sonin.mn
Сэтгэгдэл (181)

Би Лондонд олон жил аж төрж, уран бүтээлээ туурвиж суудаг зураач хүн. Тухайн үед ах дүү Польшид зураачийн мэргэжил эзэмшсэн. Их Британи бол яалт ч үгүй ардчилсан улс. Ардчиллынх нь үр шимийг амсаад би гэр бүлээрээ энд аж төрж болоод байна, хууль дүрмийг нь сахиад болж л байна.

 

Харин Ардчилсан Монголынхоо зарим иргэд, анд нөхөд, ахмад дайчид, дүү нарыг ойлгох ухаан дутаад цөхрөлөө барах дөхөх юм. “Ояа” нар гэдэгчүүдээс биечлэн таних хүн над байхгүй ч, тэд бол монгол ахан дүүүс маань. Ардчиллын үр шимийг амсагч МОНГОЛ-чууд.

 

Ардчилал эрх чөлөөний зам сонголоо, хөгжлийнхөө гэрэлт цамхагийг Европын Холбоо гэж харлаа гэснийхээ төлөө л Украин Оросын эзлэн түрэмгийллийн хохирогч болчихсон шүү дээ. Одоо ч цус урссаар байна. Европ даяар, энэ Британи улсад Орост хайртайчууд гэж нэг ч байхгүй болтлоо Путины яргалал, түрэмгийллийг эсэргүүцэж байна. Би өдөр бүр харж байна. Британид засгийн эрх солигдож, эрх баригч хоёр том нам ээлжлэн төр барихад хоёулаа л Украины ард түмний талд бат зогсож байна. Саяхан Стамбулд уулзлаа болсон. Араас нь Орост суртал нэвтрүүлгийн заналхийлэл тасрахгүй байна. Украин гэж ард түмэн оршин тогтнох эрхгүй, устгавал таарна, зэвсгийг нь хураана, нацистуудыг нь шийтгэнэ, хөнөөнө, Европ Украинд туслаж болохгүй, харин Оросын түрэмгийлэн эзлэсэн газар нутгийг нь Оросынх гээд хүлээн зөвшөөрвөл барав...


Гурван жилийн өмнө түрэмгийлэл эхэлж байх үед оросуудын тавьж байсан буулган авах шаардлага яг хэвээрээ. Бууж өгөхгүй бол устгана! Еэ бүү үзэгд. Оросууд ингэтлээ газар нутгийн шуналын тулам болчихсон юм уу гэж би гайхшаа бараад бичиж байна.


1991 онд Зөвлөлт гүрнийг булшлахад оройлсон Орос чинь өөрөө хамтран хуйвалдсан Украин, Беларусийнхаа хил хязгаар, Зөвлөлтөөс өвлөсөн бүхнийг нь хүлээн зөвшөөрсөн биз дээ. 1994 онд Украины тусгаар тогтнол, бүрэн эрхт байдал, нутаг дэвсгэрийн бүрэн бүтэн байдлыг ОХУ өөрөө оройлоод АНУ, Британитай хамтраад аюулгүй байдлын баталгаа гаргаж өгснийг монголчууд минь эрхбиш мартаагүй байлтай. Оросын төлөө үхэхээс бусдыг хийхэд бэлхэн монголчууд минь Оросын ТВ-ийн суртал нэвтрүүлэгт тархиа нэвт угаалгаад, Украин руу нялж нааж байгаа бүх хар хорыг зөвшөөрөөд дагаж дууриаж хараал урсгаад байвал Орос ялчихна гэж боддог бол хий горьдлого шүү. Энэ цаг үедээ Зеленский олон улсын шилдэг лидер болчихоод байна. Хүнийг басч доромжилж болохгүй. Би Та нартаа ахмад хүний хувьд жирийн нэгэн асуултыг газрын зургаар тавья.





ОХУ-тай хил залгаа баруун, баруун хойд аймгуудаас Орост хайртайчуудыг элсүүлээд Улаанбаатарынх нь эсрэг цэнэглээд босгочихож гээд төсөөл дөө. Эхлээд референдум явуулаад, дараа нь ОХУ-д аймгаараа нэгдэж орох хүсэлт Москва руу өгүүлээд, сүүлдээ Москва нь ОХУ-ын Үндсэн хуулинд нөгөө аймгуудыг чинь ОХУ-ын нутаг дэвсгэрийн салшгүй нэг хэсэг гээд батлачихвал (зүгээр төсөөлөл шүү!) энэ “ОЯА” нар яах болж байна вэ гэж би айх боллоо. Тэгээд Улаанбаатарт нь зөвшөөрөхгүй бол дайн хийчихээд манай нутагт байлдаад салахгүй, урвагчид ба 5-р цувааг монголчуудынх нь эсрэг ашиглаад, цус урсгаад байж байвал ямар байх вэ? Миний монтажилсан газрын зургийг хар даа. Би ёрлож байгаа юм биш. Зүгээр л Та нарт энгийнээр ойлгуулах гэж байна. Харьцуулалт хийлгэх гэж байна. Энэ зургийг сайтар хар, Таны сэтгэлд юу буух вэ? Украин гэдэг улс, Украины ард түмэн яг л ийм зүйлтэй тулгарчихаад эх орноо хамгаалан байлдаж байна. Ганц Украин гэлтгүй, эх орноо гурван хэсэгт хуваалгасан Гүрж, хоёр хэсэгт хуваалгасан Молдавын гашуун түүхийг давтахгүй гэснийхээ төлөө Украин эх орноо хамгаалах шударга дайн хийж байна. Өнөөдөр биш ч хэзээ нэгэн цагт Украин зөвтөхийн цагт “ОЯА” нар яах болж байна вэ? Монгол-Зөвлөлтийн улирч баларсан найрамдлаар ам таглаад оросын одон медаль зүүгээд цагаадна гэж байхгүй шүү, эрхэм дүү нар аа, анд нар аа!

                                                                                              

Тодын Отгонбаяр (Лондон зураач)