sonin.mn
Сэтгэгдэл (0)

Онцгой байдлын байгууллагын 21 жилийн ойн энэ өдөр “Онцгой байдлын албаны анхны сайдын нэрэмжит шагнал”-ыг Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн салааны захирагч, дэслэгч Д.Ганзориг хүртэж, 25 сая төгрөгөөр шагнууллаа.


Шагналыг Онцгой байдлын албаны анхны сайд, Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх гардууллаа. Д.Ганзориг нь 2004-2018 онд Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангид гал сөнөөгч, 2018-2024 онд ангид салааны захирагчийн туслах, 2024 оноос салааны захирагчаар ажиллаж байна.  


Сүүлийн гурван жилд 886 удаагийн гамшиг, аюулт үзэгдэл, ослын дуудлагаар ажиллаж, 245 хүний амь нас, аж ахуйн нэгж, байгууллагын хоёр тэрбум төгрөгийн эд хөрөнгийг авран хамгаалж, 100 гаруй хүнд эмнэлгийн анхан шатны тусламж үзүүлжээ.


Бүгд Найрамдах Өмнөд Судан Улс дахь НҮБ-ын энхийг сахиулах “UNMMISS” ажиллагаанд 2020-2021 онд онд үүрэг гүйцэтгэсэн. 2005 оноос Гал унтраах техник спортоор тасралтгүй хичээллэн, бүс, улсын аварга шалгаруулах тэмцээнд оролцож, Олон улсын хэмжээний мастер цол хүртсэн. 2023, 2024 онд Турк, Хятадад болсон Дэлхийн аварга шалгаруулах гал унтраах техникийн олон төрөлт спортын тэмцээнд Монгол Улсын шигшээ багийн дасгалжуулагчаар ажиллаж, 4х100 метрийн буухиа төрөлд улсын дээд амжилт тогтоожээ.