УИХ-ын гишүүн У.Отгонбаяр Нөмрөгийн дархан цаазат газарт гарсан гал түймэртэй холбоотой асуудлаар сэтгүүлчдийн асуултад хариулсныг сийрүүлэн хүргэж байна.

Нийт газар нутгийн 70 хувьд нь хүн хүрч очих боломжгүй учраас нисдэг тэргээр очиж, нөхцөл байдлыг тогтоох юм байна. Та тухайн үед үүссэн нөхцөл байдлын талаар мэдээгүй гэж хэлсэн. Гэхдээ тусгай хамгаалалттай газар нутагт нэвтрэх зөвшөөрөл олгосон хүмүүст хариуцлага тооцох асуудал чухал болоод байна. Энэ талаар та ямар байр суурьтай байна вэ?

Байгаль орчин, уур амьсгалын өөрчлөлтийн сайдын хэлснээр ажлын хэсэг байгуулагдаж, газар дээр нь ажиллаж байгаа юм байна. Энэ асуудал буух эзэнтэй, буцах хаягтай учраас богино хугацаанд шийдвэрлэх үүрэг даалгаврыг сайд өгсөн байна лээ. Тиймээс та бүхэн Байгаль орчны сайдаас илүү дэлгэрэнгүй мэдээлэл авах хэрэгтэй байх.

Бидний авсан мэдээллээр "Мобиком" корпораци Хилийн боомтын захиргаанаас зөвшөөрөл аваагүй байна. Энэ бол ноцтой асуудал. Тэгэхээр ямар хүмүүс нөлөөлж, тухайн газарт нэвтрэх боломж олгосон юм бол?

Энэ бүхэн тодорхой болох байх. Байгаль орчны сайдын хэлснээр тухайн газар нутгийн захиргаанаас зөвшөөрөл авсан ч холбогдох бусад байгууллагаас зөвшөөрөл аваагүй гэх асуудал яригдаж байгаа юм байна. Тиймээс хаана, ямар алдаа дутагдал гарсныг ажлын хэсэг тогтоох байх.

Ажлын хэсгийг шаардлагатай боломж, нөхцөлөөр хангаж ажиллуулах хэрэгтэй. Улмаар хариуцлага алдсан хүмүүст хариуцлага тооцох механизмыг хэрэгжүүлэх байх гэж бодож байна. Энэ талаарх мэдээллийг холбогдох гишүүд болон Байнгын хорооноос цаг тухайд нь авна.

Олон нийт танд ч бас хариуцлага тооцох ёстой гэж үзэж байна. Учир нь та гал түймэр гарсан газарт байгаагүй ч "Мобиком"-ын төслийн нээлтийн үйл ажиллагаанд оролцсон шүү дээ?

Би тухайн үед төслийн нээлтийн арга хэмжээнд оролцсон. Үүний дараа аймагтаа ажиллаад Улаанбаатарт ирсэн. Өөрөөр хэлбэл, тухайн хүмүүсийг дагуулж явсан, тэр үйл ажиллагаанд оролцсон гэх зүйл огт байхгүй.

Тэгэхээр та ямар нэгэн байдлаар нөлөөлөөгүй гэсэн үг үү?

Би яаж нөлөөлөх юм бэ? Ямар жаахан хүүхэд биш дээ. Хэрэв би тухайн үед хариуцлага алдсан бол өөрөө хариуцлагаа хүлээнэ.

Н.Отгончимэг