Цагтаа 300 саяар үнэлж, битүүмжлэн авсан Хадгаламж зээлийн хоршооныхны барилгыг нь таван сая болгоод ч хүн тоож авдаггүй гэнэ. Хууль зүйн байнгын хорооны өчигдрийн хуралдаанаар ХЗХ-ын хохирогчдын хохирлыг барагдуулах ажил ямар шатанд яваа талаар ШШГЕГ-ынхны мэдээллийг сонсов. Богино хугацаанд их мөнгөтэй болох гэсэн иргэд ХЗХ-нд байдгаа алдаж, бадар бариад найман жилийн нүүр үзэж байна. Энэ хугацаанд хохирогчид хохирлоо бүрэн барагдуулж чадсангүй. Онгорхой хаалга бүрийн үүдэнд өлсгөлөн зарлаж, аврал нэхсээр яваа. Уг нь нийт 30 гаруй ХЗХ дампуурлаа зарлах үед хууль хяналтын байгууллагууд 43 тэрбум төгрөгийн хөрөнгийг битүүмжилжээ. Түүнээс гадна газар, ашигт малтмалын лиценз, 34, 36 айлын орон сууц гээд үл хөдлөх хөрөнгө их байсан ч үнэлгээнд оруулалгүйгээр алга болжээ.

ШШГЕГ-ын даргын хэлснээр цагдаагийн байгууллагаас анх 29 тэрбум төгрөгийн хөрөнгө хүлээж авч байсан аж. Мөн таван ашигт малтмалын лиценз хүлээж авсан ч цаг хугацаандаа лицензийн төлбөр нь төлөгдөөгүйгээс болж Ашигт малтмалын газраас тэдгээрийг хурааж авсан байна.

Харин хохирогчдын хувьд анх хөрөнгийг битүүмжлэх үед нийт 14 лиценз байсан, түүнээс ердөө тав нь ШШГЕГ-т шилжиж, ес нь аль шатанд алга болсоныг тодруулж чадалгүй өнөөг хүргэсэн гэнэ. Түүнчлэн хохирогчид хамгийн үнэ хүрэх боломжтой үл хөдлөх хөрөнгүүдийг нэг бол огт үнэлгээнд оруулаагүй, эсвэл бага үнээр үнэлж, худалдсан байдаг аж. Гэтэл өнөөдрийг хүртэл борлогдохгүй, агуулахад хог болон хэвтэж байгаа эд хөрөнгүүдийг хэт өндөр үнэлсэн байдгийг ч энэ үеэр тодотгож байсан.

Хохирогчдын хэлж буйгаар хохирлоо бүрэн барагдуулах эд хөрөнгө, үнэт зүйлс тухайн ХЗХ-нуудад байсан гэх. Гэтэл битүүмжилсэн нэрийдлээр дээгүүр, доогуураа шамшигдуулаад дуусч байгааг онцолсон.Тэрч бүүхэл.ХЗХ-г дампуурч, хөрөнгүүдийг битүүмжилсний дараа хохирогчид битүүмжилсэн хөрөнгүүдийг хувь тэнцүүлэн өөрсдөө үнэ тохирч авах хүсэлтийг холбогдох газруудад гаргаж байсан аж. Хэрэв тэдний хүсэлтийг хүлээн авсан бол замын дундаас алга болж, эсвэл үнэгүйдэхгүй байсан хэмээн хохирогч Д.Оюунцэцэг мэдэгдэв.

Харамсалтай нь, одоогийн дуудлага худалдаанд оруулж байгаа зүйл нь эксель машины хаалга, ажиллах эсэх нь эргэлзээтэй компьютер байх жишээтэй. Түүнчлэн битүүмжилсэн машинууд цагдаагийн байгууллагаас ШШГЕГ-т хүргэгдэхдээ хэдийнэ тоногдчихсон байсан гэнэ. Иймээс хөрөнгийн үнэлгээ бодитой эсэхийг нягтлахаар Улсын ерөнхий прокурор, Аудитын ерөнхий газрынхан оролцсон баг орон нутагт ажиллаж байгаа аж. Тухайлбал, 300 сая төгрөгөөр үнэлсэн байрыг 5-6 сая төгрөг, 40 сая төгрөгөөр үнэлсэн байрыг 1.2 сая төгрөгөөр үнэлсэн болохыг ч тогтоожээ. Үүнээс 1.2 сая төгрөгөөр үнэлэгдсэн байр нь Дархан-уул аймагт байдаг, хуучин оросуудын ашиглаж байсан, тахианы байр. Түүнчлэн алга болсон лицензүүдийн сургийг гаргаж өгөхийг ч цагдаагийн удирдлагуудаас удаа дараа хүсч байгаагаа энэ үеэр хохирогчдын төлөөлөл хэлж байлаа.

Эх  сурвалж: " Нийгмийн толь"

Л.Нинж