sonin.mn
Сэтгэгдэл (0)
ВАШИНГТОН. /U.S. Department of State/. АНУ-ын Төрийн нарийн бичгийн дарга Энтони Блинкен Герман, Турк, Грект энэ сарын 16-22-ны өдрүүдэд айлчилна.   
 
 
Э.Блинкен Мюнхены аюулгүй байдлын бага хуралд оролцохоор пүрэв гарагт Герман улсыг зорих бөгөөд Украиныг үргэлжлүүлэн дэмжих, Турк, Сирийн ард түмэнд тусламж үзүүлэх, мөн Атлантын далайг дамнасан аюулгүй байдал, дүрэм журамд суурилсан олон улсын дэг журмыг сахиулах талаар хэлэлцэхээр хоёр талын болон олон талын уулзалтуудад оролцоно.
 
 
Хоёрдугаар сарын 19-нд Э.Блинкен Турк улс дахь Инжирлик агаарын цэргийн баазад зочилж, Туркийн эрх баригчдад газар хөдлөлтийн уршгийг арилгахад туслалцаа үзүүлж буй АНУ-ын хүчин чармайлттай биечлэн танилцана.
 
Түүний дараа Туркийн Гадаад хэргийн сайд Мевлют Чавушоглу тэргүүтэй өндөр түвшний төлөөлөгчидтэй уулзахаар Анкара хотыг зорьж, Турк болон Туркийн ард түмэнд АНУ-аас үзүүлэх тусламж, мөн НАТО-гийн холбоотон Турк улстай хамтын ажиллагаагаа цаашид бэхжүүлэх арга замын талаар хэлэлцэх юм.
 
Түүнчлэн Сирийн байгалийн гамшигт өртсөн бүс рүү хил дамнан тусламж илгээхэд дэмжлэг үзүүлж буй Туркийн Засгийн газарт талархал илэрхийлэх ажээ. Грекийн нийслэл Афин хотод Э.Блинкен Грекийн Ерөнхий сайд Мицотакис, Гадаад хэргийн сайд Дендиас нартай уулзаж, батлан хамгаалах салбарын хамтын ажиллагаа, эрчим хүчний аюулгүй байдал, ардчиллыг хамгаалах үүрэг амлалтын талаар хэлэлцэнэ. Мөн АНУ-ын Төрийн нарийн бичгийн дарга хоёрдугаар сарын 21-нд АНУ-Грекийн стратегийн яриа хэлэлцээний дөрөв дэх үе шатыг эхлүүлэх ажээ.
 
 
Э.Хулан
Эх сурвалж: "Монцамэ" агентлаг