулийн сурталчилгаа албан ёсоор эхэллээ.


Монгол Улсын хөгжлийн шинэ 30 жилийг эхлүүлэх үнэт зүйлийн түүчээ болсон МАН шинэ зууныг ялалтаар эхлүүлэх хариуцлага хүлээсэн нэр дэвшигчдээр багаа бүрдүүлэн 2024 оны УИХ-ын сонгуулийн сурталчилгаагаа ийнхүү эхлүүллээ. Тус намын сонгуулийн сурталчилгааг нээж, МАН-ын дарга, Монгол Улсын Ерөнхий сайд Л.Оюун-Эрдэнэ үг хэлсэн юм. 


Тэрбээр “Өнөөдөр Монгол Улс нутаг дэвсгэрийн төлөөлөлд түшиглэсэн 76 гишүүнтэй. Өнгөрсөн 30 жилийн амжилт бүтээл, алдаа оноог түүх болгон үлдээж нийгмийн салбар бүрийн дуу хоолой, иргэдийн идэвхтэй оролцоонд тулгуурласан нэн шинэ парламентын эрэн үеийг та бид хамтдаа эхлүүлж байна.


Улс орон бол хүний биетэй адилхан амьд организм. Эд эс эрхтэн бүхэн эрүүл байж цусны эргэлт хурдасч дархлаа хэвийн байж, эрүүл эрч хүчтэй байдаг шиг улс орны хөгжил гэдэг цогц ойлголт бөгөөд шинж тэмдэгтэй цаг алдан зууралдах биш суурь шалтгааныг зөв оношилж суурь реформыг цаг алдалгүй хийх ёстой” хэмээн үгийнхээ эхэнд тодотголоо. 


Тэрбээр Реформ бол та бидний идэвхтэй оролцоо, эр зориг шаардсан тэмцэл. Реформ бол харах өнцгөө өөрчлөх хандлагаас эхлэх учиртай. Реформ бол хуучин замнал доторх үнэт зүйлийн дахин төрөлт юм. Мартагдсан зорилгоо санах, алдагдсан зарчим руугаа буцах эргэлтийн цэг юм. Бидэнд ардчилах нь зүйтэй гэдэг хүсэл эрмэлзэл байснаас ардчиллаа хамгаалах сургамж, төлөвшүүлэн хөгжүүлэх туршлага, дүгнэлт хийх цаг хугацаа байгаагүй нь түүхэн үнэн. Тийм ч учраас реформ бол хувьсгал биш, хувьсгалын үзэл санаа, үнэт зүйлийг дахин тодотгох эргэлтийн цэг юм.  Мартагдсан зорилго руугаа буцах, алдагдсан зарчим руугаа эргэх ухаарлыг Ерөнхий сайд А.Амар нарын үндэсний дэвшилтэт сэхээтнүүд “Шинэ эргэлтийн бодлого” гэж тодорхойлж байсныг бид бүгдээрээ биднэ.


Харин өнөөдөр бид ардчилсан хувьсгалын удирдагчдын нэг С.Зоригийн хүсэж мөрөөдөж байсан, манай ахмадууд итгэж, эрхээ шилжүүлсэн ардчилсан хувьсгалын анхны үнэт зүйлийг эргүүлэн авчрахын төлөө томоохон хэмжээний реформ хийх цаг болсон байна хэмээн онцлон тодотгов. Үргэлжлүүлэн тэрбээр “Ардчилал бол өөрөө өөртөө дүгнэлт хийж, амжилтаа тодотгож чаддаг, алдаагаа засаж чаддаг нээлттэй мэтгэлцээний чөлөөт нийгэм юм. Тийм ч учраас бидэнд ардчиллын хоёр дахь давалгаа болсон реформ зайлшгүй шаардлагатай байна. 


Шинэ сэргэлтийн реформ бол ардчилсан үнэт зүйлийг гажуудуулсан, авлигатай нам харгалзалгүй тэмцэх та бидний тэмцлийн эр зориг юм.   Тийм ч учраас шинэ сэргэлтийн реформ гацсан бүхнийг хөдөлгөх, гажсан бүхнийг засах, эдийн засгаа өрх бүхэнд хүртээмжтэй болгох, ардчилсан парламентын засаглалаа аварч үлдэх, парламентад итгэх харах өнцгийн өөрчлөлт байх учиртай” гэдгийг онцоллоо. Өнгөрсөн хугацаанд иргэдийн мэдэх эрх хангагдаж, авлигыг үл тэвчих нийгмийн сэтгэлзүй бүрэлдэн тогтож, түмэн олны ойлголт өдрөөс өдөрт хэрсүүжиж, ард түмний ёс зүйн өндөрлөгт шударга ёсны туг өндрөөс өндөрт мандсан учраас бид энэ тэмцэлд ялсан. Ард түмэн энэхүү ёс зүйн өндөрлөгөөс хэзээ ч ухрахгүй. Тийм ч учраас энэ бол ард түмний ялалт, шинэ 30 жилийн эхлэл байж чадсан” хэмээн тодотголоо.